ເປແອສເຊ ເສຍສອງນັດຕິດຖືກ ອິນເຕີ ແຊງຊະນະທ້າຍເກມ ນັດອຸ່ນເຄື່ອງທີ່ຍີ່ປຸ່ນ

ປາຣີ ແຊັງ-ແຊັກແມັງ ຂອງນາຍໃຫຍ່ຄົນໃໝ່ຂອງ ຫລຸຍ ເອນຣິເກ້ ປະສົບຄວາມພ່າຍແພ້ 2 ນັດຕິດຕໍ່ກັນໃນນັດອຸ່ນເຄື່ອງ ຫລັງຖືກ ອິນເຕີ ມິລານ ພິກຊະນະໃນທ້າຍເກມທີ່ປະເທດຍີ່​ປຸ່ນ.

ການແຂ່ງຂັນບານເຕະມິດຕະພາບໃນວັນອັງຄານທີ 1 ສິງຫາ 2023 ທີ່ສະໜາມກິລາແຫ່ງຊາດ ນະຄອນຫລວງໂຕກຽວ ປະເທດຍີ່ປຸ່ນ ລະຫວ່າງ ປາຣີ ແຊັງ-ແຊັກແມັງ ກັບ ອິນເຕີ ມິລານ, ໃນເກມນີ້ ເປແອສເຊ ຂອງ ຫລຸຍ ເອັນຣິເກ ສົ່ງຕົວຫລັກຂອງ PSG ລົງເກືອບຍົກທີມນຳໂດຍ ກອງກາງຄົນໃໝ່ ມານູເອລ ອູກາເຕ້ ສ່ວນແນວບຸກໃຊ້ ມາໂກ ອາເຊນຊິໂອ ປະສານງານກັບ ຄາລວາ ໂຊເລີ ແລະ ນັກເຕະໜຸ່ມ ຊີເຣ ເອເມຣີ ຂະນະທີ່ ເນມາ ນັ່ງເປັນຕົວສຳຮອງ.

ດ້ານ ອິນເຕີ ມິລານ ຂອງ ຊິມີໂອເນ້ ອິນຊາກີ້ ໃຊ້ຕົວຫລັກເຊັ່ນກັນ ໂດຍສົ່ງ ມາກັສ ທູຣາມ ກອງໜ້າຄົນໃໝ່ໄປຈັບຄູ່ກັບ ລໍຕາໂຣ ມາຕິເນສ.

ເຄິ່ງເວລາທໍາອິດເປີດເກມເປັນ ເປແອສເຊ ທີ່ຄອງບານພັບສະໜາມບຸກຫລາຍກວ່າ ແລະ ເກືອບໄດ້ປະຕູຂຶ້ນນໍາໃນນາທີ 13, ມາໂກ ອາເຊນຊິໂອ ຫລຸດມາຍິງຈໍໆໃນເຂດໂທດແລະສົ່ງບານໄປຕຳເສົາ.

ໃນຂະນະທີ່ ອິນເຕີ ມິລານ ຕອບໂຕ້ມາເປັນໄລຍະ ແລະ ໃກ້ຄຽງທີ່ຈະໄດ້ປະຕູຈາກການຍິງຂອງ Hakan Calhanoglu ຈາກການຫລິ້ນສັ້ນທີ່ຟຣີຄິກ.

ໃນນາທີ 57 ເປແອສເຊ ເກືອບໄດ້ປະຕູຂຶ້ນນຳຈາກ ວິຕິນຢ້າ ລາກບານໄປກົດດ້ວຍຂວາໜ້າກ່ອງ ສົ່ງບານໄປໄກຈາກເສົາໄປເລັກນ້ອຍ.

ມາເຖິງນາທີ 64 ເປແອສເຊ ປົດລັອກ ຂຶ້ນນຳເປັນ 1-0 ວິຕິນຢ້າ ຕັ້ງປ້ອມ, ກົດດ້ວຍຂວານອກກອບ ສົ່ງບານໄປເສົາໄກເຂົ້າໄປຢ່າງສວຍງາມ.

ຢ່າງໃດກໍ່ຕາມ, ນາທີໆ 81 ອິນເຕີ ໄລ່ຕີສະເໝີ 1-1, ເຊບາສເຕຍໂນ ເອັສໂປຊິໂຕ ຫລຸດມາຍິງດ້ວຍຂວາ.

ຍັງບໍ່ພໍ, ໃນນາທີ 83 “ງູໃຫຍ່” ໄລ່ຕີສະເໝີ 2-1 ໂດຍການຍິງເຂົ້າເຂດໂທດຂອງ ສະເຕຟາໂນ້ ເຊັນຊີ.

ຊ່ວງເວລາເຫລືອບໍ່ມີປະຕູເພີ່ມອີກ, ຈົບເກມ ອິນເຕີ ມິລານ ຊະນະ ເປແອສເຊ 2-1.