ປກສ ເມືອງພີນ ກັກຕົວໄວໝຸ່ມ 8 ຄົນ ມົ້ວສຸມດື່ມຄໍລາເຈນທີ່ມີສານເສບຕິດ

ວັນທີ 27 ກໍລະກົດ ນີ້, ເຈົ້າໜ້າທີ່ຕຳຫຼວດ ສະກັດກັ້ນ ແລະ ຕ້ານຢາເສບຕິດ ເມືອງພີນ ໄດ້ລາຍງານໃຫ້ຮູ້ວ່າ: ເຈົ້າໜ້າທີ່ໜ່ວຍງານຕໍາຫຼວດສະກັດກັ້ນ ແລະ ຕ້ານຢາເສບຕິດ ລົງເຄື່ອນໄຫວຕິດຕາມກວດກາຕາມຈຸດມົ້ວສຸມຕ່າງໆ ຢູ່ຂອບເຂດເທສະບານ ເມືອງພີນ, ແຂວງສະຫວັນນະເຂດ, ໄດ້ມີເປົ້າໝາຍມົ້ວສຸມສິ່ງເສບຕິດ, ສູບຢາໄຟຟ້າ, ດື່ມຄໍລາເຈນ, ຢູ່ຮ້ານອາຫານແຫ່ງໜຶ່ງ ພ້ອມກັກຕົວເປົ້າໝາຍໄດ້ 8 ຄົນ ຄື: ທ້າວ ທິວ ອາຍຸ 18 ປີ, ທ້າວຕ້ອມ ອາຍຸ 29 ປີ, ທ້າວກີ້ ອາຍຸ 32 ປີ, ນາງ ປາລີນາ ອາຍຸ 20 ປີ, ນາງລີ້ ອາຍຸ 20 ປີ, ນາງແມັກກີ້ ອາຍຸ 21 ປີ, ນາງເມ ອາຍຸ 19 ປີ ແລະ ນາງໄໝ ອາຍຸ 21 ປີ, ແລະ ຢຶດຂອງກາງປະເພດ ຄໍລາເຈນ ຈໍານວນ 2 ຖົງ, ຢາສູບໄຟຟ້າ ຈໍານວນ 5 ຫຼອດ. ຜ່ານການສືບສວນສອບສວນ ພວກກ່ຽວໄດ້ຮັບສາລະພາບວ່າ: ໄດ້ມີການມົ້ວສຸມດື່ມເບຍປະສົມຄໍລາເຈນທີ່ມີສານເສບຕິດແທ້, ເຈົ້າໜ້າທີ່ຈຶ່ງໄດ້ນໍາຕົວພວກກ່ຽວພ້ອມເຄື່ອງຂອງກາງຂຶ້ນມາ ກອງບັນຊາການ ປກສ ເມືອງພີນ ເພື່ອສຶກສາອົບຮົມ ປະຕິບັດວິໄນຕາມລະບຽບການ ແລະ ສືບສວນສອບສວນຕາມຂັ້ນຕອນຂອງກົດໝາຍ.