ດອນນາຣຸມມ່າ ນັກຮັບມືໜຶ່ງ ເປແອສເຊ ຖືກຄົນຮ້າຍບຸກຊີງຊັບ! ໃຈກາງເມືອງປາຣີ
July 23, 2023 - 9:00 AM
ເມື່ອຄືນວັນທີ 21 ກໍລະກົດ 2023 ຜ່ານມາ BBC ສື່ຊື່ດັງລາຍງານວ່າ ຈານລຸຍຈິ ດອນນາຣຸມມ່າ ຜູ້ຮັກສາປະຕູອາຍຸ 24 ປີ ຂອງ ປາຣີ ແຊັງ-ແຊັກແມັງ ຖືກກຸ່ມຄົນຮ້າຍບຸກເຂົ້າມາທຳຮ້າຍຮ່າງກາຍ ແລະ ປຸ້ນຈີ້ຊີງຊັບຢູ່ທີ່ເຮືອນຂອງຕົນເອງ ໃນນະຄອນຫລວງ ປາຣີ ປະເທດຝຣັ່ງ.
ມີການລາຍງານວ່າ ກຸ່ມຄົນຮ້າຍໄດ້ຈັບມັດຕົວ ຈານລຸຍຈິ ດອນນາຣຸມມ່າ ແລະ ແຟນຂອງລາວ ກ່ອນທີ່ຈະກວດເອົາເຄື່ອງປະດັບຫລູຫລາ, ໂມງ ແລະ ເຄື່ອງໜັງລາຄາແພງ. ລວມແລ້ວມູນຄ່າທັງໝົດຫລາຍກວ່າ 500,000 ເອີໂຣ.
ແຕ່ໂຊກດີທີ່ ຈານລຸຍຈິ ດອນນາຣຸມມ່າ ແລະ ແຟນຂອງລາວສາມາດຫລົບຫນີອອກມາໄດ້. ກ່ອນຈະໜີໄພໄປໂຮງແຮມໃກ້ຄຽງ ແລະ ຖືກນຳໂຕສົ່ງໂຮງໝໍໃນເວລາຕໍ່ມາ ຂະນະນີ້ ຕຳຫລວດຕ້ານການປົ້ນຈີ້ຂອງຝຣັ່ງ ຫລື BRB ພວມສືບສວນຫາຂໍ້ມູນ ແລະ ເກັບກຳຫລັກຖານເພື່ອຊອກຫາຜູ້ກະທຳຜິດໂດຍໄວ.
