Twitter ສູນເສຍລາຍໄດ້ໂຄສະນາໄປເກືອບເຄິ່ງ ຫລັງ ອີລອນ ມັສ ຂຶ້ນມາບໍລິຫານ
Twitter ສູນເສຍລາຍໄດ້ຈາກການໂຄສະນາໄປເກືອບເຄິ່ງໜຶ່ງ ນັບແຕ່ບໍລິສັດຖືກ ອີລອນ ມັສ ຊື້ໄປໃນລາຄາ 4,4 ໝື່ນລ້ານໂດລາ ໃນເດືອນຕຸລາຂອງປີຜ່ານມາ.
ມັສ ກ່າວວ່າ: ລາຍໄດ້ຂອງບໍລິສັດໃນເດືອນມິຖຸນາບໍ່ໄດ້ເພີ່ມຂຶ້ນແບບທີ່ຄາດຄະເນເອົາໄວ້, ແຕ່ຄວາມຫວັງຍັງເຫລືອຢູ່. ທ່ານກ່າວອີກວ່າ: ລາຍໄດ້ໃນເດືອນກໍລະກົດ “ມີທ່າອ່ຽງດີຂຶ້ນເລັກໜ້ອຍ” ໂດຍມີທ່າອ່ຽງຈະສ້າງລາຍໄດ້ເຖິງ 3 ພັນລ້ານໂດລາ ໃນປີ 2023 ເຖິງວ່າໂຕເລກດັ່ງກ່າວຈະຫລຸດລົງຈາກລະດັບຂອງປີ 2021 ທີ່ມີ 5,1 ພັນລ້ານໂດລາ ເຊິ່ງເປັນໄລຍະກ່ອນທີ່ ມັສ ຈະຂຶ້ນມາບໍລິຫານກໍຕາມ.
ປັດຈຸບັນ Twitter ມີໜີ້ສິນຂ້ອນຂ້າງສູງ. ອີກທັງຍັງມີສະພາບຄ່ອງທາງການເງິນທີ່ຕິດລົບ ໂດຍ ມັສ ເຄີຍກ່າວວ່າ: “Twitter ຕ້ອງເຮັດໃຫ້ສະພາບຄ່ອງທາງການເງິນດີກ່ອນ ກ່ອນຈະສາມາດສ້າງອັນອື່ນໄດ້”.
ເຖິງຢ່າງໃດກໍຕາມ, ມັສ ອ້າງວ່າ: ລາຍຈ່າຍຂອງບໍລິສັດຫລຸດລົງຫລາຍ ເຊິ່ງເປັນຜົນມາຈາກການຫລຸດຄ່າໃຊ້ຈ່າຍດ້ານບໍລິການຄລາວ (Cloud Servive) ແລະ ການຫລຸດພະນັກງານຄັ້ງໃຫຍ່ຈຳນວນ 7.500 ຄົນ ຫລື ກວ່າເຄິ່ງໜຶ່ງຂອງບໍລິສັດ ຫລັງຈາກທ່ານດຳລົງຕຳແໜ່ງເປັນຜູ້ບໍລິຫານຂອງ Twitter ໃນປີຜ່ານມາ.
ແຕ່ເຖິງຢ່າງນັ້ນຜູ້ຊ່ຽວຊານເບິ່ງວ່າ: ສະຖິຕິທາງການເງິນຂອງ Twitter ຖືເປັນດັດຊະນີຊີ້ວັດທີ່ສາມາດສະທ້ອນໄດ້ເປັນຢ່າງດີວ່າ: ມາດຕະການຫລຸດຕົ້ນທຶນຢ່າງວ່ອງໄວ ແລະ ສຸດໂຕ່ງນັ້ນບໍ່ພຽງພໍຈະທົດແທນຈຳນວນເງິນຈາກລາຍໄດ້ໂຄສະນາ ລວມທັງຍັງບໍ່ສາມາດດຶງດູດລູກຄ້າທີ່ຈະລົງໂຄສະນາກັບ Twitter ໃຫ້ກັບມາໄດ້ ຫລັງຈາກພວກເຂົາບໍ່ພໍໃຈທີ່ ມັສ ປ່ຽນແປງນະໂຍບາຍດ້ານການຈັດການຄອນເທນໃໝ່. ເຖິງວ່າໃນເດືອນເມສາຜ່ານມາ ມັສ ເຄີຍໃຫ້ສຳພາດຕໍ່ສຳນັກຂ່າວ BBC ວ່າລູກຄ້າກຸ່ມດັ່ງກ່າວກັບມາໃຊ້ບໍລິການ Twitter ແລ້ວກໍຕາມ.
ເມການາ ດາຣ໌ ເຈົ້າຂອງບໍລິສັດຄູ່ແຂ່ງທີ່ກຳລັງມາແຮງ ຄືແອັບພລິເຄຊັນ Threads ເປີດເຜີຍຕໍ່ BBC ວ່າ: Twitter ມີບັນຫາມາແຕ່ກ່ອນ ມັສ ຈະເຂົ້າຊື້ກິດຈະການແລ້ວ ໂດຍລະບຸວ່າ: “ເພື່ອຄວາມຍຸຕິທຳຕໍ່ ອີລອນ ຕ້ອງບອກແບບນີ້ວ່າ: ລາຍໄດ້ຂອງ Twitter ນັ້ນຫລຸດລົງຢ່າງຕໍ່ເນື່ອງ ນັບແຕ່ກ່ອນ ອີລອນ ຂຶ້ນມາບໍລິຫານ”.
ເຖິງຢ່າງໃດກໍຕາມ, ລູຊີ ຄູດສ໌ ຜູ້ອຳນວຍການດ້ານການລົງທຶນຂອງ JM Finn ເບິ່ງວ່າ: ມີໂອກາດທີ່ ມັສ ຈະສາມາດພິກປີ້ນລາຍໄດ້ຂອງ Twitter ໃຫ້ກັບມາໄດ້ “ແຕ່ອາດຈະຕ້ອງໃຊ້ເວລາດົນ”. ພ້ອມລະບຸອີກວ່າ: “ໂຊກບໍ່ດີທີ່ລາວມີໜີ້ສິນເຖິງ 1,3 ໝື່ນລ້ານໂດລາ ທີ່ຕ້ອງຊຳລະພາຍໃນເດືອນກໍລະກົດ. ສະນັ້ນ ເຮົາອາດໄດ້ເຫັນແຮງກົດດັນທີ່ມີຕໍ່ຫຸ້ນ Tesla ໃນແງ່ທີ່ເຂົາອາດຈຳເປັນຕ້ອງຂາຍຫຸ້ນຂອງຕົນເອງໃນບໍລິສັດດັ່ງກ່າວເພີ່ມອີກ”.
ອ້າງອີງ:
www.bbc.com/news/business-66217641
