ຫົວໜ້າຄະນະຄຸມຄອງດ່ານສາກົນ ຂົວມິດຕະພາບແຫ່ງທີ 2 ໃຫ້ສຳພາດກໍລະນີມີຜູ້ໄດ້ເສຍຄ່າຈ້ຳ ພາສປອດ ຂາອອກ-ເຂົ້າປະເທດລາວ ລວມ 400 ບາດໄທ
ວັນທີ 17 ກໍລະກົດ 2023 ຜ່ານມານີ້ມີກະແສໃນສື່ສັງຄົມອອນລາຍ ກໍລະນີໄດ້ເສຍຄ່າຈ້ຳກາ ພາສສະປອດ ຂາອອກ-ເຂົ້າປະເທດ (ຝັ່ງລາວ) ຢູ່ດ່ານຂົວມິດຕະພາບແຫ່ງທີ 2 ສະຫວັນນະເຂດ-ມຸກດາຫານ ລວມເປັນ 400 ບາດ(ສະກຸນເງິນໄທ).
ເຊິ່ງເນື້ອໃນກ່າວເຖິງຜູ້ໃຫ້ຂໍ້ມູນວ່າ: ຕົນໄດ້ຈ່າຍຄ່າຈ້ຳກາ ພາສປອດ ທັງຕອນອອກ ແລະ ເຂົ້າປະເທດຄັ້ງລະ 200ບາດ, ລວມເປັນເງິນທັງໝົດ 400 ບາດ(ໄທ) ທັງໝົດແມ່ນເກີດຂຶ້ນຢູ່ຝັ່ງລາວ ເລີຍຝາກຖາມຫລາຍຄົນວ່າ: ຜ່ານດ່ານດັ່ງກ່າວກໍໄດ້ເສຍຄ່າຈໍ້າກາຄືກັນບໍ່? ຕາມປົກກະຕິແມ່ນຄິດວ່າບໍ່ໄດ້ເສຍຄ່າຈ້ຳກາ ພາສປອດ, ບໍ່ວ່າຈະເປັນການຈ້ຳກາອອກ-ຈ້ຳເຂົ້າ, ຕາມທີ່ເຄີຍເຂົ້າ-ອອກດ່ານອື່ນໆທີ່ເຄີຍໄປມາ ແຕ່ລະດ່ານກໍບໍ່ເຄີຍໄດ້ເສຍຄ່າຈ້ຳກາ ພາສປອດ, ດ້ວຍຄວາມບໍ່ເຂົ້າໃຈການເກັບເງິນຄ່າຈ້ຳກາຢູ່ດ່ານສະຫວັນນີ້ ຕົນຈຶ່ງໄດ້ຖາມເຈົ້າໜ້າທີ່ແຖວນັ້ນ ແລະ ໄດ້ຄຳຕອບວ່າ: ປົກກະຕິຄົນອື່ນເຂົາກະໄດ້ຈ່າຍ ໄດ້ເສຍຄ່າຈ້ຳກາກັນຄືກັນໝົດ, ຖ້າບໍ່ຢາກເສຍແມ່ນໃຫ້ໄປລົມກັບຫົວໜ້າ ເຊິ່ງທາງຫົວໜ້າກໍໄດ້ຖາມກ່ຽວກັບຂໍ້ມູນຕົນເປັນຄົນບ້ານໃດ? ຈຸດປະສົງເຖິງການເດີນທາງໄປໄທ ແລະ ຕົນກໍໄດ້ຕອບຕາມຄວາມຈິງໝົດ. ຫຼັງຈາກນັ້ນ, ຕົນກໍໄດ້ອອກຈາກຫ້ອງນັ້ນມາຈ່າຍຄ່າຈ້ຳກາ ພາສປອດ.
ເມື່ອຕອນຈະໄປໄທກໍໄດ້ຈ່າຍຄ່າຈ້ຳກາ ພາສປອດຄືກັນ ເຊິ່ງລວມແລ້ວຕົນໄດ້ຈ່າຍຄ່າຈໍ້າກາເຂົ້າ-ຈ້ຳກາອອກ ຢູ່ດ່ານສະຫວັນນະເຂດ(ຝັ່ງລາວ) ລວມ 400ບາດໄທ. ຂໍຝາກມາຖາມຜູ້ຮູ້ ແລະ ພາກສ່ວນກ່ຽວຂ້ອງວ່າ: ເປັນຫຍັງຄືມີການເກັບຄ່າຈ້ຳກາ ພາສປອດ ເຂົ້າ – ອອກ ຂົວມິດຕະພາບແຫ່ງທີ 2 (ຕມ ສະຫວັນນະເຂດ) ແລະ ຂ້ອຍກະແມ່ນຄົນລາວ ຢາກຮູ້ວ່າເປັນການເກັບເງິນແບບໃດບໍ່ມີບິນ ຫຼື ມີໃບແຈ້ງການຫຍັງບໍ່?
