ເອັສປາຣກາໂຣ້ ແຊງຊະນະ ບານາຢ້າ ຄວ້າແຊ້ມ British Grand Prix 2023
August 7, 2023 - 1:31 PM
ການແຂ່ງຂັນລົດຈັກທາງລຽບ ຊິງແຊ້ມໂລກ ໂມໂຕຈີພີ ສະໜາມທີ 9 ລາຍການ ບຣີທິສ ກຣັງປຣີ ທີ່ສະໜາມ Silverstone Circuit, ປະເທດອັງກິດ ໃນທ້າຍອາທິດຜ່ານມາ ຄວາມຍາວຕໍ່ຮອບ 5.900 ແມັດ ແຂ່ງທັງໝົດ 20 ຮອບ.
ປະກົດວ່າ: ອາເລຊິສ ເອັສປາຣກາໂຣ້ ນັກຂັບຊາວສະເປນ (ແອັສປາຍ) ອາຍຸ 34 ປີ ຈາກຄ້າຍອາພິວເລຍ ແຊງ ຟຣານເຊັສໂກ້ ແບັກໄນອາ (ບານາຢ້າ) ແຊ້ມເກົ່າ ຊາວອີຕາລີ ຈາກຄ້າຍດູຄາຕິ ໃນຮອບສຸດທ້າຍ ເຂົ້າເສັ້ນໄຊເປັນຄົນທຳອິດ ດ້ວຍເວລາ 40 ນາທີ 40.367 ວິນາທີ, ເອົາຊະນະ ບານາຢ້າ ພຽງສ້ຽວວິນາທີ 0.215 ວິນາທີ.
ເອັສປາຣກາໂຣ້ ຄວ້າແຊ້ມ ໂມໂຕຈີພີ ເປັນສະໜາມທຳອິດໃນປີນີ້ ແລະ ເປັນສະໜາມທີ 2 ໃນອາຊີບ ຕໍ່ຈາກລາຍການ ອາເຈນຕາຍ ກຣັງປຣີ ໃນປີຜ່ານມາ, ທີ 3 ສະໜາມນີ້ເປັນຂອງ ເບຣດ ໄບເດີ ຊາວອາຟຣິກາໃຕ້ ຈາກຄ້າຍ ເຄທີເອັມ ຕາມຫລັງ 0.680 ວິນາທີ, ຂະນະທີ່ ຟາບີໂອ ກົວຕາຣາໂຣ້ ແຊ້ມໂລກປີ 2021 ຊາວຝຣັ່ງ ຈາກຄ້າຍຢາມາຮ້າ ຈົບອັນດັບທີ 15 ແລະ ມາກ ມາເກັຊ ແຊ້ມໂລກ 6 ສະໄໝ ຊາວແອັສປາຍ ຈາກຄ້າຍຮອນດ້າ ແຂ່ງບໍ່ຈົບ ລົດມີບັນຫາໃນຮອບທີ 14. ສຳລັບຜູ້ຊະນະເລີດການ Sprint 10 ຮອບ ແມ່ນ: ອາເລັກ ມາຣເກັຊ, ທີ 2 ມາຣໂກ້ ເບັຊແຊັກຄີ້, ທີ 3 ມາເວຣິກ ວິນາເລັສ.
ສະຫລຸບຄະແນນນັກຂັບຜ່ານໄປ 9 ສະໜາມ ຜູ້ນຳຍັງຄົງເປັນ ຟຣານເຊັສໂກ້ ແບັກໄນອາ (ບານາຢ້າ) ແຊ້ມເກົ່າ ມີ 214 ຄະແນນ, ທີສອງແມ່ນ ຈໍເກ້ ມາຣຕິນ ມີ 173 ຄະແນນ, ທີສາມ ມາຣໂກ້ ເບັຊແຊັກຄີ້ ມີ 167 ຄະແນນ.
ທີມຜູ້ສ້າງ ຜູ້ນຳຍັງຄົງແມ່ນຄ້າຍດູຄາຕິ ມີ 317 ຄະແນນ, ທີສອງ ເຄທີເອັມ ມີ 172 ຄະແນນ, ທີສາມ ອາພຣີເລຍ ມີ 153 ຄະແນນ.
ສະໜາມຕໍ່ໄປ ສະໜາມທີ 10 ລາຍການ ອັອສຕ້ຽນ ກຣັງປຣີ ທີ່ສະໜາມ Red Bull Ring ເມືອງ Spielberg, ປະເທດອັອສເຕຣຍ (ໂອຕຣິດ) ຈະແຂ່ງຂັນວັນທີ 18-20 ສິງຫາ 2023.
