ກະສັດຂອງກຳປູເຈຍແຕ່ງຕັ້ງ ທ່ານ ຮຸນ ມາເນດ ເປັນນາຍົກລັດຖະມົນຕີຄົນໃໝ່
ວັນທີ 7 ສິງຫາ 2023, ພະບາດສົມເດັດພະບໍຣົມນາກ ນະໂຣດົມ ສີໝຸນີ ຂອງກຳປູເຈຍ ໄດ້ມີຄຳສັ່ງແຕ່ງຕັ້ງ ພົນເອກ ຮຸນ ມາເນດ ເປັນນາຍົກລັດຖະມົນຕີຄົນໃໝ່ຂອງກຳປູເຈຍ.
ກະສັດຂອງກຳປູເຈຍໄດ້ມີຄຳສັ່ງແຕ່ງຕັ້ງໃຫ້ທ່ານ ຮຸນ ມາເນດ ເປັນນາຍົກລັດຖະມົນຕີກຳປູເຈຍ ພາຍໃຕ້ລັດຖະສະພາ ຊຸດທີ 7 ຕາມທີ່ທ່ານ ຮຸນ ເຊນ ສະເໜີຊື່ໄປ ເຊິ່ງຖືເປັນການຢຸດບົດບາດຂອງທ່ານ ຮຸນ ເຊນ ໂດຍສົມບູນ ພາຍຫລັງທ່ານຄອງອຳນາດໃນກຳປູເຈຍມາແຕ່ປີ 1985 ແລະ ຖືເປັນໜຶ່ງໃນຜູ້ນຳທີ່ຄອງຕຳແໜ່ງຍາວນານທີ່ສຸດໃນໂລກ.
ໂດຍພາຍຫລັງຜົນອອກມາວ່າ: ພັກ Cambodian People’s Party: CPP) ຂອງທ່ານ ຮຸນເຊນ ອະດີດນາຍົກລັດຖະມົນຕີກຳປູເຈຍ ຊະນະການເລືອກຕັ້ງທົ່ວໄປໃນວັນທີ 23 ກໍລະກົດຜ່ານມາ ຕໍ່ຈາກນັ້ນທ່ານ ຮຸນເຊນ ໄດ້ປະກາດລາອອກຈາກຕຳແໜ່ງຜູ້ນຳປະເທດ ເພື່ອເປີດທາງໃຫ້ທ່ານ ຮຸນ ມາເນດ ຜູ້ເປັນລູກຊາຍ ໄດ້ດຳລົງຕຳແໜ່ງນາຍົກລັດຖະມົນຕີຕໍ່ໄປ.
ເຖິງຢ່າງໃດກໍຕາມ, ການແຕ່ງຕັ້ງທ່ານ ຮຸນ ມາເນດ ເປັນຜູ້ນຳຄົນໃໝ່ຢ່າງເປັນທາງການນັ້ນຈະຕ້ອງຜ່ານການອະນຸມັດຈາກລັດຖະສະພາກ່ອນ ເຊິ່ງຄາດວ່າຈະມີການລົງມະຕິໃນທ້າຍເດືອນສິງຫານີ້. ເຖິງຢ່າງໃດກໍຕາມ, ຄາດວ່າທ່ານ ຮຸນ ມາເນດ ຈະຜ່ານການລົງມະຕິຢ່າງສະບາຍ ເນື່ອງຈາກພັກ CPP ຂອງທ່ານ ຮຸນເຊນ ກວມບ່ອນນັ່ງໃນສະພາ 120 ບ່ອນນັ່ງ ຈາກທັງໝົດ 125 ບ່ອນນັ່ງ.
ທ່ານ ຮຸນ ມາເນດ ອາຍຸ 45 ປີ ເປັນລູກຊາຍກົກຂອງທ່ານ ຮຸນເຊນ ເຊິ່ງເຂົ້າເປັນລັດຖະກອນໃນກອງທັບກຳປູເຈຍ ແລະ ຖືກຄາດໝາຍວ່າຈະເປັນຜູ້ສືບທອດຕຳແໜ່ງຕໍ່ຈາກພໍ່ໃນໄລຍະຜ່ານມາ ໂດຍທ່ານ ຮຸນ ມາເນດ ໄດ້ຮັບການສຶກສາໃນນະຄອນຫລວງພະນົມເປັນ ກ່ອນເຂົ້າເປັນລັດຖະກອນໃນກອງທັບກຳປູເຈຍປີ 1995 ເຊິ່ງໃນປີດຽວກັນ ທ່ານໄດ້ເຂົ້າໂຮງຮຽນທະຫານອາເມລິກາຢູ່ເວສພອຍ ແລະ ອີກ 4 ປີຕໍ່ມາໄດ້ກາຍເປັນຊາວກຳປູເຈຍຄົນທຳອິດທີ່ຈົບການສຶກສາຈາກສະຖາບັນອັນຊົງກຽດແຫ່ງນີ້.
ທ່ານ ຮຸນ ມາເນດ ຈົບປະລິນຍາໂທດ້ານເສດຖະສາດຈາກມະຫາວິທະຍາໄລນິວຢອກ (NYU) ແລະ ປະລິນຍາເອກດ້ານເສດຖະສາດຈາກມະຫາວິທະຍາໄລບຣິສຕອລ.
ອ້າງອີງ:
- https://www.reuters.com/world/asia-pacific/cambodia-king-approves-nomination-hun-manet-next-pm-2023-08-07/
- https://www.bbc.com/news/world-asia-66391334
- https://www.reuters.com/world/asia-pacific/like-strongman-like-son-cambodias-hun-manet-makes-political-debut-2023-07-20/
