UNESCO ຮຽກຮ້ອງໂຮງຮຽນທຸກແຫ່ງຫ້າມນຳໃຊ້ສະມາດໂຟນໃນຫ້ອງຮຽນ ຊີ້ກະທົບການຮຽນຮູ້ຂອງເດັກ

ລາຍງານ Global Education Monitoring Report ຈາກອົງການເພື່ອການສຶກສາ ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ ຫລື UNESCO ທີ່ອອກມາຫລ້າສຸດນີ້ ລະບຸວ່າ: ໂຮງຮຽນທຸກແຫ່ງຄວນສັ່ງຫ້າມບໍ່ໃຫ້ນັກຮຽນໃຊ້ສະມາດໂຟນໃນຫ້ອງຮຽນ ເພື່ອບໍ່ໃຫ້ລົບກວນການຮຽນການສອນ ເຊິ່ງຈະຊ່ວຍພັດທະນາຄຸນນະພາບການຮຽນຮູ້ຂອງເດັກ ພ້ອມຊ່ວຍປົກປ້ອງພວກເຂົາຈາກການຖືກກັ່ນແກ້ງໃນໂລກອອນລາຍ.

UNESCO ເປີດເຜີຍວ່າ: ມີຫລັກຖານບົ່ງບອກວ່າ ການໃຊ້ສະມາດໂຟນຫລາຍເກີນໄປມີສ່ວນເຊື່ອມໂຍງກັບປະສິດທິພາບການສຶກສາທີ່ຫລຸດລົງ ແລະ ການໃຊ້ເວລາເບິ່ງໜ້າຈໍທີ່ດົນເກີນໄປສົ່ງຜົນເສຍຕໍ່ຄວາມໝັ້ນຄົງທາງອາລົມຂອງເດັກ. ພ້ອມລະບຸວ່າ: ຂໍ້ຮຽກຮ້ອງດັ່ງກ່າວເປັນການສົ່ງສານທີ່ຈະແຈ້ງວ່າ: ເຕັກໂນໂລຊີດິຈີຕອນທັງໝົດໃນພາບລວມ ເຊິ່ງລວມທັງ AI ນັ້ນ ບໍ່ຄວນຈະມີບົດບາດເໜືອການຮຽນການສອນທີ່ເປັນການປະຕິສຳພັນລະຫວ່າງມະນຸດ ເຊິ່ງມີການໂອ້ລົມ ແລະ ເຫັນໜ້າກັນແທ້ໆ.

ທ່າມກາງສະຖານະການປັດຈຸບັນທີ່ເຕັກໂນໂລຊີໄດ້ເຂົ້າມາມີບົດບາດຕໍ່ມະນຸດຈົນເກືອບຈະແຍກກັນບໍ່ອອກ UNESCO ກ່າວເຕືອນຜູ້ກຳນົດນະໂຍບາຍຂອງປະເທດຕ່າງໆ ໃຫ້ລະວັງການເປີດຮັບເຕັກໂນໂລຊີດິຈີຕອນຫລາຍເກີນໄປໂດຍຂາດຄວາມຮອບຄອບ ໂດຍລະບຸວ່າ: ຜົນໄດ້ຮັບທາງບວກຕໍ່ຂະແໜງການຮຽນຮູ້ ແລະ ປະສິດທິພາບທາງເສດຖະກິດທີ່ໄດ້ຮັບມາຈາກເຕັກໂນໂລຊີທີ່ຄາດຫວັງໄວ້ນັ້ນ “ອາດເກີນຈິງ” ແລະ ສິ່ງໃໝ່ໆກໍບໍ່ໄດ້ເທົ່າກັບວ່າມັນຈະດີສະເໝີໄປ.

ນັບແຕ່ໂຄວິດລະບາດໃນຫລາຍປີກ່ອນ ການຮຽນການສອນໃນຮູບແບບອອນລາຍໄດ້ເຂົ້າມາມີບົດບາດເພີ່ມຂຶ້ນ ແລະ ມີທ່າອ່ຽງຈະໄດ້ຮັບຄວາມນິຍົມເພີ່ມຂຶ້ນ ໂດຍສະເພາະໃນລະດັບມະຫາວິທະຍາໄລ ເຊິ່ງ UNESCO ຮຽກຮ້ອງໃຫ້ຜູ້ກຳນົດນະໂຍບາຍຢ່າເມີນເສີຍຕໍ່ “ມິຕິທາງສັງຄົມ” ໃນຂະແໜງການສຶກສາ ເຊິ່ງໝາຍເຖິງນັກສຶກສາໄດ້ມີໂອກາດມານັ່ງຮຽນໃນຫ້ອງຮຽນຮ່ວມກັບໝູ່ຄົນອື່ນໆ ແລະ ໄດ້ພົບກັບຜູ້ສອນແບບຕົວຕໍ່ຕົວ.

“ການໃຊ້ເຕັກໂນໂລຊີຈະຕ້ອງເປັນໄປເພື່ອເພີ່ມພູນປະສົບການການຮຽນຮູ້ ແລະ ເພື່ອຄວາມເປັນຢູ່ທີ່ດີຂອງນັກຮຽນ ແລະ ຄູ ບໍ່ແມ່ນເພື່ອສ້າງຜົນເສຍຕໍ່ພວກເຂົາ… ການເຊື່ອມຕໍ່ທາງອອນລາຍບໍ່ສາມາດແທນທີ່ປະຕິສຳພັນຂອງມະນຸດໄດ້”.

ອ້າງອີງ:

• www.theguardian.com/world/2023/jul/26/put-learners-first-unesco-calls-for-global-ban-on-smartphones-in-schools
• www.unesco.org/gem-report/en/articles/unesco-issues-urgent-call-appropriate-use-technology-education