ສ.ເກົາຫລີ ປະເຊີນກັບອາກາດຮ້ອນຢ່າງຮຸນແຮງ ເສຍຊີວິດ 20 ກວ່າຄົນ

ສຳນັກຂ່າວຕ່າງປະເທດ ລາຍງານຈາກ ນະຄອນຫລວງ ເຊອຸນ ຂອງ ສ.ເກົາຫລີ ເມື່ອວັນທີ 2 ສິງຫາ, ສຳນັກງານ ອຸຕຸນິຍົມ ວິທະຍາ ແຫ່ງ ສ.ເກົາຫລີ ລາຍງານວ່າ: ປັດຈຸບັນ, ສ.ເກົາຫລີ ພວມປະເຊີນກັບ ສະພາບ ອາກາດຮ້ອນ ຢ່າງຮຸນແຮງ ສົ່ງຜົນໃຫ້ມີ ຜູ້ເສຍຊີວິດ ຢ່າງໜ້ອຍ 23 ຄົນ ພ້ອມກັນນັ້ນ ຍັງປະກາດເຕືອນໄພ ຂັ້ນສູງສຸດ. ໃນຂະນະດຽວກັນ, ສຳນັກງານ ອຸຕຸນິຍົມ ວິທະຍາ ແຫ່ງຊາດ ຂອງ ສ.ເກົາຫລີ (ເຄເອັມເອ) ໄດ້ຍົກລະດັບ ການເຕືອນໄພ ສະພາບອາກາດຮ້ອນ ຢ່າງຮຸນແຮງ ພາຍໃນ ປະເທດ ເປັນລະດັບສີແດງ ຊຶ່ງເປັນ ລະດັບ ສູງສຸດ ຈາກທັງໝົດ 4 ລະດັບ, ນີ້ຖືເປັນຄັ້ງທຳອິດ ນັບແຕ່ ປີ 2019 ທີ່ ເຄເອັມເອ ໄດ້ຍົກລະດັບ ການເຕືອນໄພ ສະພາບອາກາດຮ້ອນ ຢ່າງຮຸນແຮງ.