ໄຂ້ເລືອດອອກລະບາດໜັກຢູ່ບັງກະລາເທດ ເຄິ່ງເດືອນມີຜູ້ຕິດເຊື້ອຫລາຍກວ່າ 11.000 ຄົນ
ກະຊວງສາທາລະນະສຸກບັງກະລາເທດ ລາຍງານວ່າ: ສະເພາະໄລຍະເຄິ່ງທຳອິດຂອງເດືອນກໍລະກົດ ມີຜູ້ຕິດເຊື້ອພະຍາດໄຂ້ເລືອດອອກເຂົ້າຮັບການປິ່ນປົວຢູ່ໂຮງໝໍທົ່ວປະເທດຫລາຍກວ່າ 11.000 ຄົນ.
ວັນທີ 17 ກໍລະກົດ 2023, ສຳນັກຂ່າວຊິນຮົວລາຍງານວ່າ: ຈຳນວນຜູ້ຕິດເຊື້ອໄຂ້ເລືອດອອກຢູ່ບັງກະລາເທດເພີ່ມເປັນສະຖິຕິສູງສຸດ ນັບແຕ່ເດືອນມັງກອນປີນີ້ ໃນວັນທີ 15 ກໍລະກົດຜ່ານມາ ໂດຍມີລາຍງານຜູ້ຕິດເຊື້ອໃໝ່ 1.623 ຄົນ ແລະ ມີຜູ້ເສຍຊີວິດເພີ່ມອີກ 7 ຄົນ.
ຂະນະທີ່ສະຖິຕິຜູ້ຕິດເຊື້ອສະສົມຈາກພະຍາດໄຂ້ເລືອດອອກຢູ່ບັງກະລາເທດ ນັບແຕ່ຕົ້ນປີນີ້ມີຢ່າງໜ້ອຍ 19.454 ຄົນ ຈາກຈຳນວນດັ່ງກ່າວເສຍຊີວິດແລ້ວ 100 ຄົນ. ຍິ່ງໄປກວ່ານັ້ນ ຈຳນວນຜູ້ຕິດເຊື້ອໃໝ່ ສະເພາະເຄິ່ງທຳອິດຂອງເດືອນກໍລະກົດສູງເຖິງ 11.476 ຄົນ ແລະ ເສຍຊີວິດແລ້ວ 54 ຄົນ ບົ່ງຊີ້ວ່າການແພ່ລະບາດຂອງພະຍາດໄຂ້ເລືອດອອກຢູ່ບັງກະລາເທດກຳລັງວິກິດ.
ທັງນີ້ພະຍາດໄຂ້ເລືອດອອກເກີດຈາກການຕິດເຊື້ອໄວຣັສເດງກີ ໂດຍມີຍຸງລາຍເປັນພາຫະ ເຊິ່ງຈະເຮັດໃຫ້ເກີດອາການເຈັບປ່ວຍກະທັນຫັນເຊັ່ນ: ເຈັບຫົວ, ມີໄຂ້ສູງ, ອ່ອນເພຍ, ປວດກ້າມຊີ້ນ ແລະ ປວດຕາມຂໍ້ຢ່າງຮຸນແຮງ, ຕ່ອມນ້ຳເຫລືອງບວມ, ປວດຮາກ ແລະ ມີຜື່ນແດງຂຶ້ນຕາມຮ່າງກາຍ.
