ຍີ່ປຸ່ນປະກາດເຕືອນໄພ ຮັບມືກັບພາຍຸໄຕ້ຝຸ່ນ khanun ຕ້ອງຍົກເລີກຖ້ຽວບິນຫລາຍກວ່າ 500 ຖ້ຽວ

ສຳນັກຂ່າວຕ່າງປະເທດລາຍງານຈາກນະຄອນຫລວງໂຕກຽວ ປະເທດຍີ່ປຸ່ນ: ວັນທີ 1 ສິງຫາ 2023 , ສຳນັກງານອຸຕຸນິຍົມວິທະຍາແຫ່ງຊາດຍີ່ປຸ່ນລາຍງານວ່າ: ລົມພາຍຸໄຕ້ຝຸ່ນ khanun ເຄື່ອນຕົວດ້ວຍຄວາມໄວສູງສຸດໃກ້ສູນກາງ 180 ກິໂລແມັດຕໍ່ຊົ່ວໂມງ ຢູ່ຫ່າງຈາກເມືອງ ນາຮາ ແຂວງໂອກິນາວາ ທາງຕາເວັນອອກສຽງໃຕ້ປະມານ 170 ກິໂລແມັດ.
ສູນກາງຂອງລົມພາຍຸຫົວນີ້ຈະເຄື່ອນຕົວຜ່ານ ແຂວງໂອກິນາວາ ແລະ ຈະເຄື່ອນໄປຍັງພາກຕາເວັນອອກຂອງຈີນ, ຂະນະທີ່ ທາງການຂອງຍີ່ປຸ່ນ ໄດ້ແຈ້ງໃຫ້ປະຊາຊົນຫລາຍກວ່າ 760.000 ຄົນ, ອົບພະຍົບໄປຍັງສູນທີ່ທາງການຈັດໃຫ້ ແລະເຕືອນວ່າ ຄວາມຮຸນແຮງຂອງພາຍຸ ອາດສົ່ງຜົນໃຫ້ເກີດຄື່ນທະເລ ສູງເຖິງ 12 ແມັດ ພັດເຂົ້າຝັ່ງ ແລະ ຝົນຕົກໜັກ ເຊິ່ງສ່ຽງຕໍ່ການເກີດນ້ຳຖ້ວມກະທັນຫັນເປັນບໍລິເວນກວ້າງ, ນອກນັ້ນຍັງໄດ້ຍົກເລີກຖ້ຽວບິນຫລຍກວ່າ 500 ຖ້ຽວ ມີຜຸ້ໂດຍສານໄດ້ຮັບຜົນກະທົບຫລາຍກວ່າ 74.000 ຄົນ.