ເອຢິບ ປະກາດໃຊ້ມາດຕະການປະຢັດໄຟຟ້າ ເພື່ອຮັບມືກັບສະພາບອາກາດຮ້ອນ

ຂ່າວຕ່າງປະເທດລາຍງານ ໃນວັນທີ 31 ກໍລະກົດ ຜ່ານມາ, ທ່ານ ມອສຕາຟາ ແມກບູລີ ນາຍົກລັດຖະມົນຕີ ເອຢິບ ໄດ້ປະກາດມາດຕະການຫຼາຍຢ່າງລວມເຖິງແຜນການຕັດກະແສໄຟຟ້າ ເພື່ອຫລຸດການໃຊ້ພະລັງງານ ເນື່ອງ ປະເຊີນກັບຄື້ນຄວາມຮ້ອນຮຸນແຮງ.
ທ່ານ ມອສຕາຟາ ແມກບູລີ ກ່າວວ່າ: ໄດ້ອະນຸຍາດໃຫ້ ພະນັກງານ-ລັດຖະກອນ ເຮັດວຽກຢູ່ເຮືອນ 1 ມື້ ຕໍ່ອາທິດ ເພື່ອຫຼຸດຜ່ອນພາລະຂອງເຄືອຂ່າຍໄຟຟ້າທ້ອງຖິ່ນ ຍ້ອນອຸນຫະພູມຄວາມຮ້ອນສູງເກີນ 45 ອົງສາໃນຫລາຍພື້ນທີ່ຂອງປະເທດ. ນອກຈາກນີ້, ທ່ານຍັງໄດ້ກ່າວຢືນຢັນວ່າ: ແຜນການຕັດໄຟຟ້າທີ່ລັດຖະບານປະກາດໃຊ້ໃນອາທິດຜ່ານມາ ແມ່ນຍັງຈະດຳເນີນຕໍ່ໄປ ພ້ອມທັງເຕືອນບໍ່ໃຫ້ປະຊາຊົນໃຊ້ ລິບ ໃນບາງເວລາ, ການຕັດກະແສໄຟຟ້າຈະໃຊ້ເວລາປະມານ 1 ຫຼື 2 ຊົ່ວໂມງຕໍ່ມື້ ເມື່ອການໃຊ້ພະລັງງານເພີ່ມຂຶ້ນ.
ທ່ານ ມອສຕາຟາ ແມກບູລີ ຍັງໄດ້ໄດ້ອອກຄຳສັ່ງໃຫ້ເຈົ້າໜ້າທີ່ຂອງລັດ ທີ່ບໍ່ໄດ້ຕິດຕໍ່ກັບປະຊາຊົນໂດຍກົງ ນັ້ນໃຫ້ເລີ່ມເຮັດວຽກທາງໄກທຸກວັນອາທິດເປັນເວລາ 1 ເດືອນ ເລີ່ມຕັ້ງແຕ່ວັນທີ 6 ສິງຫານີ້ເປັນຕົ້ນໄປ ພ້ອມທັງຮຽກຮ້ອງໃຫ້ພາກເອກະຊົນໃຊ້ມາດຕະການທີ່ຄ້າຍຄືກັນອີກດ້ວຍ.