ຈີນ-ຫວຽດນາມ ກຽມພ້ອມຮັບມື ຄວາມຮຸນແຮງພາຍຸ “ຕາລິມ”
ຈີນ ແລະ ຫວຽດນາມ ກຽມຄວາມພ້ອມ ເຊິ່ງລວມທັງການອົບພະຍົບປະຊາຊົນ, ໂຈະບໍລິການແລ່ນເຮືອ ແລະ ຖ້ຽວບິນໂດຍສານ ກ່ອນການພັດຜ່ານຂອງພາຍຸ “ຕາລິມ”.
ວັນທີ 17 ກໍລະກົດ 2023, ສໍານັກຂ່າວຕ່າງປະເທດລາຍງານວ່າ: ສຳນັກງານອຸຕຸນິຍົມວິທະຍາແຫ່ງຊາດຈີນ (CMA) ອອກຖະແຫລງການວ່າ: ມົນທົນໄຫ່ໜານ ຫລື ເກາະໄຫຫລຳ ແລະ ມົນທົນກວາງຕຸ້ງ ຄືພື້ນທີ່ສ່ຽງເປັນຈຸດຂຶ້ນຝັ່ງ ແລະ ເປັນພື້ນທີ່ໄດ້ຮັບຜົນກະທົບໜັກໜ່ວງທີ່ສຸດ ຈາກອິດທິພົນຂອງພາຍຸ “ຕາລິມ” ເຊິ່ງຈະຂຶ້ນຝັ່ງໃນຕອນຄໍ່າຂອງວັນທີ 17 ກໍລະກົດນີ້ ຕາມເວລາທ້ອງຖິ່ນ.
ທັງນີ້, CMA ເຕືອນໄພລະດັບສີສົ້ມ ເປັນຂັ້ນທີສອງຮອງຈາກສູງສຸດ ເຊິ່ງມີທັງໝົດ 4 ລະດັບ ເນື່ອງຈາກມີຄວາມເປັນໄປໄດ້ທີ່ພາຍຸຈະທະວີຄວາມຮຸນແຮງຂຶ້ນເປັນຊຸບເປີໄຕ້ຝຸ່ນ. ຂະນະທີ່ທາງການເກາະໄຫຫລຳສັ່ງເຮືອປະມົງໂຈະເດີນທາງອອກຈາກຝັ່ງ, ໂຈະບໍລິການເຮືອເຟີຣີລະຫວ່າງເກາະໄຫຫລຳກັບມົນທົນກວາງຕຸ້ງ ແລະ ເຕືອນໄພການເກີດຄື້ນພາຍຸຊັດຝັ່ງ ເຊິ່ງອາດສູງເຖິງ 6 ແມັດ.
ນອກຈາກນີ້, ສະໜາມບິນນາໆຊາດໄຫ່ໂຂ່ວ ເໝີຍຫລານ ຢູ່ເກາະໄຫຫລຳ ປະກາດໂຈະຖ້ຽວບິນທັງຂາເຂົ້າ ແລະ ອອກ, ສ່ວນສະໜາມບິນນາໆຊາດຈູໄຫ່ ໃນມົນທົນກວາງຕຸ້ງ ໂຈະໃຫ້ບໍລິການຖ້ຽວບິນຫລາຍກວ່າ 80 ຖ້ຽວ ແລະ ສະໜາມບິນຮົງກົງ ໂຈະໃຫ້ບໍລິການຖ້ຽວບິນຫລາຍກວ່າ 1.000 ຖ້ຽວ.
ນອກຈາກນີ້, ກະຊວງປ້ອງກັນປະເທດຫວຽດນາມປະກາດການກຽມອົບພະຍົບປະຊາຊົນຫລາຍກວ່າ 30.000 ຄົນ ຢູ່ແຂວງກວາງນິງ ແລະ ແຂວງຮາຍຟອງ. ທ່ານ ຟາມ ມິງ ຈິງ ນາຍົກລັດຖະມົນຕີຫວຽດນາມ ຈັດຄັ້ງຄະນະສະເພາະກິດ ເພື່ອເຝົ້າລະວັງ ແລະ ສັງເກດການສະຖານະການຢ່າງໃກ້ຊິດ. ຂະນະທີ່ສຳນັກງານອຸຕຸນິຍົມວິທະຍາແຫ່ງຊາດຫວຽດນາມເຕືອນວ່າ: ພາຍຸຕາລິມອາດເປັນພາຍຸມີຄວາມຮຸນແຮງທີ່ສຸດໃນຮອບຫລາຍປີ ເຊິ່ງພັດຜ່ານບໍລິເວນອ່າວຕັງເກຍ.
