ແຂວງຄຳມ່ວນ ເຕືອນລະດັບນ້ຳຫີນບູນ ແລະ ນໍ້າປະກັນ ຂຶ້ນກາຍເຂດເຕືອນໄພແລ້ວ ປະຊາຊົນຢູ່ລຽບແຄມນ້ຳລະວັງສະພາບນ້ຳຖ້ວມອັ່ງ

ວັນທີ 1 ສິງຫາ 2023 ຜ່ານມາ, ພະແນກ ຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຄໍາມ່ວນ ແຈ້ງເຕືອນຝົນຕົກໜັກ ແລະ ນໍ້າຖ້ວມ, ເລກທີ 037/ຂສນອ ເນື່ອງຈາກວ່າໄດ້ມີຝົນຕົກຕິດຕໍ່ກັນຫຼາຍວັນ ຢູ່ເຂດແຂວງພາກກາງ ລົງຫາ ພາກໃຕ້, ຊຶ່ງຮັດໃຫ້ແມ່ນໍ້າສາຂາໄດ້ເພີ່ມຂຶ້ນ ຢ່າງວ່ອງໄວ. ໂດຍສະເພາະແມ່ນລະດັບນໍ້າຢູ່ສະຖານີວັດແທກ ບ້ານ ທ່າແຄນ (ນໍ້າປະກັນ) ນໍ້າໄດ້ຂຶ້ນກາຍເຂດເຕືອນໄພແລ້ວ, ເຂດເຕືອນໄພ ແມ່ນ 10.00ແມັດ, ເຂດອັນຕະລາຍແມ່ນ 11.00 ແມັດ ແລະ ນໍ້າຫີນບູນ ເຂດເຕືອນໄພ ແມ່ນ 9.00 ແມັດ, ເຂດອັນຕະລາຍແມ່ນ 10.00ແມັດ. ແລະ ຍັງຈະມີຝົນຕົກໃນລະດັບປານກາງ ຫາ ຕົກໜັກ ຢູ່ທ້ອງຖິ່ນແຂວງ ພາກກາງ ແລະ ພາກໃຕ້ຕື່ມອີກ.

ດັ່ງນັ້ນ, ຈຶ່ງແຈ້ງເຕືອນເຖິງອໍານາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ ໃນແຂວງຄໍາມ່ວນ ເປັນຕົ້ນ: ໂດຍສະເພາະຜູ້ທີ່ອາໄສຢູ່ລຽບຕາມຮ່ອມພູ, ເຂດທີ່ມີຄວາມສ່ຽງໄພ, ເຂດຍອດນໍ້າ, ເຂດທີ່ຢູ່ອາໄສຕາມລຽບຕີນພູ ຫຼື ເຂດທີ່ມີຄວາມສ່ຽງເກີດນໍ້າຖ້ວມ ອ່າງຮັບນໍ້າເຊບັ້ງໄຟ, ອ່າງຮັບນໍ້າຫີນບູນ ແລະ ແມ່ນໍ້າສາຂາອື່ນໆ ໃຫ້ມີສະຕິລະວັງຕໍ່ສະພາບ ຝົນຕົກໜັກ ທີ່ຈະເຮັດໃຫ້ມີນໍ້າຖ້ວມອັ່ງ ແລະ ນໍ້າຖ້ວມຊູ ທີ່ຈະເກີດຂື້ນໃນໄລຍະ 1-2 ວັນຂ້າງໜ້ານີ້, ພ້ອມນີ້ກໍຂໍໃຫ້ຕິດຕາມ ຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.