ພາຍຫລັງມີການເຜີຍແຜ່ຂ່າວອອກສູ່ສັງຄົມອອກລາຍ ກໍກາຍເປັນປະເດັນທີ່ມີການເວົ້າເຖິງຈຳນວນຫລາຍຢູ່ໃນສື່ສັງຄົມອອນລາຍ ແລະ ມີການວິພາກວິຈານກັນໄປຕ່າງໆນານາ.
ຫລ້າສຸດວັນທີ 18 ກໍລະກົດ 2023 ນີ້, ທ່ານ ພັນໂທ ລຳພົງ ໄຊທອງ ຫົວໜ້າຄະນະຄຸມຄອງດ່ານຂົວມິດຕະພາບແຫ່ງທີ 2 ສະຫວັນນະເຂດ-ມຸກດາຫານ ໄດ້ໃຫ້ສຳພາດຕໍ່ທີມຂ່າວໜັງສືພິມ ລາວພັດທະນາ ວ່າ: ທາງດ່ານຂົວມິດຕະພາບແຫ່ງທີ 2 ບໍ່ໄດ້ມີການອະນຸຍາດໃຫ້ເກັບຄ່າຈ້ຳກາໜັງສືຜ່ານດ່ານ, ຖືວ່າຈ້ຳກາ ພາສປອດ ເຂົ້າ-ອອກ ແມ່ນບໍ່ເສຍຄ່າໃຊ້ຈ່າຍຈັກກີບ ທາງເຈົ້າໜ້າທີ່ຈະຈ້ຳໃຫ້ຟຮີ.
ຕະຫລອດໄລຍະຜ່ານມາທາງດ່ານກໍໄດ້ເຜີຍແຜ່ລັດຖະບັນຍັດເລກທີ 002 ຂອງປະທານປະເທດ ແລະ ແຈ້ງຕໍ່ຂະແໜງການກ່ຽວຂ້ອງປະຈຳດ່ານ ໂດຍສະເພາະກັບຂະແໜງກວດຄົນເຂົ້າ-ອອກເມືອງປະຈຳດ່ານ ບໍ່ອະນຸຍາດເຈົ້າໜ້າທີ່ຂະແໜງດັ່ງກ່າວເກັບຄ່າບໍລິການ ຫລື ຄ່າທຳນຽມເຂົ້າ-ອອກ ສຳລັບຜູ້ໃຊ້ ພັດສະປອດ ໂດຍເດັດຂາດ.
ທ່ານ ພັນໂທ ລຳພົງ ໄຊທອງ ຍັງໃຫ້ຮູ້ຕື່ມວ່າ: ຕໍ່ປະເດັນທີ່ປາກົດເປັນຂ່າວແມ່ນກຳລັງດຳເນີນການກວດກາ ເພື່ອໃຫ້ຄວາມເປັນທຳຕໍ່ທັງສອງຝ່າຍ ຖ້າການກວດກາຫາກພົບວ່າມີມູນຄວາມຈິງ ທີ່ປາກົດວ່າເຈົ້າໜ້າທີ່ທ່ານໃດຫາກກະທຳຄວາມຜິດຕາມການກ່າວຫາແທ້ ທາງການຈັດຕັ້ງກໍຈະປະຕິບັດວິໄນຢ່າງເຂັມງວດ, ບໍ່ມີການລະເວັ້ນຕໍ່ຜູ້ກະທຳຜິດ, ເຖິງແມ່ນວ່າຜູ້ທີ່ກະທຳຜິດນັ້ນຈະແມ່ນໃຜ ຫລື ຕຳແໜ່ງ, ຊັ້ນໃດກໍຕາມ ຕ້ອງຖືກປະຕິບັດວິໄນຕາມກົດໝາຍ ແລະ ລະບຽບການ.
ຄາດວ່າຜົນການກວດກາບັນຫາດັ່ງກ່າວຈະສຳເລັດໂດຍໄວນີ້ ແລະ ຈະມີການແຈ້ງຕາມຂັ້ນຕອນ ແລະ ຈະມີການເຜີຍແຜ່ຊີ້ແຈງຕໍ່ສັງຄົມຕື່ມອີກພາຍຫລັງ.
