ກົມຄຸ້ມຄອງເງິນຕາຕ່າງປະເທດ ເຜີຍແຜ່ຄຳສັ່ງ ເລກທີ 10/ນຍ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາ ແນໃສ່ແກ້ໄຂສະພາບອັດຕາເງິນເຟີ້

ວັນທີ 21 ກໍລະກົດ 2023, ກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ ໄດ້ດຳເນີນການເຜີຍແຜ່ຄຳສັ່ງຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ, ເພື່ອເຮັດໃຫ້ການຄຸ້ມຄອງເງິນຕາຕ່າງປະເທດເຂົ້າສູ່ລະບົບ ແນໃສ່ແກ້ໄຂສະພາບອັດຕາເງິນເຟີ້, ມີທ່ານ ວັດທະນາ ຊານຸບານ  ຮອງຫົວໜ້າກົມຄຸ້ມຄອງເງິນຕາຕ່າງປະເທດ ພ້ອມພາກສ່ວນກ່ຽວຂ້ອງ ແລະ ບັນດາທະນາຄານທຸລະກິດເຂົ້າຮ່ວມຟັງ.

ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ

ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ ກ່າວວ່າ: ເພື່ອເຮັດໃຫ້ການຄຸ້ມຄອງເງິນຕາຕ່າງປະເທດເຂົ້າສູ່ລະບົບ, ເຮັດໃຫ້ການຊຳລະສະສາງເງິນຕາກັບຕ່າງປະເທດມີຄວາມສົມດູນຂຶ້ນ ແລະ ທັງເປັນກຳລັງແຮງໜຶ່ງໃນການສະໜັບສະໜູນການຈັດຕັ້ງປະຕິບັດນະໂຍບາຍເງິນຕາ, ອັດຕາແລກປ່ຽນໃຫ້ມີປະສິດທິຜົນ, ແນໃສ່ແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະບັນຫາອັດຕາເງິນເຟີ້, ທີ່ສັງຄົມກຳລັງປະເຊີນຢູ່ໃນປັດຈຸບັນ ໃຫ້ດີຂຶ້ນໃນຕໍ່ໜ້າ ແລະ ຮັບປະກັນສະຖຽນລະພາບທາງດ້ານເງິນຕາ.

ທ່ານ ວັດທະນາ ຊານຸບານ  ຮອງຫົວໜ້າກົມຄຸ້ມຄອງເງິນຕາຕ່າງປະເທດ

ປັດຈຸບັນກົມຄຸ້ມຄອງເງິນຕາຕ່າງປະເທດ ກຳລັງຜັນຂະຫຍາຍກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດທີ່ຜ່ານການຮັບຮອງຈາກສະພາແຫ່ງຊາດໃນປີ 2022 ແລະ ເລັ່ງເຜີຍແຜ່ຄຳສັ່ງຂອງນາຍົກລັດຖະມົນຕີ ເລກທີ 10/ນຍ ລົງວັນທີ 14 ກໍລະກົດ 2023 ເພື່ອຈັດຕັ້ງຜັນຂະຫຍາຍການຄຸ້ມຄອງເງິນຕາຕ່າງປະເທດໃຫ້ເຂົ້າສູ່ລະບົບ, ກົດໝາຍດັ່ງກ່າວໄດ້ກຳນົດຫລາຍເນື້ອໃນສຳຄັນ ໂດຍສະເພາະການຄອບຄອງ ແລະ ນຳໃຊ້ເງິນຕາຕ່າງປະເທດ, ການຕິດຕາມກະແສເງິນ ຕິດພັນກັບການນຳເຂົ້າ-ສົ່ງອອກ ສິນຄ້າ ຫລື ການບໍລິການ, ລາຍຮັບຂອງຜູ້ອອກແຮງງານ, ການລົງທຶນໂດຍກົງຂອງຕ່າງປະເທດ ຢູ່ ສປປ ລາວ, ການລາຍງານກ່ຽວກັບເງິນຝາກຢູ່ຕ່າງປະເທດ ແລະ ການບໍລິການແລກປ່ຽນເງິນຕາ, ນອກນີ້, ກໍໄດ້ມອບໃຫ້ບັນດາກະຊວງຕ່າງໆມີສ່ວນຮ່ວມ, ເປັນເຈົ້າການຮັບຜິດຊອບ ໃຫ້ເພື່ອສັງຄົມ ເປັນຕົ້ນແມ່ນການຕິດປະກາດຂາຍ, ລາຄາສິນຄ້າ ແລະ ການຊຳລະສິນຄ້າຕ່າງໆຢູ່ພາຍໃນຕ້ອງເປັນເງິນກີບ.