ແຮງງານລາວຢູ່ ສ.ເກົາຫລີ ປອດໄພທຸກຄົນ ຈາກນໍ້າຖ້ວມໃຫຍ່ ມີພຽງບາງສ່ວນໄດ້ຢຸດງານຊົ່ວຄາວ
ທ່ານ ບຸນສວນ ໄຊຍະສິດ, ຫົວໜ້າພະແນກຈັດຫາງານໄປຕ່າງປະເທດ, ກົມຈັດຫາງານ, ກະຊວງແຮງງານແລະ ສະຫວັດດີການສັງຄົມ ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 19 ກໍລະກົດ 2023 ວ່າ: ຈາກເຫດການນໍ້າຖ້ວມຮ້າຍແຮງ ຍ້ອນຝົນຕົກໜັກຢ່າງຕໍ່ເນື່ອງຢູ່ ແຂວງກິຢອງຊາງເໜືອ ແລະ ເຂດອື່ນໆ ໃນ ສ.ເກົາຫຼີ ນັບແຕ່ວັນທີ 15 ກໍລະກົດ 2023 ເປັນຕົ້ນມາ ເຮັດໃຫ້ມີຜູ້ເສຍຊີວິດ ແລະ ສ້າງຄວາມເສຍຫາຍຕໍ່ຊັບສິນເປັນຈຳນວນຫລາຍ. ໃນນັ້ນ ມີແຮງງານລາວຈໍານວນໜຶ່ງໄດ້ຮັບຜົນກະທົບເລັກນ້ອຍເພາະຕ້ອງໄດ້ຢຸດວຽກຊົ່ວຄາວ.
ແຮງງານລາວທີ່ສົ່ງໄປເຮັດວຽກຢູ່ ສ.ເກົາຫລີ ມີ 2 ລະບົບ ຄື: ລະບົບໄລຍະຍາວ 3-5 ປີ ເຊິ່ງມີຕົວເລກສະສົມແຕ່ປີ 2022 ມາຮອດປັດຈຸບັນ ທັງໝົດ 1.185 ຄົນ, ຍິງ 248 ຄົນ, ທຸກຄົນແມ່ນປອດໄພ ແລະ ບໍ່ໄດ້ຮັບຜົນກະທົບຫຍັງຈາກສະພາບນໍ້າຖ້ວມທີ່ເກີດຂຶ້ນຢູ່ ສ.ເກົາຫລີ ເນື່ອງຈາກເຂົາເຈົ້າເຮັດວຽກຢູ່ໃນຂົງເຂດອຸດສາຫະກໍາຂະໜາດນ້ອຍ ແລະ ກາງທີ່ບໍ່ຕິດພັນກັບຂົງເຂດທີ່ເກີດນໍ້າຖ້ວມ.
ສ່ວນອີກໜຶ່ງລະບົບ ແມ່ນການເຮັດວຽກຕາມລະດູການໄລຍະສັ້ນ 5 ເດືອນ, ເຊິ່ງປັດຈຸບັນມີແຮງງານລາວເຮັດວຽກຢູ່ ສ.ເກົາຫລີ 1.356 ຄົນ, ຍິງ 598 ຄົນ. ເຊິ່ງຜ່ານການເກັບກໍາຂໍ້ມູນເຫັນວ່າຜູ້ທີ່ໄດ້ຮັບຜົນກະທົບຈາກສະພາບນໍ້າຖ້ວມ ແມ່ນຜູ້ທີ່ເຮັດວຽກຢູ່ 3 ເມືອງທາງພາກເໜືອຂອງ ສ.ເກົາຫລີ ຄື:
1). ເມືອງ ຊຸງຈູ ມີແຮງງານລາວເຮັດວຽກຢູ່ 28 ຄົນ, ຍິງ 8 ຄົນ.
2). ເມືອງຈອງຊອນ ແຂວງກັງວອນ ທີ່ມີແຮງງານລາວໄປເຮັດວຽກຢູ່ຈໍານວນ 2 ຊຸດ ຄື: ຊຸດທີ 1, ເລີ່ມໄປແຕ່ວັນທີ 6 ເມສາ 2023 ຈໍານວນ 110 ຄົນ, ຍິງ 36 ຄົນ ແລະ ຊຸດທີ 2 ເລີ່ມໄປແຕ່ວັນທີ 22 ພຶດ ສະພາ 2023 ຈໍານວນ 113 ຄົນ, ຍິງ 71 ຄົນ
3). ເມືອງຊອງຢາງ, ແຂວງ ຊຸງຊອງນຳໂດ ມີແຮງງານລາວເຮັດວຽກຢູ່ 17 ຄົນ, ຍິງ 13 ຄົນ.
ແຮງງານລາວທັງໝົດທີ່ເຮັດວຽກຢູ່ 3 ເມືອງດັ່ງກ່າວ ທຸກຄົນແມ່ນປອດໄພດີ ແລະ ບໍ່ມີໃຜໄດ້ຮັບບາດເຈັບຫຍັງ, ແຕ່ຕ້ອງໄດ້ພັກວຽກຊົ່ວຄາວຢ່າງໜ້ອຍ 2-3 ວັນ ເພາະສະພາບນໍ້າຖ້ວມ.
ຫົວໜ້າພະແນກຈັດຫາງານໄປຕ່າງປະເທດ ໃຫ້ຮູ້ຕື່ມວ່າ: ປັດຈຸບັນສະພາບນໍ້າຖ້ວມຢູ່ ສ.ເກົາຫລີ ເລີ່ມກັບຄືນສູ່ສະພາບປົກກະຕິ ເຮັດໃຫ້ເຈົ້າຂອງບັັນດາຟາມຢູ່ທັງ 3 ເມືອງ ເລີ່ມຟື້ນຟູຟາມເພື່ອກັບເຂົ້າສູ່ການຜະລິດໃຫ້ໄວທີ່ສຸດ. ຢ່າງໃດກໍຕາມ ໃນດ້ານນະໂຍບາຍຕ່າງໆ ສໍາລັບແຮງງານລາວທີ່ຕ້ອງພັກວຽກໃນໄລຍະນໍ້າຖ້ວມ ແລະ ຟື້ນຟູຫລັງ ນໍ້າຖ້ວມ, ກະຊວງ ແຮງງານ ແລະ ສະຫວັດດີການສັງຄົມຂອງລາວ ພວມປະສານສົມທົບກັບອົງການປົກຄອງທ້ອງຖິ່ນທີ່ກ່ຽວຂ້ອງຂອງ ສ.ເກົາຫລີ ທີ່ຮັບຜິດຊອບກ່ຽວກັບລະບຽບການ ຫລື ນະໂຍບາຍ ເພື່ອຊ່ວຍເຫລືອແຮງງານລາວທີ່ຕ້ອງພັກວຽກຊົ່ວຄາວ ຍ້ອນເຂົາເຈົ້າມີລາຍຮັບເປັນລາຍເດືອນ, ຖ້າບໍ່ໄດ້ເຮັດວຽກກໍຈະບໍ່ມີລາຍຮັບ, ເຊິ່ງປັດຈຸບັນຍັງລໍຖ້າຄໍາຕອບຈາກຝ່າຍທີ່ກ່ຽວຂ້ອງຂອງ ສ.ເກົາຫລີ.
