ທະນາຄານກາງອາເມລິກາຂຶ້ນອັດຕາດອກເບ້ຍສູ່ລະດັບສູງສຸດໃນຮອບ 22 ປີ ເພື່ອຫລຸດອັດຕາເງິນເຟີ້
ທະນາຄານກາງອາເມລິກາ ປັບເພີ່ມອັດຕາດອກເບ້ຍອີກ 0,25 ຈຸດ ສູ່ລະດັບສູງທີ່ສຸດນັບແຕ່ປີ 2001 ແລະ ອາດມີການປັບຂຶ້ນອີກໃນອະນາຄົດ ເພື່ອຫລຸດອັດຕາເງິນເຟີ້ໃຫ້ເຖິງເປົ້າໝາຍ.
ວັນທີ 27 ກໍລະກົດ 2023, ສຳນັກຂ່າວຕ່າງປະເທດລາຍງານວ່າ: ທ່ານ ເຈີໂຣມ ພາວເວລ ປະທານທະນາຄານກາງອາເມລິກາ (ເຟດ) ຖະແຫລງວ່າ: ຄະນະກຳມະການກຳນົດນະໂຍບາຍການເງິນ (FOMC) ມີມະຕິເປັນເອກະພາບ ປັບຂຶ້ນອັດຕາດອກເບ້ຍນະໂຍບາຍອີກ 0,25% ສູ່ລະດັບ 5,25-5,50%.
ການເຄື່ອນໄຫວດັ່ງກ່າວຖືເປັນການປັບເພີ່ມອັດຕາດອກເບ້ຍຄັ້ງທີ 11 ນັບແຕ່ເຟດເລີ່ມໃຊ້ນະໂຍບາຍຮັດແໜ້ນທາງການເງິນ ໃນເດືອນມີນາ 2022 ເພື່ອຕອບສະໜອງຕໍ່ອັດຕາເງິນເຟີ້ ແລະ ຄ່າຄອງຊີບທີ່ເພີ່ມສູງຂຶ້ນ ແລະ ເປັນການປັບຂຶ້ນອັດຕາດອກເບ້ຍລະດັບສູງສຸດ ນັບແຕ່ປີ 2001.
ເຖິງຢ່າງໃດກໍຕາມ, ການປັບເພີ່ມອັດຕາດອກເບ້ຍຄັ້ງນີ້ ອາດບໍ່ແມ່ນຄັ້ງສຸດທ້າຍ ໂດຍທ່ານ ພາວເວລ ກ່າວວ່າ: ເຟດຍັງຕິດຕາມ ແລະ ປະເມີນສະຖານະການຢ່າງໃກ້ຊິດ ເນື່ອງຈາກອັດຕາເງິນເຟີ້ຂອງອາເມລິກາມີຄວາມຄົງທີ່ເພີ່ມຂຶ້ນ ນັບແຕ່ໄລຍະກາງປີຜ່ານມາ ແລະ ອັດຕາວ່າງງານຢູ່ໃນລະດັບເກືອບຕໍ່າສຸດເປັນປະຫວັດສາດ “ແຕ່ຫົນທາງຍັງອີກຍາວໄກ” ໃນການຫລຸດອັດຕາເງິນເຟີ້ໃຫ້ລົງມາຢູ່ທີ່ເປົ້າໝາຍ ຄືລະດັບ 2%.
