ຮ່ວມກັນປະຕິບັດຕາມຫຼັກການ 5 ປ ຈຶ່ງຈະ ສາມາດຕັດວົງຈອນຂອງພະຍາດໄຂ້ຍຸງລາຍໄດ້
ໄລຍະນີ້, ປະເທດເຮົາຍັງຢູ່ໃນໄລຍະລະດູຝົນ ແລະຝົນຈະແກ່ຍາວໄປຈົນຮອດເດືອນພະຈິກ ຈຶ່ງຈະຜ່ານພົ້ນໄປ ແລະ ໄລຍະນີ້ ມັນຊ່າງ ສ້າງຄວາມເໝາະສົມແກ່ ການແພ່ລະບາດຂອງພະຍາດຕາມລະດູການ ໂດຍສະເພາະ ແມ່ນພະຍາດໄຂ້ຍຸງລາຍ ຫຼື ໄຂ້ເລືອດອອກ ແລະ ເຮົາຈະເຫັນວ່າ ຢູ່ຕາມໂຮງໝໍແຫ່ງຕ່າງໆທົ່ວປະເທດ ທັງສູນກາງ ແລະ ທ້ອງຖິ່ນ ທັງໂຮງໝໍໃຫຍ່, ໂຮງໝໍນ້ອຍ, ໂຮງໝໍຊຸມຊົນ ຫຼື ສຸກສາລາ ປະຈຳບ້ານ, ປະຈຳເຂດ, ມີຄົນເຈັບ ທັງເດັກນ້ອຍ ແລະ ຜູ້ໃຫຍ່ ເຂົ້ານອນປິ່ນປົວສຸຂະພາບເປັນຈຳນວນຫຼາຍ ໃນນັ້ນບໍ່ອາດປະຕິເສດໄດ້ວ່າ ຈຳນວນບໍ່ໜ້ອຍຂອງຄົນເຈັບແມ່ນ ຕິດເຊື້ອພະຍາດໄຂ້ຍຸງລາຍ.
ຕາມຂໍ້ມູນຕົວເລກຈາກ ສູນສະຖິຕິ ແລະ ຂ່າວສານ ສາທາລະນະສຸກ ກະຊວງສາທາສຸກແຈ້ງວ່າ: ແຕ່ຕົ້ນປີ 2023 ມາຮອດວັນທີ 31 ເດືອນກໍລະກົດ 2023 ທຸກແຂວງທົ່ວປະເທດ ມີຜູ້ຕິດເຊື້ອພະຍາດໄຂ້ເລືອດອອກ ສະສົມທັງໝົດແລ້ວ ຫຼາຍກວ່າ 16.350 ຄົນ, ຕິດເຊື້ອໃໝ່ 287 ຄົນ, ຫຼາຍກວ່າໝູ່ແມ່ນຢູ່ແຂວງ ອຸດົມໄຊ 3.026 ຄົນ, ຄຳມ່ວນມີເຖິງ 2.487 ຄົນ, ໄຊຍະບູລີ 1.495ຄົນ, ນະຄອນຫຼວງວຽງຈັນ 1.492 ຄົນ, ຫຼວງພະບາງ 1.490 ຄົນ, ສະຫວັນນະເຂດ 1.462 ຄົນ, ວຽງຈັນ 1.030ຄົນ ແລະ ແຂວງອື່ນຕາມລຳດັບ, ໃນນີ້ມີຄົນເສຍຊີວິດເຖິງ 8 ຄົນ, ໃນນີ້ ຢູ່ແຂວງບໍລິຄຳໄຊ 4 ຄົນ, ນະຄອນຫຼວງວຽງຈັນ ຄຳມ່ວນ ສະຫວັນນະເຂດ ແລະ ແຂວງອັດຕະປື ແຂວງລະ 1 ຄົນ.
