ນິໄສທຳລາຍຄວາມງາມຂອງຄົນເຮັດວຽກຫ້ອງການ

1. ດື່ມນຳ້ໜ້ອຍ : ຫລາຍຄົນບໍ່ຄ່ອຍດື່ມນຳ້ໃນເວລານັ່ງເຮັດວຽກ ຍ້ອນອາດຈະບໍ່ມີຕຸກນຳ້ຢູ່ໂຕະ, ຄ້ານລຸກໄປດື່ມ ຫລື ບໍ່ນິຍົມດື່ມນຳ້ບໍລິສຸດ ເຮັດໃຫ້ດື່ມນຳ້ໜ້ອຍ ແລະ ເມື່ອເຮົາເຮັດວຽກໃນຫ້ອງແອເຢັນໆ ຄວາມເຢັນຈະເຮັດໃຫ້ຜິວແຫ້ງ, ມືແຫ້ງ, ປາກແຫ້ງ, ຕາແຫ້ງ ເປັນຜົນໃຫ້ຮີມສົບແຕກລອກ, ມືແຫ້ງຫຍາບ, ມີຮອຍຫ່ຽວ, ເຄືອງຕາ, ທຸກລະບົບໃນຮ່າງກາຍກໍຈະເຮັດວຽກໄດ້ບໍ່ເຕັມທີ່ນຳ ຍ້ອນບໍ່ມີນຳ້ໄປຫລໍ່ລ້ຽງ. ສະນັ້ນ ທ່ານຄວນດື່ມນຳ້ຢ່າງໜ້ອຍມື້ລະ 6 – 8 ຈອກ ກຽມຈອກນຳ້ ຫລື ກະຕິກນຳ້ງາມໆເກັບຄວາມເຢັນ ຫລື ກະຕຸກນຳ້ປະໄວ້ປະຈຳໂຕະ ເມື່ອຮູ້ສຶກວ່າຄໍແຫ້ງກໍໃຫ້ດື່ມ.
2. ບໍ່ຍອມເຂົ້າຫ້ອງນຳ້ເວລາປວດ : ອາດຍ້ອນກຳລັງເຮັດວຽກຢູ່ ຈົນບໍ່ຢາກລຸກໄປໃສ ຫລື ລໍຖ້າໃຫ້ຮອດເວລາພັກທ່ຽງ ຫລື ເລີກວຽກຈຶ່ງຄ່ອຍໄປ ນິໄສແບບນີ້ບໍ່ດີ ເພາະການກັ້ນຍ່ຽວ ຫລື ກັ້ນອາຈົມນັ້ນເຮັດໃຫ້ສິ່ງເສດເຫລືອບໍ່ໄດ້ອອກຈາກຮ່າງກາຍ ລຳໄສ້ກໍຈະດູດຊຶມສິ່ງເຫລົ່ານັ້ນກັບມາໃນກະແສເລືອດ ແລະ ນຳພາໄປສູ່ພາກສ່ວນຕ່າງໆຂອງຮ່າງກາຍ ເຮັດໃຫ້ເກີດສິວ ແລະ ສ່ຽງເປັນພົກຍ່ຽວອັກເສບ ແລະ ອື່ນໆນຳ ທາງທີ່ດີຄວນເຂົ້າຫ້ອງນຳ້ທຸກເທື່ອທີ່ຮູ້ສຶກປວດ ແລະ ຄວນຂັບຖ່າຍໃຫ້ເປັນເວລາປະຈຳໃນຕອນເຊົ້າເພື່ອໃຫ້ຮ່າງກາຍໄດ້ໄລ່ສິ່ງເສດເຫລືອອອກໄປ ລໍຖ້າຮັບສິ່ງໃໝ່ທີ່ດີ ແລ້ວຈະຮູ້ສຶກສົດຊື່ນສົດໃສໄດ້ທຸກມື້.
3. ບໍ່ທາລິບສະຕິກມັນ : ຍ້ອນອາກາດໃນຫ້ອງແອເຢັນ ຮີມສົບຈຶ່ງແຫ້ງລອກ ສະນັ້ນຄວນມີລິບສະຕິກມັນໄວ້ໝັ່ນທາເປັນປະຈຳ.
4. ນັ່ງຢູ່ບ່ອນເກົ່າເປັນເວລາດົນ : ບາງຄົນກໍເລັ່ງວຽກຈົນບໍ່ລຸກໄປເລີຍ ນັ່ງຢູ່ແຕ່ບ່ອນເກົ່າຕະຫລອດ ເຊິ່ງເປັນສາເຫດໃຫ້ກົກຂາໃຫຍ່ໄດ້ໂດຍບໍ່ຮູ້ໂຕ. ສະນັ້ນ, ຄວນລຸກປ່ຽນທ່າທາງ ຢ່າງໜ້ອຍ 2 ຊົ່ວໂມງຕໍ່ເທື່ອ ເທື່ອລະຢ່າງໜ້ອຍ 3 ນາທີ, ຍືດເສັ້ນຍືດເອັນເພື່ອໃຫ້ຮ່າງກາຍໄດ້ເຄື່ອນໄຫວ, ໄດ້ໃຊ້ພະລັງງານໄປບໍລິຫານພາກສ່ວນຕ່າງໆແດ່ ຫາກຝືນນັ່ງດົນໆຕໍ່ໄປຈະມີອາການປວດກ້າມຊີ້ນ.

  5​. ກິນເຂົ້າໜົມ : ຫາກກາຍຍາມກິນເຂົ້າມາດົນແລ້ວ ແນ່ນອນຫລາຍຄົນກໍຮູ້ສຶກຫິວ ຈົນໄປຫາເຂົ້າໜົມມາກິນ ເຊິ່ງເປັນສາເຫດໃຫ້ທ່ານຕຸ້ຍງ່າຍໄດ້. ສະນັ້ນ, ຫັນມາເລືອກກິນໝາກໄມ້ແທນເຂົ້າໜົມຈະດີກ່ວາ.

6. ຈ້ອງຄອມພິວເຕີດົນ : ທຳລາຍສາຍຕາແນ່ນອນ ເປັນສາເຫດໃຫ້ຕາແດງ, ແສບຕາ, ອິດເມື່ອຍດວງຕາ ແລະ ປວດຕາໄດ້. ດັ່ງນັ້ນ, ໝັ່ນພັກຜ່ອນສາຍຕາໂດຍການຫລັບຕາປະມານ 1 ນາທີ ຫລື ແນມໄປບ່ອນອື່ນທີ່ມີສີຂຽວເພື່ອຜ່ອນຄາຍສາຍຕາເປັນໄລຍະ.
7. ບໍ່ອອກກຳລັງກາຍ : ເມື່ອແລ້ວຈາກການເຮັດວຽກກັບຮອດເຮືອນຫລາຍຄົນກໍຈະນອນ ເພາະຮູ້ສຶກເມື່ອຍກັບການເຮັດວຽກມາໝົດມື້ ຈົນລືມທີ່ຈະອອກກຳລັງກາຍ ຫລື ບາງຄົນກໍເຮັດວຽກໝົດມື້ຈົນບໍ່ມີເວລາອອກກຳລັງກາຍ ແນ່ນອນວ່າຄວາມຕຸ້ຍ ແລະ ພະຍາດຕ່າງໆຈະຖາມຫາ. ສະນັ້ນ, ຫາກເປັນໄປໄດ້ຄວນຕື່ນເຊົ້າມາອອກກຳລັງກາຍແທນ, ຍ່າງຂຶ້ນລົງຂັ້ນໄດແທນການໃຊ້ຂັ້ນໄດເລື່ອນ ຫລື ລິຟ, ພາໝາໄປຍ່າງຫລິ້ນ, ຂີ່ລົດຖີບໄປຕະຫລາດແທນ ກໍຖືເປັນການອອກກຳລັງກາຍອີກທາງໜຶ່ງ.