ຂັບຂີ່ລົດໃຫ້ລະວັງຄົນ ຈະຂ້າມຖະໜົນໃຫ້ລະວັງລົດ ກົດຈະລາຈອນພື້ນຖານທີ່ທຸກຄົນຄວນຮູ້ ແລະ ປະຕິບັດ
ໂດຍ: ຜາຕຸງ
ເຮົາຈະສັງເກດຫັນວ່າ ປັດຈຸບັນນີ້ ຢູ່ຕາມເສັ້ນທາງສາຍຕ່າງໆ ຈະມີປ້າຍສັນຍະລັກບອກໃຫ້ຜູ້ສັນ ຈອນໄປມາຕາມທ້ອງຖະໜົນຮູ້ໄດ້ເຖິງກົດລະບຽບການສັນຈອນທາງບົກ, ມີທັງປ້າຍຫ້າມ, ປ້າຍເຕືອນ ແລະ ປ້າຍອື່ນໆຫຼາຍຢ່າງ ລວມທັງການຂີດ, ການແຕ້ມຕາມຂອບທາງ ແລະ ເສັ້ນແບ່ງຊ່ອງຈະລາຈອນ ລວມທັງທາງມ້າລາຍ ເພື່ອໃຫ້ຜູ້ສັນຈອນໄປມາ ເຊິ່ງຜູ້ໃຊ້ລົດໃຊ້ຖະໜົນຕ້ອງຮຽນຮູ້ ແລະ ປະຕິບັດຕາມຢ່າງເຂັ້ມງວດ ເພື່ອຫຼຸດຜ່ອນອຸປະຕິເຫດຕາມທ້ອງຖະໜົນໃຫ້ໜ້ອຍລົງ.
ອີກດ້ານໜຶ່ງການເຮັດປ້າຍເຕືອນ ປ້າຍຫ້າມຕ່າງໆ ລວມທັງສີທີ່ແຕ້ມກ່ານຂາວ-ດຳ,ຂາວ-ແດງ ຕາມຂອບທາງ ແລະ ເສັ້ນແບ່ງຊ່ອງຈະລາຈອນກໍ່ຄືເສັ້ນທາງມ້າລາຍ ຕ້ອງມີການໝັ່ນກວດກາ ວ່າປ້າຍໃດທີ່ຍັງໃຊ້ໄດ້, ໃຊ້ບໍ່ໄດ້ ແລະ ປ່ຽນຢູ່ຕະຫລອດເວລາ ເພື່ອໃຫ້ຜູ້ສັນຈອນເຫັນໄດ້ຊັດເຈນ ແຕ່ໃນຄວາມຈິງເຫັນວ່າ ບ່ອນຄ່ອຍໆຈາງຫາຍໄປຕາມການເວລາ ກາຍເປັນສາເຫດທີ່ພາໃຫ້ຜູ້ຂັບຂີ່ລົດຈຳນວນໜຶ່ງຖືເບົາບໍ່ຍອມປະຕິບັດຕາມລະບຽບການສັນຈອນ, ເຈົ້າໜ້າທີ່ກໍບໍ່ສາມາດເອົາຜິດຕໍ່ຜູ້ລະເມີດໄດ້ ອັນສ້າງຄວາມສັບສົນຫຍຸ້ງຍາກ ແລະ ມີຄວາມສ່ຽງພາໃຫ້ເກີດອຸບັດຕິ ເຫດຫຼາຍຂຶ້ນ, ບັນຫານີ້ ຕ້ອງໄດ້ມີການກວດກາປັບປຸງຄືນໂດຍດ່ວນ ເພື່ອຄວາມເປັນລະບຽບຮຽບຮ້ອຍ, ຄວາມປອດໄພຂອງຜູ້ໃຊ້ລົດໃຊ້ຖະໜົນ ແລະ ຄົນຂ້າມທາງ.
