ຄາວານີ້ ຍົກເລີກສັນຍາ ບາເລນເຊຍ ກຽມຍ້າຍໄປຮ່ວມ ໂບຄາ ຈູເນ່ຍ

ເອດິນສັນ ຄາວານີ້ ກອງໜ້າຈອມເກົ໋າ ຕົກລົງຍົກເລີກສັນຍາກັບ ບາເລນເຊຍ ໂດຍການຍິນຍອມຂອງທັງສອງຝ່າຍຢ່າງເປັນທາງການ.

ເອດິນສັນ ຄາວານີ້ ຍ້າຍຈາກ ແມນເຊັສເຕີ ຢູໄນເຕັດ ເຂົ້າຮ່ວມ ບາເລນເຊຍ ແບບບໍ່ມີຄ່າຕົວໃນລະດູຮ້ອນປີ 2022 ແລະ ຍິງໄດ້ 5 ປະຕູ ໃນການລົງຫລິ້ນ 25 ນັດ ໃນ ລາລິກາ ລະດູການທີ່ຜ່ານມາ.

ເຖິງວ່າຍັງເຫລືອສັນຍາຈົນຮອດຊ່ວງຊ້ຳເມີປີ 2024 ແຕ່ທັງສອງຝ່າຍຕົກລົງຍົກເລີກສັນຍາກ່ອນກຳນົດ ໂດຍ ຄາວານີ້ ໄດ້ບັນລຸຂໍ້ຕົກລົງໄປຮ່ວມທີມ ໂບຄາ ຈູເນ່ຍ ໃນກ່ອນນີ້ ແລະ ກຽມເຊັນສັນຍາຮອດເດືອນທັນວາປີ 2024.