ໄຕ້ຫວັນປິດຫ້າງຮ້ານ-ຍົກເລີກຖ້ຽວບິນ ຮັບມືໄຕ້ຝຸ່ນທົກຊູຣີ
ທາງການໄຕ້ຫວັນສັ່ງປິດໂຮງຮຽນ ແລະ ຫ້າງຮ້ານໃນຫລາຍພື້ນທີ່ທາງຕອນໃຕ້ ລວມທັງເມືອງເກົາສົງ ພ້ອມໂຈະໃຫ້ບໍລິການຖ້ຽວບິນຫລາຍຮ້ອຍຖ້ຽວ ທ່າມກາງການປະກາດເຕືອນໄພຝົນຕົກ ແລະ ລົມພັດແຮງ ລວມທັງນ້ຳຖ້ວມ ແລະ ດິນເຈື່ອນຈາກຜົນກະທົບຂອງອິດທິພົນໄຕ້ຝຸ່ນທົກຊູຣີ ທີ່ເຄື່ອນຜ່ານໄຕ້ຫວັນ ແລະ ກຳລັງມຸ້ງໜ້າໄປຈີນ ເຊິ່ງຄາດວ່າຈະພັດຂຶ້ນຝັ່ງຢູ່ຈີນໃນທ້າຍອາທິດນີ້.
ກ່ອນໜ້ານີ້, ໄຕ້ຝຸ່ນທົກຊູຣີ ເຊິ່ງມີຄວາມແຮງລົມເພີ່ມເຖິງລະດັບຊຸບເປີໄຕ້ຝຸ່ນ ໄດ້ອ່ອນກຳລັງລົງຫລັງເຄື່ອນທີ່ຜ່ານຊາຍຝັ່ງທາງຕອນເໜືອຂອງຟີລິບປິນໃນວັນທີ 26 ກໍລະກົດ ເຊິ່ງສົ່ງຜົນໃຫ້ເກີດນ້ຳຖ້ວມ ແລະ ໄຟຟ້າດັບກະທົບປະຊາຊົນຫລາຍພັນຄົນ ແລະ ມີລາຍງານຜູ້ເສຍຊີວິດຢ່າງໜ້ອຍ 5 ຄົນ.
ຂະນະທີ່ກົມອຸຕຸນິຍົມວິທະຍາໄຕ້ຫວັນ ລາຍງານວ່າ: ຫລ້າສຸດເມື່ອເວລາປະມານ 8:30 ໂມງ ຕາມເວລາທ້ອງຖິ່ນ (7:30 ໂມງ ຕາມເວລາປະເທດລາວ) ໄຕ້ຝຸ່ນທົກຊູຣີມີຄວາມແຮງລົມທີ່ 191 ກິໂລແມັດຕໍ່ຊົ່ວໂມງ ເຊິ່ງຈັດຢູ່ໃນລະດັບໄຕ້ຝຸ່ນທີ່ມີກຳລັງແຮງທີ່ສຸດເປັນອັນດັບສອງ ແລະ ກຳລັງມຸ້ງໜ້າໄປທາງຊ່ອງແຄບໄຕ້ຫວັນ.
ໂດຍຖ້ຽວບິນພາຍໃນໄຕ້ຫວັນທັງໝົດຕ້ອງຢຸດໃຫ້ບໍລິການ ແລະ ຖ້ຽວບິນລະຫວ່າງປະເທດບາງສ່ວນຖືກຍົກເລີກ, ເຊັ່ນດຽວກັບຂະບວນລົດໄຟໂດຍສານເສັ້ນທາງລະຫວ່າງພາກໃຕ້ ແລະ ພາກຕາເວັນອອກກໍໂຈະການໃຫ້ບໍລິການ.
ທາງການໄຕ້ຫວັນຍັງສັ່ງອົບພະຍົບປະຊາຊົນ 4.000 ກວ່າຄົນ ເຊິ່ງສ່ວນຫລາຍຢູ່ເທິງພູທາງຕອນໃຕ້ ແລະ ຕາເວັນອອກ ເຊິ່ງມີປະລິມານຝົນຕົກໜັກເປັນປະຫວັດສາດເຖິງ 0,7 ແມັດ.
ກະແສລົມພັດແຮງຈາກອິດທິພົນພາຍຸ ຍັງເຮັດໃຫ້ເກີດໄຟຟ້າດັບກະທົບປະຊາຊົນທົ່ວໄຕ້ຫວັນ 1,57 ກວ່າໝື່ນຄອບຄົວ ເຊິ່ງຫລ້າສຸດທາງການໄດ້ເລັ່ງແກ້ໄຂແລ້ວ.
ອ້າງອີງ:
