ກະຊວງກະສິກຳ ແລະ ປ່າໄມ້ ທາບທາມຮ່າງດຳລັດ ວ່າດ້ວຍກະສິກຳສະອາດ ເພື່ອສົ່ງເສີມການຜະລິດກະສິກຳ ທີ່ສະອາດ ແລະ ປອດໄພ

ວັນທີ 24-25 ກໍລະກົດ 2023, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມທາບທາມ ຮ່າງດຳລັດ ວ່າດ້ວຍ ກະສິກຳສະອາດ, ເພື່ອສະເໜີ ແລະ ປຶກສາຫາລື ກ່ຽວກັບເຫດຜົນ ແລະ ຄວາມຈຳເປັນໃນການສ້າງ ຮ່າງ ດຳລັດ ວ່າດ້ວຍ ກະສິກຳສະອາດ, ໂຄງຮ່າງ ແລະ ເນື້ອໃນຂອງດຳລັດ ເພື່ອຮັບປະກັນໃຫ້ມີເນື້ອໃນຄົບຖ້ວນ ແລະ ໂຄງຮ່າງສອດຄ່ອງກັບລະບຽບການ ໃນການສ້າງນິຕິກຳ ຂອງ ສປປ ລາວ.

ທ່ານ ກິແກ້ວ ສິງນາວົງ, ຮອງລັດຖະມົນຕີກະຊວງກະສິກຳ ແລະ ປ່າໄມ້ ທັງເປັນຫົວໜ້າຄະນະຊີ້ນຳສ້າງ ຮ່າງ ດຳລັດ ວ່າດ້ວຍ ກະສິກຳສະອາດ ໄດ້ຍົກໃຫ້ເຫັນສະພາບລວມກ່ຽວກັບ ຄວາມໝາຍຄວາມສຳຄັນ ແລະ ຄວາມເປັນມາຂອງການ ສ້າງ ດຳລັດສະບັບນີ້ວ່າ: ເປັນການຈັດຕັ້ງປະຕິບັດນະໂຍບາຍ ຂອງພັກ-ລັດຖະບານ, ແລະ ປະຕິບັດວາລະແຫ່ງ ຊາດກ່ຽວກັບກະສິກຳສະອາດ ແລະ ຜ່ານກອງປະຊຸມຄັ້ງນີ້ ຈະເຮັດໃຫ້ໂຄງຮ່າງ ແລະ ເນື້ອໃນ ຂອງຮ່າງດຳລັດສະບັບນີ້ ມີເນື້ອໃນຄົບຖ້ວນຫລາຍຂຶ້ນ ແລະ ຈະນໍາໄປປັບປຸງຕາມຜົນຂອງກອງປະຊຸມ ກ່ອນສົ່ງໃຫ້ພາກສ່ວນທີ່ກ່ຽວຂ້ອງກວດກາ ແລະ ສົ່ງໃຫ້ ລັດ ຖະບານ.

ການຄົ້ນຄວ້າສ້າງຮ່າງດຳລັດວ່າດ້ວຍ ກະສິກຳສະອາດ ໄດ້ເລີ່ມມາແຕ່ຕົ້ນປີ 2022 ໂດຍແມ່ນຄະນະທີ່ ໄດ້ຮັບການ ແຕ່ງຕັ້ງ ເຊິ່ງແມ່ນກົມປູກຝັງ ກະຊວງກະສິກຳ ແລະ ປ່າໄມ້ ເປັນຜູ້ຮັບຜິດຊອບ ແລະພາຍຫລັງທີ່ດຳລັດສະບັບນີ້ ໄດ້ຖືກຈັດ ຕັ້ງປະຕິບັດຈະເຮັດໃຫ້ ການສົ່ງເສີມ ແລະ ການຜະລິດກະສິກຳ ໂດຍສະເພາະແມ່ນການຜະລິດພືດ ແລະ ຜະລິດຕະພັນພືດ ມີຄວາມເຂັ້ມແຂງ ແລະ ມີການຄຸ້ມຄອງດີຂື້ນ, ຫລຸດຜ່ອນການຄວາມສ່ຽງການປົນເປື້ອນ, ເຮັດໃຫ້ພືດ ແລະ ຜະລິດຕະພັນພືດ ມີຄວາມສະອາດ, ປອດໄພ ຕໍ່ສຸຂະພາບຂອງຄົນ, ສັດ ແລະ ສິ່ງແວດລ້ອມ, ສອດຄ່ອງກັບມາດຕະຖານ, ຮັກສາໄດ້ດິນ, ນ້ຳ ແລະ ສິ່ງແວດລ້ອມ ທີ່ຍັງສະອາດ ແລະ ອຸດົມສົມບູນ.