ພາຍຸ Doksuri ພັດຖະຫລົ່ມພາກເໜືອຂອງຈີນ ເສຍຊີວິດຢ່າງໜ້ອຍ 11 ຄົນ ອົບພະຍົບປະຊາຊົນ ກວ່າ 31,000 ຄົນ

ອີງຕາມສຳນັກຂ່າວຕ່າງປະເທດລາຍງານໃນວັນທີ 1 ສິງຫາ 2023, ຈີນກຳລັງປະເຊີນກັບ ລົມພາຍຸ ທົກຊູລີ ເຊິ່ງເປັນລົມພາຍຸທີ່ຮຸນແຮງທີ່ສຸດໃນຮອບຫຼາຍປີ ເຮັດໃຫ້ມີຝົນຕົກໜັກ ແລະ ນ້ຳຖ້ວມເປັນວົງກວ້າງໃນພາກເໜືອ ລວມເຖິງນະຄອນຫຼວງປັກກິ່ງ, ຈາກເຫດການຄັ້ງນີ້ ມີຄົນເສຍຊີວິດຢ່າງໜ້ອຍ 11 ຄົນ, ສູນຫາຍ ຢ່າງໜ້ອຍ 27 ຄົນ ແລະ ປະຊາຊົນຫຼາຍກວ່າ 31,000 ຄົນຕ້ອງອົບພະຍົບອອກຈາກພື້ນທີ່ດັ່ງກ່າວ. ສ່ວນທາງພາກໃຕ້ຂອງນະຄອນຫຼວງປັກກິ່ງ ທະຫານຫຼາຍກວ່າ 2.000 ຄົນ ໄດ້ເຂົ້າເພື່ອຊ່ວຍເຫຼືອໂດຍທັນທີ.

ລົມພາຍຸ ທົກຊູລີ  ໄດ້ພັດເຂົ້າ ແຂວງຟູຈ້ຽນ ເມື່ອວັນທີ 28 ກໍລະກົດ 2023 ທີ່ຜ່ານມາ, ມີຝົນຕົກແຕ່ ຄືນວັນເສົາຈົນຮອດຕອນສວຍຂອງວັນຈັນ ເຊິ່ງປະລິມານນ້ຳຝົນສະເລ່ຍ ເກືອບ 171 ມມ, ທຽບກັບຄ່າສະເລ່ຍຝົນຕົກຕະຫຼອດທັງເດືອນກໍລະກົດ ເຮັດໃຫ້ຫຼາຍເມືອງໃນພາກເໜືອຂອງຈີນໄດ້ຮັບຜົນກະທົບ ແລະ ຄາດວ່າຝົນຈະຕົກຍາວອອກໄປອີກ 24 ຊົ່ວໂມງ.