ຂະແໜງການເງິນ ຫັນວຽກງານລວມສູນລາຍຮັບ ແລະ ຄຸ້ມຄອງລາຍຮັບໃຫ້ເປັນທັນສະໄໝ ເພື່ອແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ
ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ ລາຍງານໃນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກກະຊວງການເງິນ ສະໄໝທີ III ທີ່ຈັດຂຶ້ນວັນທີ 13-15 ກໍລະກົດ 2023 ວ່າ: ໄລຍະປີ (2021-2023), ອົງຄະນະພັກກະຊວງການເງິນ ໄດ້ເອົາໃຈໃສ່ ນໍາພາ-ຊີ້ນໍາ ດ້ານວຽກງານວິຊາສະເພາະຕາມພາລະບົດບາດ, ຂອບເຂດສິດເປັນຕົ້ນ ການປະຕິບັດແຜນງົບປະມານແຫ່ງລັດ; ແຕ່ລະປີໄດ້ສືບຕໍ່ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນທີ່ສະສົມມາຍາວນານ, ບັນຫາໜີ້ສິນສາທາລະ ນະ, ລາຄາພະລັງງານ, ລາຄາສິນຄ້າ-ບໍລິການ ແລະ ໄພເງິນເຟີ້ ທີ່ເພີ່ມຂຶ້ນສູງໃນຮອບຫລາຍສິບປີ, ເຊິ່ງມີຜົນກະທົບທາງກົງ ແລະ ທາງອ້ອມ ຕໍ່ການປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ.
ນໍາພາ-ຊີ້ນໍາ ການຈັດຕັ້ງ ປະຕິບັດກົນໄກ, ລະບຽບການ ເພື່ອແກ້ໄຂການຮົ່ວໄຫລຂອງລາຍຮັບຈາກການນໍາເຂົ້ານໍ້າມັນເຊື້ອໄຟ, ເຄື່ອງກໍ່ສ້າງ, ເຄື່ອງໄຟຟ້າ, ເຄື່ອງອຸປະໂພກ-ບໍລິໂພກ, ຜ່ານມາໄດ້ນໍາໃຊ້ລະບົບທີ່ທັນສະໄໝໃນການແຈ້ງພາສີແບບເອເລັກໂຕຣນິກ, ການຄຸ້ມຄອງສາງສິນຄ້າ, ການເຊື່ອມໂຍງຂໍ້ມູນການບັນທຶກການຊື້-ຂາຍ ເພື່ອດັດສົມບໍລິສັດຂາເຂົ້າ-ຂາອອກ ທີ່ເຄື່ອນໄຫວບໍ່ຖືກຕາມກົດໝາຍ ແລະ ລະບຽບການ ໃຫ້ເຂົ້າສູ່ການປະຕິບັດກົດໝາຍຢ່າງເຂັ້ມງວດ.
ປັດຈຸບັນ, ກະຊວງການເງິນ ໄດ້ປັບປຸງຍົກລະດັບລະບົບ ອາຊີກູດາ (ASYCUDA) ມາເປັນລະບົບດຽວກັບ NSWA+ (ລະບົບແຈ້ງພາສີປະຕູດຽວແຫ່ງຊາດ ອາຊີກູດາ ພລາສ), ເປັນລະບົບຕິດຕາມ, ກວດກາ ແລະ ຄຸ້ມຄອງ ການນໍາເຂົ້າ-ສົ່ງອອກສິນຄ້າ ແຈ້ງພາສີເປັນລາຍລະອຽດ ແບບເອເລັກໂຕຣນິກ ຕາມມາດຕະຖານສາກົນ; ໄດ້ທົດລອງການແຈ້ງພາສີ ຢູ່ດ່ານທ່າບົກທ່ານາແລ້ງ ແລະ ຂົວມິດຕະພາບແຫ່ງທີ I. ພ້ອມທັງສໍາເລັດການຝຶກອົບຮົມການນໍາໃຊ້ລະບົບດັ່ງກ່າວຢູ່ບັນດາແຂວງ ທົ່ວປະເທດ; ປັບປຸງ ແລະ ພັດທະນາຖານໂມດຸນ ຂອງລະບົບຄຸ້ມຄອງອາກອນທັນສະໄໝ (TaxRIS) ທີ່ສາມາດເຊື່ອມໂຍງກັບ ລະບົບ ອາຊີກູດາ, ເຊື່ອມຕໍ່ລະບົບຂອງກະຊວງແຮງງານ ແລະ ສະຫວັດດີການສັງຄົມ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ລະບົບຖານຂໍ້ມູນທີ່ດິນ LaoLandReg 7.0. ພ້ອມນັ້ນ, ໄດ້ປັບປຸງລະບົບຄຸ້ມຄອງເກັບຄ່າທໍານຽມທາງ ແລະ ພາສີທີ່ດິນ, ຄ່າທໍານຽມລາຍຮັບບໍລິຫານວິຊາການຢູ່ກົມກົງສຸນ, ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງວຽງຈັນ ແລະ ບັນດາໂຮງໝໍໃຫຍ່. ເປີດນໍາໃຊ້ ລະບົບສ່ວຍສາອາກອນທັນສະໄໝ (TaxRIS Dashboard Monitoring) ເຊື່ອມຕໍ່ໄປຫາ 18 ແຂວງ, 148 ເມືອງ ແລະ 6 ເຂດເສດຖະກິດພິເສດ ທົ່ວປະເທດ, ປັບປຸງລະບົບ ການເສຍຄ່າທໍານຽມທາງ ດ້ວຍການເປີດທົດລອງໃຫ້ບໍລິການຢູ່ ກົມຄຸ້ມຄອງພາຫະນະ ແລະ ການຂົນສົ່ງ ແລະ ບັນດາເມືອງ ຂອງນະຄອນຫລວງວຽງຈັນ; ເປີດນໍາໃຊ້ ການບໍລິ ການຊໍາລະຄ່າພາສີທີ່ດິນ ຜ່ານລະບົບທະນາຄານການຄ້າຕ່າງປະເທດລາວ ມະຫາຊົນ ແລະ ປັບປຸງລະບົບການເຊື່ອມຕໍ່ໂດຍກົງ ຫາຖານຂໍ້ມູນທີ່ດິນແຫ່ງຊາດ ຂອງກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ.
