ຄະນະລັດຖະປະຫານໄນເຈີປະກາດປິດນ່ານຟ້າ ບໍ່ສົນເສັ້ນຕາຍ ECOWAS ຮຽກຮ້ອງຄືນອຳນາດປະທານາທິບໍດີ
ວັນທີ 6 ສິງຫາ 2023, ຄະນະລັດຖະປະຫານໄນເຈີປະກາດປິດນ່ານຟ້າແບບບໍ່ມີກຳນົດ ໂດຍໃຫ້ເຫດຜົນວ່າ: ປັດຈຸບັນນີ້ມີຄວາມສ່ຽງຈະເກີດການແຊກແຊງທາງທະຫານຈາກພາຍນອກ ຫລັງຜູ້ນຳລັດຖະປະຫານປະຕິເສດທາງເລືອກຂອງບັນດາຜູ້ນຳກຸ່ມປະຊາຄົມເສດຖະກິດລັດອາຟຣິກາຕາເວັນຕົກ (ECOWAS) ທີ່ສະເໜີໃຫ້ໄນເຈີຄືນອຳນາດທາງການເມືອງໃຫ້ປະທານາທິບໍດີ ໂມຮຳເໝັດ ບາຊູມ ພ້ອມຂູ່ອີກວ່າ: ຖ້າບໍ່ຍອມປະຕິບັດຕາມຂໍ້ຕົກລົງນີ້ ອາດຕ້ອງຜະເຊີນການແຊກແຊງທາງທະຫານຈາກຕ່າງປະເທດ.
ຕອນແລງວັນທີ 6 ສິງຫານີ້, ຜູ້ແທນລັດຖະບານທະຫານໄນເຈີກ່າວໃນຖະແຫລງການວ່າ: “ເນື່ອງຈາກໄພຄຸກຄາມດ້ານການແຊກແຊງທາງທະຫານເລີ່ມຈະແຈ້ງຂຶ້ນ ໄນເຈີຈຶ່ງຕັດສິນໃຈປິດນ່ານຟ້າ ໂດຍຈະມີຜົນນັບແຕ່ວັນທີ 6 ສິງຫາເປັນຕົ້ນໄປ” ພ້ອມກ່າວວ່າ: ປັດຈຸບັນກອງກຳລັງຈາກຕ່າງປະເທດມີການກຽມຄວາມພ້ອມກ່ອນວາງກຳລັງທະຫານໃນ 2 ປະເທດອາຟຣິກາກາງ ເພື່ອຫວັງຈະເຂົ້າແຊກແຊງໄນເຈີ ເຊິ່ງກອງກຳລັງຕິດອາວຸດຂອງໄນເຈີພ້ອມຈະປົກປ້ອງດິນແດນຂອງຕົນ ແຕ່ບໍ່ໄດ້ໃຫ້ລາຍລະອຽດ.
ກ່ອນໜ້ານີ້, ລັດຖະມົນຕີປ້ອງກັນຄວາມສະຫງົບຂອງ ECOWAS ລົງມະຕິເຫັນພ້ອມຈະໃຊ້ແຜນປະຕິບັດການທາງທະຫານຖ້າມີຄວາມຈຳເປັນ ລວມທັງກຳນົດເວລາ ແລະ ສະຖານທີ່ທີ່ຈະໂຈມຕີຄະນະລັດຖະປະຫານຂອງໄນເຈີ ຖ້າບໍ່ຍອມປ່ອຍຕົວ ແລະ ຄືນອຳນາດໃຫ້ປະທານາທິບໍດີ ບາຊູມ ພາຍໃນຂີດເສັ້ນຕາຍ ເຊິ່ງຄືວັນທີ 6 ສິງຫາ. ເຖິງຢ່າງໃດກໍຕາມ, ປັດຈຸບັນ ECOWAS ຍັງບໍ່ໄດ້ອອກມາສະແດງຄວາມຄິດເຫັນໃດໆກ່ຽວກັບກໍລະນີທີ່ເກີດຂຶ້ນ, ແຕ່ໂຄສົກສົ່ງສັນຍານກ່ອນໜ້ານີ້ວ່າອາດມີການອອກຖະແຫລງການໃນມໍ່ໆນີ້.
ຂະນະດຽວກັນ ປະຊາຊົນຊາວໄນເຈີ 30.000 ກວ່າຄົນທີ່ສະໜັບສະໜູນຄະນະລັດຖະປະຫານໄດ້ອອກມາລວມກັນຢູ່ສະໜາມກິລາແຫ່ງໜຶ່ງໃນນະຄອນຫລວງນີອາເມ ເພື່ອສະແດງຈຸດຢືນເຫັນພ້ອມຕໍ່ຄະນະລັດຖະປະຫານຕັດສິນໃຈບໍ່ຍອມຄືນອຳນາດໃຫ້ທ່ານ ບາຊູມ ຕາມ ECOWAS ຮຽກຮ້ອງ.
ຂະນະທີ່ບັນດາຜູ້ນຳປະເທດໃນກຸ່ມ ECOWAS ຊີ້ວ່າ: ການກໍ່ລັດຖະປະຫານເປັນສິ່ງທີ່ບໍ່ສາມາດຍອມຮັບໄດ້, ປະເທດສະມາຊິກຈະດຳເນີນມາດຕະການທີ່ຈຳເປັນທັງໝົດ ເພື່ອຟື້ນຟູຄວາມສະຫງົບຮຽບຮ້ອຍຕາມລັດຖະທຳມະນູນ ໂດຍມາດຕະການດັ່ງກ່າວອາດລວມທັງການໃຊ້ກຳລັງ ແລະ ຮຽກປະຊຸມຜູ້ແທນທາງດ້ານການທະຫານຂອງບັນດາປະເທດສະມາຊິກ ເພື່ອວາງແຜນແຊກແຊງດ້ານການທະຫານຖ້າຈຳເປັນ.
ອ້າງອີງ:
- www.theguardian.com/world/2023/aug/07/niger-closes-airspace-as-deadline-to-reinstate-president-passes
- www.reuters.com/world/africa/calm-pervades-nigers-capital-deadline-reverse-coup-expires-2023-08-06/
www.aljazeera.com/news/2023/8/6/thousands-in-niger-rally-in-support-of-coup-leaders
