ດ່ານພາສີສາກົນພູເກືອ ຈະສູ້ຊົນຈັດເກັບລາຍຮັບເຂົ້າງົບປະມານ 84 ຕື້ກີບ ໃຫ້ໄດ້ຕາມແຜນ ຫລື ລື່ນແຜນການ
ທ່ານ ຄຳໃບ ຈັນທະລັງສີ ຮອງຫົວໜ້າດ່ານພາສີສາກົນພູເກືອ ເມືອງພູວົງ ແຂວງອັດຕະປື ໃຫ້ຮູ້ວ່າ: ໃນປີ 2023 ດ່ານພາສີສາກົນພູເກືອ, ໄດ້ຮັບຕົວເລກມອບໝາຍຈັດເກັບລາຍຮັບເຂົ້າງົບປະມານແຫ່ງລັດທັງໝົດ 84 ຕື້ກີບ, ແຕ່ຜ່ານການຈັດຕັ້ງປະຕິບັດຕົວຈິງໃນ 6 ເດືອນຕົ້ນປີ 2023 ສາມາດປະຕິບັດລາຍຮັບໄດ້ທັງໝົດ 32,32 ຕື້ກີບ ຫລື ເທົ່າກັບ 38,48% ຂອງແຜນການປີ, ທຽບໃສ່ແຜນການ 6 ເດືອນຕົ້ນປີເທົ່າ 62,06%; ສ່ວນລາຍຮັບຕົ້ນຕໍໄດ້ຈາກຄ່າຊັກພິເສດສົ່ງອອກ, ຈາກນ້ຳມັນເຊື້ອໄຟ, ນ້ຳມັນເຄື່ອງ, ພາຫະນະ, ສິ້ນສ່ວນອາໄລ່, ເຄື່ອງກໍ່ສ້າງ, ເຄື່ອງໃຊ້ໄຟຟ້າ, ເຄື່ອງອຸປະໂພກ-ບໍລິໂພກ, ສິນຄ້າອື່ນໆ, ຄ່າປັບໄໝ-ຂາຍ ເຄື່ອງຮິບ ແລະ ທຳນຽມຕ່າງໆ ແລະ ອື່ນໆ.
ເພື່ອໃຫ້ລາຍຮັບໝົດປີບັນລຸຕາມແຜນການ ຫລື ລື່ນແຜນການປີ, ຄະນະດ່ານພາສີສາກົນພູເກືອ, ໄດ້ວາງຫລາຍມາດຕະການ, ພ້ອມທັງປະສານສົມທົບຕາມສາຍຕັ້ງ, ສາຍຂວາງ ແລະ ອຳນາດການປົກຄອງທ້ອງຖິ່ນ, ປະສານງານກັບກົມພາສີ, ພາສີປະຈໍາແຂວງໂດຍສະເພາະແມ່ນດ້ານວິຊາສະເພາະທີ່ຕິດພັນກັບສິນຄ້ານຳເຂົ້າ-ອອກທີ່ໄດ້ຮັບບຸລິມະສິດໃນການຍົກເວັ້ນພາສີ-ອາກອນ, ການນໍາເຂົ້ານ້ຳມັນເຊື້ອໄຟ ແລະ ຂໍ້ມູນຜູ້ລະເມີດກົດໝາຍພາສີເປັນຕົ້ນແມ່ນລົດນຳເຂົ້າທ່ອງທ່ຽວຢ້ຽມຢາມທີ່ກາຍກຳນົດ ແລະ ບັນຫາອື່ນໆ.
ພ້ອມນີ້, ຈະໄດ້ລົງເລິກແຕ່ລະກຸ່ມວຽກ, ເຮັດໜ້າທີ່ສຶກສາອົບຮົມດ້ານແນວຄິດການເມືອງໄປພ້ອມໆກັບວຽກງານວິຊາສະເພາະ, ເພີ່ມທະວີຄວາມຮັບຜິດຊອບຕໍ່ວຽກງານວິຊາສະເພາະໃນແຕ່ລະໜ່ວຍງານໃຫ້ເຂັ້ມແຂງ ແລະ ຮັບປະກັນການບໍລິການດ້ວຍຄວາມວ່ອງໄວຖືກຕ້ອງ ແລະ ທ່ວງທັນເວລາ, ສູ້ຊົນຈັດເກັບລາຍຮັບໃຫ້ໄດ້ຕາມຄາດໝາຍທີ່ທາງການຈັດຕັ້ງມອບໝາຍໃຫ້ ແລະ ສືບຕໍ່ຈັດຕັ້ງປະຕິບັດມາດຕະການຈໍານວນໜຶ່ງເປັນຕົ້ນ: ເຂັ້ມງວດໃນການກວດກາສິນຄ້າ-ເຄື່ອງຂອງສົ່ງອອກ-ນໍາເຂົ້າໃຫ້ຖືກຕ້ອງຕາມລະບຽບກົດໝາຍ, ປະຕິບັດລະບຽບຕໍ່ຜູ້ລະເມີດຢ່າງເດັດຂາດ, ສ້າງແຜນເຮັດວຽກໃຫ້ແທດເໝາະກັບສະພາບຕົວຈິງ, ໃນການແບ່ງຄວາມຮັບຜິດຊອບໃຫ້ແຕ່ລະສະຫາຍ ໃນຄະນະດ່ານ, ແຕ່ລະກຸ່ມວຽກ, ໃຫ້ມີຄວາມຮັບຜິດຊອບຢ່າງຂາດຕົວ, ປະຕິບັດລະບອບລວມສູນປະຊາທິປະໄຕຕັດສິນວຽກງານເປັນໝູ່ຄະນະບຸກຄົນຮັບຜິດຊອບ, ປຸກລະດົມຂົນຂວາຍຜູ້ປະກອບການໃຫ້ມາເຄື່ອນໄຫວໃນການນຳເຂົ້າ-ສົ່ງອອກ, ສິນຄ້າເຄື່ອງຂອງຜ່ານດ່ານພາສີສາກົນພູເກືອໃຫ້ໄດ້ຫລາຍກວ່າເກົ່າ; ເຂັ້ມງວດການນຳເຂົ້າ, ວັດຖຸອຸປະກອນ, ນ້ຳມັນເຊື້ອໄຟ, ພາຫະນະນຳເຂົ້າດ້ວຍຮູບການຍົກເວັ້ນຂອງໂຄງການລົງທຶນເພື່ອໃຫ້ນຳໃຊ້ຖືກເປົ້າໝາຍ, ຕ້ານ ແລະ ສະກັດກັ້ນການລັກລອບໜີພາສີພາຍໃນດ່ານ ແລະ ນອກດ່ານຢ່າງຕັ້ງໜ້າໃຊ້ມາດຕະການຢ່າງເດັຂາດຕໍ່ຜູ້ລະເມີດລະບຽບກົດໝາຍ, ຂຸດຄົ້ນແຫລ່ງລາຍຮັບທີ່ບົ່ມຊ້ອນ ແລະ ປະສານສົມທົບຈຸດປະສານງານແຕ່ລະປ້ອມໃນການນຳເຂົ້າສຶນຄ້າເຄື່ອງຂອງວຽກຕົ້ນທາງ-ປາຍທາງຢ່າງປົກກະຕິຕໍ່ເນື່ອງ.
