ຂົງເຂດໂຍທາທິການ ແລະ ຂົນສົ່ງ ນະຄອນຫລວງວຽງຈັນເລັ່ງເອົາໃຈໃສ່ແກ້ໄຂ

ທ່ານ ພູຂົງ ບັນນາວົງ ຮອງເຈົ້າຄອງນະຄອນຫລວງວຽງຈັນ ລາຍງານໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນນະຄອນຫລວງ ຊຸດທີ II, ວັນທີ 2 ສິງຫາ 2023 ຕໍ່ກັບວຽກງານຂົງເຂດໂຍທາທິການ ແລະ ຂົນສົ່ງ ທີ່ນະຄອນຫລວງວຽງຈັນ ຕ້ອງໄດ້ເລັ່ງເອົາໃຈໃສ່ແກ້ໄຂຄື:

1. ຕໍ່ກັບການກໍານົດຫລັກໝາຍທາງຮ່ອມ, ທາງຊອຍ ໃຫ້ມີການໄປ-ມາ ຂອງປະຊາຊົນ ໄດ້ສະດວກນັ້ນ, ຈະໄດ້ມອບໃຫ້ພະແນກໂຍທາທິການ ແລະ ຂົນສົ່ງ ໄດ້ເຮັດວຽກນໍາຫ້ອງການໂຍທາທິການ ແລະ ຂົນສົ່ງເມືອງ ເພື່ອກໍານົດຫລັກໝາຍ ຂອງ ທາງຮ່ອມ, ທາງຊອຍ ໃຫ້ໄດ້ມາດຕະຖານ.
2. ການກວມເຂດສະຫງວນ ຮ່ອງລະບາຍນໍ້າ, ໄດ້ເອົາໃຈໃສ່ຄຸ້ມຄອງກວດກາ, ເຊິ່ງໄດ້ມີໂຄງການໃຫຍ່ໆຈໍານວນຫນຶ່ງ ທີ່ໄດ້ກວມເອົາຮ່ອງລະບາຍນໍ້າ, ເຊິ່ງນະຄອນຫລວງໄດ້ມອບໃຫ້ໂຄງການເຫລົ່ານັ້ນ ເຊັນສັນຍາເຊົ່ານໍາເມືອງກ່ຽວຂ້ອງ ແລະ ໃຫ້ມີການເຮັດບົດບັນທຶກຮ່ວມກັບ ພາກລັດ ໃນການລວງຄອງ ແລະ ອະນາໄມ ເປັນແຕ່ລະປີ.
3. ສໍາລັບການແກ້ໄຂການເປ່ເພ ຂອງຖະໜົນຫົນທາງໃຫ້ມີການປັບປຸງ ໃນເວລາອັນຮີບດ່ວນ, ບໍ່ຄວນປະໄວ້ໃຫ້ເປັນຂຸມໃຫຍ່ ແລ້ວຈຶ່ງໄປເຮັດ, ຜ່ານມາ ໃນເວລາມີເສັ້ນທາງເປ່ເພ ແລະເປັນຂຸມນ້ອຍ ພວກເຮົາໄດ້ສະໜີໃຫ້ ບໍລິສັດ ມາສ້ອມແປງ ເເຕ່ບໍລິສັດກໍຕອບປະຕິເສດ ຍ້ອນເຫັນວ່າບໍ່ກຸ້ມກັບການນໍາໃຊ້ກົນຈັກ, ດັ່ງນັ້ນ ອົງການປົກຄອງ ຈຶ່ງໄດ້ຈັດການປະມູນການ ສ້ອມແປງຂຸມທີ່ເກີດຂຶ້ນ ຢູ່ເສັ້ນທາງທີ່ເປ່ເພ, ໃນໄລຍະຍາວ ແມ່ນເຮົາກໍາລັງປັບປຸງກອງ ສ້ອມແປງຂົວ-ທາງ ເຊິ່ງໃນຕໍ່ຫນ້າ ອາດຈະແມ່ນກອງດັ່ງກ່າວ ເປັນຜູ້ຈັດຕັ້ງປະຕິບັດ.
4. ການຕິດຕັ້ງປ້າຍແຈ້ງເຕືອນຜູ້ສັນຈອນ ໃນເວລາມີການກໍ່ສ້າງເສັ້ນທາງ ແມ່ນໄດ້ມີນິຕິກໍາ ກໍານົດໄວ້ແລ້ວ ວ່າທຸກໂຄງການກໍ່ສ້າງສ້ອມແປງຂົວ-ທາງ ຕ້ອງມີປ້າຍແຈ້ງເຕືອນຜູ້ສັນຈອນຮູ້, ຖ້າຜູ້ຮັບເໝົາຫາກບໍ່ປະຕິບັດ ກໍ່ຈະຕ້ອງໄດ້ໃຊ້ມາດຕະການທາງດ້ານກົດໝາຍ.