ຮອງນາຍົກ ຊີ້ນໍາຄະນະພັກກະຊວງການຕ່າງປະເທດ ໃຫ້ຕໍານິສົ່ງຂ່າວຕາມຄວາມຈິງ ຫລີກລ່ຽງການສວຍ ໂອກາດໃຊ້ອະຄະຕິສ່ວນຕົວ ເພື່ອທັບຖົມໂຈມຕີກັນ
ໃນວັນທີ 21-22 ກໍລະກົດ 2023, ອົງຄະນະພັກກະຊວງການຕ່າງປະເທດ ຈັດກອງປະຊຸມຄົບຄະນະບໍລິຫານງານພັກ ກະຊວງການຕ່າງປະເທດ ສະໄໝທີ IV ກາງສະໄໝ, ໂດຍການເປັນປະທານຂອງ ທ່ານ ສະເຫລີມໄຊ ກົມມະສິດ ກຳມະການກົມການເມືອງສູນກາງພັກ, ເລຂາຄະນະພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ.
ກອງປະຊຸມໃນຄັ້ງນີ້, ແນໃສ່ຕີລາຄາທົບທວນຄືນການນໍາພາ-ຊີ້ນໍາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ການຈັດຕັ້ງປະຕິບັດ 2 ວາລະແຫ່ງຊາດ, ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງການຕ່າງປະເທດ, ແຜນພັດທະນາຂອງກະຊວງການຕ່າງປະເທດ 2021-2025 ມີດ້ານດີ, ດ້ານອ່ອນ, ຂໍ້ຄົງຄ້າງ ຄືແນວໃດ ແລະ ພ້ອມກັນຖອດຖອນເປັນບົດຮຽນ, ກໍານົດມາດຕະການແກ້ໄຂໃນຕໍ່ໜ້າ.
ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ໃຫ້ກຽດໂອ້ລົມ ໂດຍໄດ້ຊົມເຊີຍຕໍ່ຜົນສໍາເລັດທີ່ກະຊວງການຕ່າງປະເທດ ຍາດມາໄດ້ໃນໄລຍະ 2 ປີ ກວ່າຜ່ານມາໃນຫລາຍໆດ້ານ ໃນທ່າມກາງການປະຕິບັດໜ້າທີ່ຢູ່ໃນສະພາບແວດລ້ອມທີ່ບໍ່ເອື້ອອໍານວຍເທົ່າທີ່ຄວນ ໂດຍສະເພາະແມ່ນການລະບາດຂອງພະຍາດໂຄວິດ-19. ນອກຈາກນີ້, ທ່ານ ໄດ້ຊີ້ນໍາໃຫ້ຜູ້ເຂົ້າຮ່ວມກອງປະຊຸມ ຕ້ອງເຂົ້າຮ່ວມຢ່າງຕັ້ງໜ້າ, ດ້ວຍຄວາມຮັບຜິດຊອບສູງ, ປະກອບຄໍາຄິດຄໍາເຫັນຢ່າງພາວະວິໄສ, ຕໍານິສົ່ງຂ່າວຕາມຄວາມເປັນຈິງ ແນໃສ່ກໍ່ສ້າງເຊິ່ງກັນ ແລະກັນ, ຫລີກລ່ຽງການສວຍໂອກາດນໍາໃຊ້ອະຄະຕິສ່ວນຕົວ ເພື່ອໃສ່ຮ້າຍປ້າຍສີ ຫລື ທັບຖົມໂຈມຕີກັນ. ນອກຈາກນັ້ນ, ການນໍາສະເໜີຈຸດອ່ອນ ຂໍ້ຄົງຄ້າງຕ່າງໆ ໃຫ້ສະເໜີວິທີການທີ່ຕົນເອງເຫັນວ່າຈະສາມາດແກ້ໄຂບັນຫາດັ່ງກ່າວໄດ້ ເພື່ອກອງປະຊຸມຈະໄດ້ສັງລວມ ແລະ ນໍາໄປພິຈາລະນາ ເຖິງຄວາມເປັນໄປໄດ້ໃນການນໍາໄປຈັດຕັ້ງປະຕິບັດຕົວຈິງ.
