ການປ່ຽນແປງຂອງສະພາບດິນຟ້າອາກາດ ສົ່ງຜົນກະທົບຢ່າງໜັກໜ່ວງຕໍ່ທະວີບອາຊີ

ຂ່າວຕ່າງປະເທດລາຍງານ ໃນວັນທີ 27 ກໍລະກົດ ຜ່ານມາ, ອົງການອຸຕຸນິຍົມວິທະຍາໂລກ (WMO) ໄດ້ເປີດເຜີຍບົດລາຍງານໂດຍລະບຸວ່າ: ອາຊີກຳລັງເປັນທະວີບທີ່ໄດ້ຮັບຜົນກະທົບຈາກໄພທຳມະຊາດຫຼາຍທີ່ສຸດໃນປັດຈຸບັນ ດ້ວຍສະຖິຕິການເກີດໄພພິບັດ ຊຶ່ງເປັນຜົນມາຈາກຄວາມປ່ຽນແປງຂອງສະພາບອາກາດໂລກ 81 ຄັ້ງ ໃນປີທີ່ຜ່ານມາ ສ່ວນຫຼາຍແມ່ນນ້ຳຖ້ວມ ແລະ ພາຍຸ.

ອິດທິພົນຮຸນແຮງຈາກໄພທຳມະຊາດຕະຫຼອດໄລຍະເວລາດັ່ງກ່າວສົ່ງຜົນໃຫ້ມີຜູ້ເສຍຊີວິດຫຼາຍກວ່າ 5.000 ຄົນ ແລະ ປະຊາຊົນຫຼາຍກວ່າ 50 ລ້ານຄົນໃນຫຼາຍປະເທດໄດ້ຮັບຜົນກະທົບ ໂດຍໜຶ່ງໃນເຫດການຄັ້ງຮ້າຍແຮງທີ່ສຸດຄື ອຸທົກກະໄພໃນປາກິດສະຖານ ສົ່ງຜົນໃຫ້ມີຜູ້ເສຍຊີວິດຫຼາຍກວ່າ 1.500 ຄົນ. ຂະນະທີ່ຈີນປະເຊີນກັບໄພແຫ້ງແລ້ງຢ່າງຮຸນແຮງໃນປີທີ່ຜ່ານມາ ນອກຈາກນີ້, ບົດລາຍງານຂອງ WMO ຍັງລະບຸກ່ຽວກັບການທີ່ຖານນໍ້າກ້ອນສ່ວນໃຫຍ່ໃນພາກພື້ນພູ ແລະ ວ່າງພູຂອງທະວີບອາຊີພົບກັບບັນຫາພາວະນ້ຳກ້ອນລະລາຍຫຼາຍເປັນປະຫວັດສາດ ໃນປີ 2022 ເນື່ອງຈາກພາວະໂລກຮ້ອນ.

ຍິ່ງໄປກວ່ານັ້ນ, WMO ຍັງໄດ້ກ່າວເຕືອນວ່າ: ຄວາມປ່ຽນແປງຂອງສະພາບພູມອາກາດໂລກທີ່ມີທ່າອ່ຽງຮຸນແຮງຈະສົ່ງຜົນກະທົບຕໍ່ຄວາມໝັ້ນຄົງທາງອາຫານ ແລະ ນ້ຳ ຕະຫຼອດຈົນຮອດລະບົບນິເວດດ້ວຍ.