ຫວຽດນາມ ກຽມຊື້ຖ່ານຫີນ ຈາກ ສປປ ລາວ 20 ລ້ານໂຕນຕໍ່ປີ ເພື່ອຕອບສະໜອງຄວາມຕ້ອງການຂອງຕະຫຼາດ
ອີງຕາມໜັງສືພິມວຽງຈັນທາມ ລາຍງານວັນທີ 24 ກໍລະກົດ 2023 ນີ້ວ່າ: ສສ.ຫວຽດນາມ ກຽມນໍາເຂົ້າຖ່ານຫີນຈໍານວນ 20 ລ້ານໂຕນ ແຕ່ລະປີ ຈາກ ສປປ ລາວ ໃນໄລຍະເວລາ 5 ປີ ເພື່ອຕອບສະໜອງຄວາມຕ້ອງການຂອງຕະຫຼາດ ແລະ ສະພາບການພາຍໃນປະເທດຂອງ ຫວຽດນາມ ພ້ອມທັງຊຸກຍູ້ການສົ່ງອອກຖ່ານຫີນ ຂອງ ສປປ ລາວ.
ອີງຕາມການລາຍງານຂອງແຫຼ່ງຂ່າວ ທີ່ ສສ ຫວຽດນາມ ເມື່ອວັນທີ 20 ກໍລະກົດທີ່ຜ່ານມານີ້, ກະຊວງອຸດສາຫະກໍາ ແລະ ການຄ້າຫວຽດນາມ ແລະ ກະຊວງພະລັງງານ ແລະ ບໍ່ແຮ່ ຂອງ ສປປ ລາວ ໄດ້ ຮ່ວມລົງນາມບົດບັນທຶກຄວາມເຂົ້າໃຈ (MOU) ທີ່ລົງນາມໂດຍທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ Nguyen Hong Dien ລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ຫວຽດນາມ ກ່ຽວກັບການທີ່ ສສ ຫວຽດນາມ ຈະນໍາເຂົ້າຖ່ານຫີນປີລະ 20 ລ້ານໂຕນ ເປັນໄລຍະເວລາ 5 ປີ.
ການຮ່ວມມືຄັ້ງນີ້ເກີດຂຶ້ນທ່າມກາງຄວາມຄາດຫວັງ ທີ່ຈະສ້າງຄວາມສະດວກ ແລະ ເງື່ອນໄຂໃຫ້ແກ່ການຫັນປ່ຽນດ້ານພະລັງງານ ແລະ ຮັບປະກັນຄວາມໜັ້ນຄົງດ້ານພະລັງງານຂອງ ຫວຽດນາມ, ພ້ອມ ທັງເປັນການໜູນຊ່ວຍລາວໃນການຂຸດຄົ້ນ ແລະ ຊຸກຍູ້ທ່າແຮງບົ່ມຊ້ອນຂອງຂະແໜງຖ່ານຫີນ.
ໃນຊຸມປີທີ່ຜ່ານມາ ລາວແມ່ນຜູ້ສະໜອງຖ່ານຫີນ ແລະ ແຮ່ທາດທີ່ສໍາຄັນໃຫ້ແກ່ຫວຽດນາມ. ໂດຍໃນປີ 2022 ທີ່ຜ່ານມາ ຫວຽດນາມໄດ້ນໍາເຂົ້າແຮ່ທາດຈາກ ສປປ ລາວ ຈໍານວນ 1,8 ລ້ານໂຕນ ຄິດ ເປັນມູນຄ່າເປັນມູນຄ່າ 78,2 ລ້ານ ແລະ ໃນ 6 ເດືອນຕົ້ນປີ 2023 ນີ້ ສສ. ຫວຽດນາມໄດ້ມີການນໍາເຂົ້າຖ່ານຫີນຈາກ ສປປ ລາວ ໄປແລ້ວ ກວ່າ 900.000 ໂຕນ ຄິດເປັນມູນຄ່າ 31,6 ລ້ານໂດລາ. ນອກຈາກນີ້ ການເຊັນສັນຍາຄັ້ງດັ່ງກ່າວຍັງເກີດຂຶ້ນ ພາຍຫຼັງອົງການຈັດຕັ້ງ ແຂວງ Quang Tri ໃນພາກກາງຂອງ ສສ ຫວຽດນາມ ໄດ້ສະເຫນີສ້າງສາຍພານລໍາລຽງຄວາມຍາວ 160 ກິໂລແມັດ ທີ່ຈະ ສາມາດຂົນສົ່ງຖ່ານຫີນໄດ້ສູງເຖິງ 1.500 ໂຕນຕໍ່ຊົ່ວໂມງ ເພື່ອອໍານວຍຄວາມສະດວກໃນການຂົນສົ່ງຖ່ານຫີນ ຈາກແຂວງ ເຊກອງ ແລະ ສາລະວັນ ຂອງ ສປປ ລາວ ມາສູ່ທ່າເຮືອ My Thuy ເຊິ່ງເປັນ ທ່າເຮືອທີ່ສໍາຄັນໃນປະເທດຫວຽດນາມ.
ສປປ ລາວ ແລະ ສສ ຫວຽດນາມ ເປັນສອງປະເທດທີ່ມີການຮ່ວມມືກັນຫຼາຍດ້ານໂດຍສະເພາະໃນຂົງເຂດດ້ານພະລັງງານ ເຊັ່ນໂຄງການໄຟຟ້ານໍ້າຕົກ ແລະ ເມື່ອບໍ່ດົນມານີ້ກໍໄດ້ມີການລົງນາມບົດ ບັນທຶກກ່ຽວກັບການຈັດຕັ້ງພັດທະນາໂຄງການໂຮງໄຟຟ້າພະລັງງານລົມ ທີ່ມີມູນຄ່າກວ່າ 2.000 ລ້ານໂດລາ ຢູ່ແຂວງສະຫວັນນະເຂດ ທີ່ຕັ້ງຢູ່ທາງພາກກາງຂອງ ປະເທດລາວ.
