ມີຜູ້ເສຍຊີວິດ 3 ຄົນຈາກເຫດການດິນເຈື່ອນຢູ່ເມືອງແມດແຂວງວຽງຈັນ
ແຫລ່ງຂ່າວທ້ອງຖິ່ນລາຍງານໃຫ້ຮູ້ວ່າ: ເມື່ອເວລາປະມານ 15:00 ໂມງຂອງວັນທີ 18 ກັນຍາຜ່ານມານີ້, ໄດ້ເກີດເຫດດິນເຈື່ອນຢູ່ເສັ້ນທາງເຂດບ້ານຫາດຍາວເມືອງແມດແຂວງວຽງຈັນ ແລະ ໄດ້ທັບຄົນທີ່ພວມກໍາລັງຂີ່ລົດຈັກຜ່ານບໍລິເວນດັ່ງກ່າວ, ເຮັດໃຫ້ມີຜູ້ເສຍຊີວິດ 3 ຄົນຄື: ຮ້ອຍໂທ ສຸລິຍາ ສີວິໄລ ອາຍຸ 25 ປີຢູ່ບ້ານຊ້າງໃໝ່ເມືອງໂພນໂຮງ, ວາທີ ບຸນເລີດ ບຸນຍະວົງ ອາຍຸ 31 ປີຢູ່ບ້ານນາເທົາເມືອງແມດ ແລະ ທ້າວ ນ້ອຍ ອາຍຸ 50 ປີຢູ່ບ້ານວຽງແກ້ວເມືອງກາສີແຂວງວຽງຈັນ.
ເຈົ້າໜ້າທີ່ ປກສ ເມືອງແມດ ໃຫ້ຮູ້ວ່າ: ພາຍຫລັງຮູ້ວ່າມີຜູ້ເສຍຊີວິດຈາກເຫດການດັ່ງກ່າວ, ຈຶ່ງໄດ້ຮີບຮ້ອນປະສານສົມທົບກັບອໍານາດການປົກຄອງເມືອງນໍາເອົາລົດຈົກ 2 ຄັນ ແລະ ກໍາລັງຊາວໜຸ່ມຈໍານວນຫລາຍຊ່ວຍຄົ້ນຫາຜູ້ເສຍຊີວິດ ແລະ ໃຊ້ເວລາຫລາຍຊົ່ວໂມງຈຶ່ງສາມາດຄົ້ນພົບຮ່າງຜູ້ເສຍຊີວິດໄດ້, ກ່ອນມອບໃຫ້ຍາດພີ່ນ້ອງນໍາໄປປະກອບພິທີທາງສາສະໜາ.
ເຈົ້າໜ້າທີ່ໃຫ້ຮູ້ວ່າ: ກ່ອນໜ້ານີ້, ໄດ້ມີຝົນຕົກຕິດຕໍ່ກັນຫລາຍວັນໃນເຂດເມືອງແມດ, ຊຶ່ງເປັນສາເຫດພາໃຫ້ດິນພູເຈື່ອນໄດ້ງ່າຍ ແລະ ຂໍເຕືອນຜູ້ສັນຈອນໄປມາໃນໄລຍະໜ້າຝົນນີ້, ໂດຍສະເພາະການເດີນທາງເຂດພາກເໜືອ ຈົ່ງມີສະຕິລະວັງຈາກສະພາບດິນເຈື່ອນດັ່ງກ່າວ.
