ພາຍຸໄຕ້ຝຸ່ນ khanun ເຄື່ອນທີ່ເຂົ້າໃກ້ໂອກິນາວາ ມີຜູ້ເສຍຊີວິດແລ້ວ 1 ຄົນ
ອິດທິພົນພາຍຸໄຕ້ຝຸ່ນ khanun ທີ່ຄ່ອຍໆເຄື່ອນທີ່ເຂົ້າໃກ້ເກາະໂອກິນາວາ ທາງຕາເວັນຕົກສຽງໃຕ້ຂອງຍີ່ປຸ່ນໃນວັນທີ 2 ສິງຫາ ສົ່ງຜົນເຮັດໃຫ້ເກີດຝົນຕົກ ແລະ ລົມແຮງ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 1 ຄົນ ເນື່ອງຈາກຖືກຄອກລົດພັງລົງທັບ ແລະ ມີຜູ້ບາດເຈັບ 11 ຄົນ. ຂະນະທີ່ເກີດໄຟຟ້າດັບກະທົບບ້ານເຮືອນຫລາຍກວ່າ 2 ແສນຄອບຄົວ.
ເບື້ອງຕົ້ນ ກົມອຸຕຸນິຍົມວິທະຍາຍີ່ປຸ່ນ (JMA) ໄດ້ປະກາດແນະນຳປະຊາຊົນຢູ່ແຂວງໂອກິນາວາເກືອບ 7 ແສນຄົນໃຫ້ອົບພະຍົບ.
ຂະນະທີ່ກະແສລົມພັດແຮງ ເຊິ່ງບາງພື້ນທີ່ມີຄວາມໄວເກືອບ 200 ກິໂລແມັດຕໍ່ຊົ່ວໂມງ ເຮັດໃຫ້ລົດຫລາຍຄັນພິກຂວ້ຳ ແລະ ເກີດຝົນຕົກໜັກ ໂດຍມີປະລິມານນ້ຳຝົນໃນໄລຍະ 24 ຊົ່ວໂມງຜ່ານມາຫລາຍກວ່າ 250 ມິນລີແມັດ.
ຢູ່ເມືອງນາຮະ ເມືອງເອກຂອງແຂວງໂອກິນາວາ ພົບວ່າສະໜາມບິນປິດໃຫ້ບໍລິການຕໍ່ເນື່ອງນັບແຕ່ວັນທີ 1 ສິງຫາ ໂດຍມີຖ້ຽວບິນທັງຂາເຂົ້າ ແລະ ຂາອອກຍົກເລີກແລ້ວ 951 ຖ້ຽວ ແລະ ຄາດວ່າຈະຍົກເລີກຖ້ຽວບິນເພີ່ມອີກໃນວັນທີ 3 ສິງຫານີ້.
ພາຍຸໄຕ້ຝຸ່ນ khanun ຖືເປັນພາຍຸຫົວທີ 3 ທີ່ພັດເຂົ້າທະວີບອາຊີຕໍ່ຈາກພາຍຸໄຕ້ຝຸ່ນ talim ແລະ doksuri ເຊິ່ງມີຄວາມແຮງລະດັບຊຸບເປີໄຕ້ຝຸ່ນ ແລະ ເຮັດໃຫ້ມີຜູ້ເສຍຊີວິດຢູ່ຟີລິບປິນ ແລະ ໄຕ້ຫວັນຫລາຍກວ່າ 30 ຄົນ ໃນໄລຍະ 2-3 ອາທິດຜ່ານມາ.
ຂະນະທີ່ຄາດວ່າພາຍຸໄຕ້ຝຸ່ນ khanun ຈະພັດຂຶ້ນຝັ່ງທາງຕາເວັນອອກສຽງເໜືອຂອງຈີນໃນວັນທີ 2 ສິງຫານີ້, ແຕ່ຍັງມີທ່າອ່ຽງເຄື່ອນທີ່ເຂົ້າຫາແຜ່ນດິນຫລັກຂອງຍີ່ປຸ່ນ ໂດຍອາດບໍ່ພັດເຂົ້າຊາຍຝັ່ງຈີນ.
ອ້າງອີງ:
- https://www.reuters.com/world/asia-pacific/typhoon-khanun-knocks-out-power-one-third-okinawa-households-2023-08-02/
- https://www.bbc.com/news/world-asia-66357396
