ຄວາມແຮງຂອງ ລົມພາຍຸໄຕ້ຝຸ່ນ Doksuri ເຮັດໃຫ້ປະຊາຊົນຟີລິບປິນເສຍຊີວິດແລ້ວຢ່າງໜ້ອຍ 6 ຄົນ ແລະ ກຳລັງມຸ່ງໜ້າສູ່ ໄຕ້ຫວັນ ຂອງຈີນ

ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ວັນທີ 27 ກໍລະກົດ 2023 ນີ້ວ່າ: ສຳນັກງານປ້ອງກັນ ແລະ ບັນເທົາສາທາລະນະໄພແຫ່ງຊາດຟີລິບປິນ ໃຫ້ຮູ້ວ່າ: ຄວາມແຮງຂອງລົມພາຍຸໄຕ້ຝຸ່ນ Doksuri ທີ່ພັດຜ່ານທາງພາກຕາເວັນອອກສ່ຽງເໜືອຂອງເກາະລູຊອນ ປະເທດຟີລິບປິນໃນອາທິດນີ້ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 6 ຄົນ.
ລົມພາຍຸຫົວນີ້ ຈະເຄື່ອນທີ່ຜ່ານທະເລຈີນໃຕ້ ມຸ່ງໜ້າໄປສູ່ ເກາະໄຕ້ຫວັນຂອງຈີນ, ໂດຍສຳນັກງານອຸຕຸນິຍົມວິທະຍາຂອງ ໄທເປ ຄາດວ່າ ລົມພາຍຸຫົວນີ້ອາດຈະມີຄວາມຮຸນແຮງເຖິງ 191 ກິໂລແມັດ/ຊົ່ວໂມງ.
ຂະນະທີ່ສຳນັກງານການບິນພົນລະເຮືອນຂອງໄຕ້ຫວັນໄດ້ຍົກເລີກຖ້ຽວບິນພາຍໃນປະເທດທັງໝົດ ແລະ ຍົກເລີກຖ້ຽວບິນລະຫວ່າງປະເທດບາງສ່ວນ, ດ້ານໜ່ວຍປ້ອງກັນ ແລະ ບັນເທົາສາທາລະນະໄພຂອງໄຕ້ຫວັນໄດ້ອົບພະຍົບປະຊາຊົນຫລາຍກວ່າ 4.000 ຄົນ ອອກຈາກພື້ນທີ່ສ່ຽງລ່ວງໜ້າແລ້ວ