ນີ້ພຽງແຕ່ ເຈັດເດືອນຂອງປີ 2023 ຕົວເລກຜູ້ຕິດເຊື້ອພະຍາດໄຂ້ເລືອດອອກ ມີສູງເຖິງ 16.350 ກວ່າ ຄົນແລ້ວ ແລະ ໃນຕໍ່ໜ້ານີ້ເຊື່ອວ່າພະຍາດນີ້ຍັງຈະມີຄົນຕິດເຊື້ອເພີ່ມຫຼາຍຂຶ້ນອີກ ເນື່ອງຈາກຍັງຢູ່ໄລຍະລະດູຝົນ ແລະ ຈະມີຝົນຕົກຫຼາຍ ມີນ້ຳຫົ້ງນ້ຳຂັງຕາມບວກໜອງ ຕາມພາຊະນະຕ່າງໆເຊັ່ນ: ຕີນລົດເກົ່າ, ກະໂປ໊ະ ກະປ໋ອງ, ປ່າທີ່ຮົກເຮື້ອອ້ອມ ເຮືອນຊານ ຊຶ່ງເປັນບ່ອນເໝາະສົມທີ່ສຸດສຳລັບການເພາະພັນຂອງຍຸງລາຍ,
ໄຂ້ເລືອດອອກ ເກີດມາຈາກຍຸງລາຍເປັນຕົວການນຳເອົາເຊື້ອພະຍາດມາສູ່ຄົນ, ຜູ້ທີ່ເປັນໄຂ້ເລືອດອອກ ຫຼື ໄຂ້ຍຸງລາຍຈະມີອາການ ໄຂ້ຂຶ້ນສູງໃນໄລຍະ 2-3 ມື້, ເຈັບຫົວ, ປວດເບົ້າຕາ, ປວດກ້າມຊີ້ນ, ປວດຕາມຂໍ້ກະດູກ, ປວດຮາກ, ມີຜື່ນແດງຕາມຜິວໜັງ, ມີເລືອດຊຶມອອກຕາມຮູຂຸມຂົນ, ຖ້າຮ້າຍແຮງຈະເກີດອາການຊ໊ອກ ແລະ ຫາກທ່ານ ຫຼື ຄົນໃນຄອບຄົວຮູ້ສຶກບໍ່ສະບາຍເປັນໄຂ້ບໍ່ໃຫ້ຖືເບົາ ໃຫ້ຮີບຮ້ອນໄປພົບແພດໝໍ ທີ່ຢູ່ຕາມໂຮງໝໍ ຫຼື ສຸກສາລາທີ່ຢູ່ໃກ້ທີ່ສຸດໂດຍດ່ວນ ເພື່ອແພດໝໍຈະໄດ້ບົ່ງມະຕິພະບາດແລ້ວຫາວິທີປິ່ນປົວທີ່ຖືກຕ້ອງທັນເວລາ ແລະ ບໍ່ຄວນຊື້ຢາມາກິນເອງຢ່າງເດັດຂາດ,
ເພື່ອຈຳກັດ ພະຍາດໄຂ້ເລືອດອອກບໍ່ໃຫ້ແພ່ລະບາດເປັນວົງກວ້າງໄປກວ່ານີ້ ຮຽກຮ້ອງໃຫ້ທຸກຄົນເປັນເຈົ້າການຕ້ານ ແລະສະກັດກັ້ນ ດ້ວຍການຮັກສາອະນາໄມ, ໝັ່ນທຳຄວາມສະອາດທາງໃນ ແລະ ນອກເຮືອນຊານສະຖານທີ່ບ່ອນຢູ່ອາໄສເລື້ອຍໆ, ເປັນປະຈຳ ທຳລາຍກະໂປ໊ະ, ກະປ໋ອງ, ຢາງຕີນລົດເກົ່າ ຫຼື ບ່ອນທີ່ມີນ້ຳຂັງ, ຖາກຖາງຫຍ້າ, ຕັດຮອນຕົ້ນໄມ້ທີ່ຮົກເຮື້ອອອກໃຫ້ເປີດແປນ ເພື່ອກຳຈັດແຫຼ່ງເພາະພັນຂອງ ຍຸງລາຍ ແລະ ໜອນນ້ຳຍຸງລາຍ, ນອນໃນມຸ້ງ ,ປ້ອງກັນບໍ່ໃກ້ຍຸງກັດ ຫາກຈຳເປັນພາກສ່ວນກ່ຽວຂ້ອງຄວນໄດ້ແຈກຢາຍຢາຂ້າໜອນນ້ຳ ຫຼື ພົ່ນຢາຂ້າຍຸງໂຕແກ່.
ສິ່ງສຳຄັນແມ່ນທຸກຄົນຕ້ອງປະຕິບັດຫຼັກການ 5 ປ ຄື: ປົກປິດພາຊະນະທີ່ບັນຈຸນ້ຳກິນນ້ຳໃຊ້, ປ່ຽນຖ່າຍນ້ຳໃນພາຊະນະຕ່າງໆ(ນ້ຳໃນເຕົ້າດອກໄມ້, ຖ້ານຮອງຕີນຕູ້……….); ປັບປຸງສະຖານທີ່ຢູ່ອາໄສໃຫ້ສະອາດຢູ່ສະເໝີ; ປ່ອຍປາຫາງນົກຍຸງເພື່ອກິນໜອນນ້ຳຍຸງລາຍ ແລະ ປະຕິບັດໃຫ້ເປັນນິໄສປະຈຳຕົວໃນທຸກໆອາທິດ ເພື່ອຕັດວົງຈອນການຂະຫຍາຍຕົວຂອງຍຸງລາຍ ຖ້າບໍ່ມີໜອນນ້ຳຍຸງລາຍກໍຈະບໍ່ມີໄຂ້ເລືອດອອກ.
