ກະຊວງພາຍໃນ ແລະ ກະຊວງການ ຕ່າງປະເທດ ຮ່ວມມືເຊື່ອມຕໍ່ລະບົບ ຄຸ້ມຄອງພົນລະເມືອງເອເລັກໂຕຣນິກ

ການເຊັນສັນຍາຮ່ວມມືເຊື່ອມຕໍ່ລະບົບຄຸ້ມຄອງພົນລະເມືອງເອເລັກໂຕຣນິກ ຂອງກະຊວງພາຍໃນ ແລະ ກະຊວງການຕ່າງປະເທດ, ໃນວັນທີ 19 ກໍລະກົດ 2023, ໂດຍການລົງນາມຂອງທ່ານນາງ ກົມມະລີ ວິລະພັນ ຫົວໜ້າກົມຄຸ້ມຄອງພົນລະເມືອງ, ກະຊວງພາຍໃນ ແລະ ທ່ານ ສີພັນດອນ ອ້ອຍບົວບຸດດີ ຫົວໜ້າກົມກຸງສຸນ, ກະຊວງການຕ່າງປະເທດ.

ເພື່ອຮ່ວມມືກ່ຽວກັບການແລກປ່ຽນຂໍ້ມູນບຸກຄົນ, ຂໍ້ມູນການຈົດທະບຽນຂອງພົນລະເມືອງລະຫວ່າງລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ ຂອງກະຊວງພາຍໃນ ແລະ ລະບົບການອອກໜັງສືຜ່ານແດນຂອງກົມກົງສຸນ, ກະຊວງການຕ່າງປະເທດ ເຊິ່ງວຽກງານຄຸ້ມຄອງພົນລະເມືອງເປັນວຽກງານທີ່ກວ້າງຂວາງ ແລະ ພົວພັນກັບຫລາຍຂະແໜງການຈຶ່ງມີຄວາມຈໍາເປັນຕ້ອງມີການພົວພັນ ແລະ ຮ່ວມມືກັນຂອງບັນດາຂະແໜງການເພື່ອເຮັດໃຫ້ຂໍ້ມູນສະຖິຕິມີຄວາມເປັນເອກະພາບ,ຖືກຕ້ອງ ແລະ ສອດຄ່ອງກັນ, ໃນໄລຍະຜ່ານມາກົມຄຸ້ມຄອງພົນລະເມືອງກໍໄດ້ເຊັນບົດບັນທຶກກັບຫລາຍຂະແໜງການ. ສະນັ້ນ, ການຮ່ວມມືລະຫວ່າງສອງກະຊວງຄັ້ງນີ້ຈະສ້າງຄວາມສະດວກ ແລະ ມີຄວາມສໍາຄັນຕໍ່ວຽກງານການອອກໜັງສືຜ່ານແດນໃຫ້ພົນລະເມືອງລາວ ແລະ ສາມາດໃຫ້ກົມກົງສຸນເຂົ້າເຖິງຖານຂໍ້ມູນພົນລະເມືອງໃນລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກເພື່ອກວດກາຄວາມຖືກຕ້ອງຂອງຂໍ້ມູນພົນລະເມືອງທີ່ມາຍືນຂໍນຳໃຊ້ໜັງສືຜ່ານແດນ.

ຜ່ານມາກົມຄຸ້ມຄອງພົນລະເມືອງກະຊວງພາຍໃນໄດ້ເຊັນບົດບັນທຶກກັບຫລາຍຂະແໜງການໃນການຄຸ້ມຄອງພົນລະເມືອງ ແລະ ໃນຕໍ່ໜ້າກົມຄຸ້ມຄອງພົນລະເມືອງຍັງມີຄວາມພ້ອມ ແລະ ຍິນດີ ສືບຕໍ່ເຊັນບົດບັນທຶກຄວາມເຂົ້າໃຈກັບກະຊວງສຶກທິການ ແລະ ກິລາ, ກະຊວງຍຸຕິທຳ, ສູນສະຖິຕິ ກະຊວງແຜນການ ແລະ ການລົງທຶນອີກດ້ວຍ.