ຟີລິບປິນ ຮອງຮັບນັກທ່ອງທ່ຽວຕ່າງປະເທດກວ່າ 3 ລ້ານເທື່ອຄົນ ເຊິ່ງສະແດງເຖິງການຟື້ນຕົວທີ່ເຂັ້ມແຂງຢ່າງຕໍ່ເນື່ອງ ຂອງຂະແໜງການທ່ອງທ່ຽວ

ສຳນັກຂ່າວຊິນຮວາລາຍງານວັນທີ 20 ກໍລະກົດ 2023 ກົມການທ່ອງທ່ຽວ ຂອງຟີລິບປິນ ໄດ້ລາຍງານ ຈຳນວນນັກທ່ອງທ່ຽວ ຕ່າງປະເທດ ເດີນທາງມາຢ້ຽມຢາມ ຟີລິບປິນ ບັນລຸຫລາຍກວ່າ 3 ລ້ານເທື່ອຄົນ ໃນໄລຍະ 6 ເດືອນຕົ້ນປີນີ້ (ເດືອນມັງກອນ-ເດືອນມິຖຸນາ).
ທ່ານ ຄຣິສຕິນາ ກາຣເຊຍ-ຟຣາສໂກ ເລຂາທິການ ກົມການທ່ອງທ່ຽວ ຟີລິບປິນ ກ່າວວ່າ: ຟີລິບປິນ ຮອງຮັບນັກທ່ອງທ່ຽວ ຕ່າງປະເທດ 3.000.079 ເທື່ອຄົນ ເລີ່ມຕັ້ງແຕ່ ວັນທີ 1 ມັງກອນ ຫາວັນທີ 19 ມິຖຸນາ, ເຊິ່ງສະແດງເຖິງ ການຟື້ນຕົວ ທີ່ເຂັ້ມແຂງ ຢ່າງຕໍ່ເນື່ອງ ຂອງຂະແໜງການທ່ອງທ່ຽວ, ພ້ອມທັງກ່າວ ລະບຸຕື່ມວ່າ ການທ່ອງທ່ຽວ ຊ່ວຍຊຸກຍູ້ ການຈ້າງງານ ແລະ ຊີວິດການເປັນຢູ່ ຂອງປະຊາຊົນ ຟີລິບປິນ ຫລາຍລ້ານຄົນ.