ພາສີ ແຂວງສະຫວັນນະເຂດ ເປີດປະມູນຖ່ານດໍາດັງໄຟເກືອບ 681,750 ໂຕນ ເພື່ອນໍາເງິນມອບເຂົ້າງົບປະມານ
ພາສີປະຈໍາແຂວງສະຫວັນນະເຂດ ໄດ້ອອກແຈ້ງການສະບັບເລກທີ 1523/ພສຂ.ສຂ ລົງວັນທີ 17 ກໍລະກົດ 2023 ວ່າ: ພາສີປະຈໍາແຂວງຈະໄດ້ນໍາເອົາສິນຄ້າທີ່ໄດ້ອະນຸມັດຕົກເປັນຂອງລັດອອກປະມູນຂາຍ ເພື່ອນໍາເງິນມອບເຂົ້າງົບປະມານຕາມລະບຽບກົດໝາຍ, ເຊິ່ງສິນຄ້າທີ່ນໍາມາປະມູນຄັ້ງນີ້ມີປະເພດຖ່ານດໍາດັງໄຟ 681,750 ໂຕນ (27.070 ກະສອບ).
ສໍາລັບເງື່ອນໄຂຜູ້ເຂົ້າຮ່ວມປະມູນຊື້ຕ້ອງເປັນບຸກຄົນ, ນິຕິບຸກຄົນທີ່ມີອະນຸຍາດດໍາເນີນທຸລະກິດກ່ຽວກັບຖ່ານດັງໄຟ ແລະ ມີອະນຸຍາດຖືກຕ້ອງ, ຄົບຖ້ວນຕາມລະບຽບກົດຫມາຍຂອງ ສປປ ລາວ ທີ່ມີຜົນບັງຄັບໃຊ້ໃນປັດຈຸບັນ, ຜູ້ທີ່ມີຄວາມສົນໃຈສາມາດເຂົ້າໄປພົວພັນນໍາຂະແໜງກວດກາ ແລະ ກວດສອບຄືນການແຈ້ງພາສີ ສະຖານທີ່ຕັ້ງຢູ່ຫ່າງຈາກດ່ານສາກົນຂົວມິດຕະພາບລາວ-ໄທແຫ່ງທີ 2 ປະມານ 2 Km, ເລີ່ມແຕ່ ວັນທີ 18 ກໍລະກົດ 2023 ຫາວັນທີ 20 ກໍລະກົດ 2023 ຕາມວັນລັດຖະການ, ຖ້າກາຍກໍານົດດັ່ງກ່າວຈະບໍ່ຮັບພິຈາລະນາ, ກໍານົດມື້ເປີດຊອງ ວັນທີ 21 ກໍລະກົດ 2023, ເວລາ 9:30 ໂມງ.
