ປີ 2023 ນະຄອນຫລວງວຽງຈັນ ຍັງມີໜີ້ສິນລວມທັງໝົດຫລາຍກ່ວາ 3.067 ຕື້ກີບ
ວັນທີ 1 ສິງຫາ 2023, ທ່ານ ນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນ ນະຄອນຫລວງວຽງຈັນ ໄດ້ຊີ້ແຈງກ່ຽວກັບການແກ້ໄຂໜີ້ສິນຂອງນະຄອນຫລວງວຽງຈັນ ຕໍ່ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນນະຄອນຫລວງວຽງຈັນ ຊຸດທີ II ວ່າ: ໃນປີ 2023 ນະຄອນຫລວງວຽງຈັນ ມີຈໍານວນໜີ້ສິນລວມທັງໝົດຫລາຍກ່ວາ 3.067 ຕື້ກີບ; ລວມມີໜີ້ສິນ ໂຄງການລົງທຶນຂອງລັດທັງໝົດ 276 ໂຄງການ ມູນຄ່າຄ້າງຊໍາລະຕາມໜ້າວຽກຫຼາຍກວ່າ 2.822 ຕື້ກີບ, ໜີ້ສິນບໍລິຫານ (ຄ່າໄຟຟ້າ-ນໍ້າປະປາ) ຫຼາຍກວ່າ 245ຕື້ກີບ. ສຳລັບໜີ້ສິນໂຄງການລົງທຶນຂອງລັດ ໄດ້ຂຶ້ນແຜນແກ້ໄຂ ແລະ ໄດ້ຮັບອະນຸມັດທຶນຊໍາລະໜີ້ສິນ ແລ້ວ 379 ຕື້ກ່ວາກີບ;ລວມມີ ທຶນຈາກແຜນການລົງທຶນຂອງລັດ ປະຈໍາປີ 2023 ຫຼາຍກວ່າ 46 ຕື້ກີບ, ເງິນເກີນແຜນ ປີ 2022 ເກືອບ 95 ຕື້ກີບ ແລະ ແຜນ ຊໍາລະໜີ້ສິນດ້ວຍຮູບແບບອວ່າຍໜີ້ສາມແຈຫຼາຍກວ່າ237 ຕື້ກີບ. ເຊິ່ງ 6 ເດືອນຕົ້ນປີ 2023 ປະຕິບັດ 112 ໂຄງການ ລວມເປັນທຶນ 261 ຕື້ກ່ວາກີບ, ຄາດວ່າໝົດປີຈະສາມາດຊໍາລະໜີ້ສິນໄດ້ຕາ ແຜນທີ່ໄດ້ຮັບອະນຸມັດ, ສ່ວນການແກ້ໄຂໜີ້ສິນບໍລິຫານແມ່ນໄດ້ຂຶ້ນແຜນຊໍາລະໜີ້ສິນ ຄ່າໄຟຟ້າ-ນໍ້າປະປາ ຈໍານວນ 3 ຕື້ກີບ, ຄາດຄະເນວ່າ ຈະສາມາດຈັດຕັ້ງປະຕິບັດ ໃຫ້ສໍາເລັດຕາມແຜນການທີ່ວາງໄວ້.
ສຳລັບທິດທາງການແກ້ໄຂໜີ້ສິນໂຄງການລົງທຶນຂອງລັດ ແມ່ນສືບຕໍ່ຂຶ້ນແຜນຊໍາລະໜີ້ສິນບໍ່ໃຫ້ຫລຸດ 50% ຂອງ ງົບປະມານທີ່ໄດ້ຮັບອະນຸມັດໃນແຕ່ລະປີ; ສະເໜີແກ້ໄຂໜີ້ສິນໂຄງການລົງທຶນຂອງລັດ ດ້ວຍຮູບແບບອວ່າຍໜີ້ 3 ແຈ ຕາມແຈ້ງການຂອງ ລັດຖະບານ ຈໍານວນ 59 ໂຄງການ ເປັນທຶນ 1.153 ຕື້ກວ່າກີບ; ຈະສືບຕໍ່ພະຍາຍາມຢຸດຢັ້ງ ບໍ່ໃຫ້ມີໜີ້ສິນໃໝ່ເພີ່ມຂຶ້ນຫລາຍກວ່າຄວາມສາມາດໃນການຊໍາລະ; ສະເໜີທາງລັດຖະບານຊ່ວຍພິຈາລະນາແກ້ໄຂໜີ້ສິນ ຄ່າຊົດເຊີຍຜູ້ທີ່ຖືກຜົນກະທົບຈາກໂຄງການ.
ການແກ້ໄຂໜີ້ສິນບໍລິຫານຄົ້ນຄ້ວາຈັດສັນງົບປະມານປະຈໍາປີ, ບ້ວງເງິນເກີນແຜນ ປີ 2022 ແລະ ລົງຊຸກຍູ້ບັນດາຂະແຫນງການທີ່ ມີລາຍຮັບວິຊາການ ເພື່ອຈັດສັນແບ່ງປັນເຂົ້າໃນວຽກງານແກ້ໄຂໜີ້ສິນ ຂັ້ນນະຄອນຫລວງວຽງຈັນ ໃຫ້ ຫລຸດລົງເທື່ອລະກ້າວ ແລະ ປະຕິບັດໃຫ້ສໍາເລັດທັງໝົດ; ນໍາສະ ເໜີກົມງົບປະມານ ກະຊວງການເງິນ ເພື່ອຄົ້ນຄ້ວາພິຈາລະນາຊ່ວຍແກ້ໄຂບັນດາໜີ້ສິນບໍລິຫານລັດ ຂອງນະຄອນຫລວງວຽງຈັນ ໂດຍສະເພາະໜີ້ສິນຄ່າໄຟຟ້າພາກຊົນລະປະທານ ແລະ ໄຟເຍືອງທາງ ທີ່ເຫັນ ວ່າມີຕົວເລກໜີ້ຄ້າງຊໍາລະເປັນມູນຄ່າທີ່ສູງ; ໄດ້ຄົ້ນຄ້ວາແຜນງົບປະມານຂອງລັດ ປີ 2023 ເພື່ອຊໍາລະໜີ້ຄ່າໄຟຟ້າ ແລະ ນໍ້າປະປາທັງໝົດເກືອບ 27 ຕື້ກີບ; ໃນນີ້ ຄ່າໄຟຟ້າ 23 ຕື້ກວ່າກີບ ແລະ ຄ່ານ້ຳປະປາຫຼາຍກວ່າ 2 ຕື້ກີບ.
