ແຂວງຄໍາມ່ວນ ກວດກາພົບເຫັນມູນຄ່າເສຍຫາຍທີ່ຕ້ອງຫັກລົບອອກຈາກສັນຍາ ແລະ ສາລະບານງົບປະມານ 79 ໂຄງການ ຫລາຍກວ່າ 264,73 ຕື້ກີບ
ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ທ່ານ ສີສຸກ ພິມມະສອນ ຮອງປະທານຄະນະກວດກາພັກແຂວງຄຳມ່ວນ ລາຍງານຕໍ່ກອງປະຊຸມຜັນຂະຫຍາຍເນື້ອໃນ ກອງປະຊຸມວຽກງານກວດກາທົ່ວປະເທດ ແລະ ສະຫລຸບການ ເຄື່ອນໄຫວວຽກງານກວດກາຂອງແຂວງຄຳມ່ວນປະຈຳປີ 2022 ຫາ 6 ເດືອນຕົ້ນປີ 2023 ໃນວັນທີ 27 ກໍລະກົດ 2023 ຜ່ານມາ.
ໃນໄລຍະ 1 ປີເຄິ່ງຜ່ານມາຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນ ໄດ້ເອົາໃຈໃສ່ຢ່າງຕັ້ງໜ້າ ຕໍ່ວຽກງານຕິດຕາມ-ກວດກາ ພາຍໃນພັກ, ກວດກາການຄຸ້ມຄອງບໍລິຫານລັດ, ການສະກັດກັ້ນ-ຕ້ານການສໍ້ລາດບັງຫລວງ, ກວດກາຕາມຄຳສັ່ງ ແລະ ກວດກາຕາມຜົນການກວດສອບ, ອັນພົ້ນເດັ່ນແມ່ນການກວດກາບັນດາໂຄງການລົງທຶນຂອງລັດທີ່ມີມູນຄ່າ 10 ຕື້ກີບຂຶ້ນໄປ ແລະ 10 ຕື້ກີບລົງມາ ຢູ່ແຂວງຄຳມ່ວນທັງໝົດ 106 ໂຄງການ, ຜ່ານການກວດກາພົບເຫັນມູນຄ່າເສຍຫາຍທີ່ຕ້ອງຫັກລົບອອກຈາກສັນຍາ ແລະ ສາລະບານງົບ ປະມານ ຈໍານວນ 79 ໂຄງການ, ມູນຄ່າ 264,73 ຕື້ກີບ. ພ້ອມນັ້ນ, ຍັງໄດ້ ກວດກາການຄຸ້ມຄອງບໍລິຫານລັດຂອງບັນດາພະແນກການ-ອົງການ ແລະ ລັດວິສາຫະກິດ; ຮັບ ແລະ ຄົ້ນຄວ້າຄຳຮ້ອງ-ຄຳສະເໜີຂອງສະມາຊິກພັກ-ພະນັກງານ, ພົນລະເມືອງທົ່ວໄປ ແລະ ບັນຫາອື່ນໆ.
ກອງປະຊຸມໄດ້ຮັບຟັງການຜ່ານລະບຽບ ການເຄື່ອນໄຫວດໍາເນີນການກວດກາ ແລະ ຄະນະກວດກາສະເພາະກິດ, ບົດໂອ້ລົມຂອງ ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ຕໍ່ກອງປະຊຸມວຽກງານກວດກາທົ່ວປະເທດ ປະຈຳປີ 2022, ພ້ອມນັ້ນ ບັນດາຜູ້ແທນກອງປະຊຸມ ກໍໄດ້ຜັດປ່ຽນກັນປະກອບຄຳຄິດຄຳເຫັນ, ປຶກສາຫາລື ແລກປ່ຽນຄໍາຄິດຄໍາເຫັນຮ່ວມກັນ ເພື່ອຄວາມເປັນເອກະພາບ ໃນການຮັບຮອງເອົາບົດສະຫລຸບ ແລະ ທິດທາງຄາດໝາຍສູ້ຊົນວຽກງານຈຸດສຸມ ໃນປີ 2023 ແນໃສ່ເຮັດໃຫ້ວຽກງານຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫລວງ ໃຫ້ມີການຫັນປ່ຽນຢ່າງແຂງແຮງ ແລະ ດີຂຶ້ນກວ່າເກົ່າ.