ເມື່ອເວົ້າຮອດຄົນຂ້າມທາງແລ້ວ ກໍຢາກເວົ້າເລີຍໄປຕື່ມອີກຈັກເລັກນ້ອຍເຖິງການແຕ້ມທາງມ້າລາຍຕາມຈຸດສຳຄັນ ແລະມີຄວາມສ່ຽງເຊັ່ນ: ຢູ່ຕາມຈຸດໂຮງຮຽນ, ໂຮງໝໍ, ຫ້າງສັບພະສິຄ້າ ແລະ ບ່ອນອື່ນໆ ຄວນມີການແຕ້ມເສັ້ນທາງມ້າລາຍເພື່ອເປັນບ່ອນໃຫ້ຄົນຂ້າມທາງຢ່າງຖືກຕ້ອງ ແລະ ປອດໄພ, ບ່ອນໃດທີ່ມີແລ້ວກໍ່ເປັນການດີ ແຕ່ບ່ອນໃດບໍ່ທັນມີຄວນໄດ້ພິຈາລະນາຄືນວ່າສົມຄວນຕ້ອງແຕ້ມທາງມ້າລາຍໃສ່ຫຼືບໍ່ ຕາມທີ່ ຜາຕຸງ ເຫັນຢູ່ຫຼາຍບ່ອນທີ່ມີແລ້ວກໍຫຼ້ອຍຫຼໍ ຂາດຫາຍເປ່ເພໄປຕາມການເວລາແລ້ວ ແລະຍັງອີກຫຼາຍບ່ອນທີ່ເຫັນວ່າມີຄວາມສ່ຽງເປັນຕົ້ນຢູ່ ຖະໜົນຄູວຽງບໍລິເວນສູນການຄ້າເຊິ່ງອາດຈະກາຍເປັນຈຸດທີ່ມີຄວາມສ່ຽງເກີດອຸບັດເຫດໄດ້ງ່າຍ ເພາະມີລົດຜ່ານໄປມາ ແລະ ກໍມີຄົນຂ້າມທາງຫຼາຍ,
ຢ່າງໃດກໍດີ ຜ່ານມານີ້ ຄິດວ່າມີຫຼາຍທ່ານໄດ້ເດີນທາງໄປທ່ອງທ່ຽວຫຼືໄປເຮັດວຽກງານ ຢູ່ຕ່າງປະ ເທດຫຼາຍປະເທດມາແລ້ວ ຊຶ່ງຈະເຫັນວ່າຕາມຖະໜົນຫົນທາງບ້ານເພິ່ນ ເມືອງທ່ານນັ້ນເຂົາເຈົ້າຈະຖືສຳຄັນຕໍ່ວຽກງານນີ້ຢ່າງຈິງຈັງ ແລ້ວຍອມທຸ່ມເທງົບປະມານເຂົ້າໃສ່ ເພື່ອສ້າງຄົມປອດໄພໃຫ້ສັງຄົມໂດຍສະເພາະແມ່ນຄົນຂ້າມທາງ, ໜ້ອຍໜັກໜ້ອຍໜາຈະເຫັນຜູ້ຂັບລົດຝ່າຝືນ ຍິ່ງເປັນທາງມ້າລາຍບ່ອນທີ່ຄົນຂ້າມທາງນັ້ນຍິ່ງເພີ່ມຄວາມຮັບຜິດຊອບຕໍ່ສັງຄົມຫຼາຍຂຶ້ນ ເຂົາຈະບໍ່ຂັບລົດໄປຢຽບເສັ້ນຫຼືຈອດລົດກວມທາງມ້າລາຍເດັດຂາດ ເພາະທາງມ້າເລີຍເພິ່ນເຮັດໄວ້ເປັນບ່ອນຄົນຂ້າມທາງໃຫ້ປອດໄພ,
ແນວໃດກໍ່ດີ,ພາກສ່ວນກ່ຽວຂ້ອງທີ່ຮັບຜິດຊອບທາງໂດຍກົງ ຄວນໄດ້ລົງສຳຫຼວດກວດກາເບິ່ງຄືນໃໝ່ອີກວ່າແຕ່ລະບ່ອນມີຄວາມເໜາະສົມແນວໃດໃນການຕິດຕັ້ງປ້າຍສັນຍານ, ປ້າຍເຕືອນ, ປ້າຍຫ້າມ, ການຕີເສັ້ນແແບ່ງຊ່ອງຈະລາຈອນຕະຫຼອດການແຕ້ມຂອບທາງແລະຂີດທາງມ້າລາຍຄືນໃໝ່ໃຫ້ເດັ່ນຊັດຂື້ນ, ແຕ່ວ່າວຽກງານນີ້ຕ້ອງອາໃສງົບປະມານຈຳນວນບໍ່ໜ້ອຍພໍປານໃດທີ່ຈະເຮັດໃຫ້ໄດ້ຢ່າງລະ ອຽດຄົບຖ້ວນ ດັ່ງນັ້ນ ອຳນາດການປົກຄອງທີ່ມີສິດເໜືອກວ່າຄວນໄດ້ສະໜອງງົບປະມານຕໍ່ຂະແໜງການນີ້ໃຫ້ພຽງພໍໃນການຈັດຕັ້ງປະຕິບັດ ສຳລັບເລື່ອງນີ້ ຜາຕຸງ ຄິດວ່າເພິ່ນຄົງຈະມີງົບປະມານຈຳ ນວນນຶ່ງໄວ້ບໍລິການແລ້ວ ໂດຍສະເພາະແມ່ນງົບປະມານການສ້ອມແປງທາງຫຼວງ ແລະເຊື່ອວ່າອີກບໍ່ດົນວຽກງານນີ້ຄົງໄດ້ແກ່ໄຂຕົກໄປ ທຸກຄົນຕ້ອງເປັນເຈົ້າການນຳກັນໃນການໃຊ້ລົດໃຊ້ຖະໜົນ ເພື່ອຄວາມປອດໄພຂອງທຸກຄົນໃນສັງຄົມ ດັ່ງຄຳເວົ້າວ່າ: ເວລາຂັບລົດໃຫ້ລະວັງຄົນ ເວລາຈະຂ້າມທາງຖະໜົນໃຫ້ລະວັງລົດ
