ສະພາແຫ່ງຊາດ ຮັບຮອງເອົາຜົນການຈັດຕັ້ງປະຕິບັດ 4 ກົດໝາຍຂົງເຂດຍຸຕິທໍາ ແຕ່ຕ້ອງປັບປຸງແກ້ໄຂຫລາຍດ້ານ ເພື່ອໃຫ້ມີເນື້ອໃນຄົບຖ້ວນ ຈະແຈ້ງ

ວັນທີ 17 ກໍລະກົດ 2023 ນີ້, ທ່ານ ຄຳແພງ ວິລະພັນ ປະທານກຳມາທິການຍຸຕິທຳ ລາຍງານວ່າ: ສະພາແຫ່ງຊາດ ໄດ້ພິຈາລະນາ ແລະ ຮັບຮອງເອົາຜົນການປະເມີນການຈັດຕັ້ງປະຕິບັດ ກົດໝາຍຂົງເຂດຍຸຕິທໍາ 4 ສະບັບ ຄື: ກົດໝາຍ ວ່າດ້ວຍສານປະຊາຊົນ, ກົດໝາຍ ວ່າດ້ວຍອົງການໄອຍະການປະຊາຊົນ, ກົດໝາຍ ວ່າດ້ວຍການດຳເນີນຄະດີແພ່ງ, ກົດໝາຍ ວ່າດ້ວຍການດຳເນີນຄະດີອາຍາ ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ທີ່ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 4 ແລະ 5 ກໍລະກົດ 2023 ຜ່ານມາ.

ພາຍຫຼັງຮັບຟັງການລາຍງານຂອງ ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ແລະ ການປະກອບຄໍາເຫັນຂອງຜູ້ຕາງໜ້າ ຄະນະປະຈໍາສະພາແຫ່ງຊາດ ແລະ ປະທານກອງປະຊຸມໄດ້ເຈາະຈີ້ມ ເພື່ອເປັນບ່ອນອີງໃຫ້ແກ່ ບັນດາສະມາຊິກສະພາແຫ່ງຊາດ ໄດ້ສຸມໃສ່ປະກອບຄຳຄິດເຫັນ ດ້ວຍບັນຍາກາດຟົດຟື້ນ ແລະ ມີຄວາມຮັບຜິດຊອບການເມືອງສູງ ຊຶ່ງມີຜູ້ປະກອບຄໍາເຫັນທັງໝົດ ຈໍານວນ 54 ທ່ານ ຍິງ 8 ທ່ານ.

ກອງປະຊຸມ ໄດ້ຕີລາຄາສູງຕໍ່ການຈັດຕັ້ງປະຕິບັດ ກົດໝາຍ 4 ສະບັບດັ່ງກ່າວ ເຫັນວ່າໄດ້ກາຍເປັນນິຕິກໍາພື້ນຖານສຳຄັນໃຫ້ແກ່ສານປະຊາຊົນ, ອົງການໄອຍະການປະຊາຊົນ ແລະ ບັນດາອົງການທີ່ກ່ຽວຂ້ອງ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ເພື່ອປົກປ້ອງສິດ, ຜົນປະໂຫຍດຂອງລັດ, ລວມໝູ່ ແລະ ຂອງພົນລະເມືອງ ຕາມທີ່ກົດໝາຍໄດ້ກໍານົດໄວ້. ຄຽງຄູ່ກັບດ້ານດີທີ່ຕັ້ງໜ້າ ກອງປະຊຸມເຫັນວ່າ ມີຫຼາຍດ້ານຈະຕ້ອງປັບປຸງ, ແກ້ໄຂ ເປັນຕົ້ນການໂຄສະນາເຜີຍແຜ່ກົດໝາຍຂົງເຂດຍຸຕິທໍາ ທັງ 4 ສະບັບ ຍັງບໍ່ທັນກວ້າງຂວາງ, ເລິກເຊິ່ງ ແລະ ທົ່ວເຖິງ ທຸກເປົ້າໝາຍໃນສັງຄົມ; ການຜັນຂະຫຍາຍມາດຕາ ຂອງກົດໝາຍທີ່ກໍານົດໃຫ້ອອກເປັນນິຕິກໍາໃຕ້ກົດໝາຍຍັງຊັກຊ້າ, ບາງກົດໝາຍການຜັນຂະຫຍາຍ ຍັງບໍ່ທັນສໍາເລັດ; ການປັບປຸງກົງຈັກການຈັດຕັ້ງ, ການປະກອບບຸກຄະລາກອນ, ການກໍານົດພາລະບົດບາດ, ສິດ ແລະ ໜ້າທີ່ ຂອງອົງການທີ່ຮັບຜິດຊອບ ດໍາເນີນຄະດີຕາມຂະບວນການຍຸຕິທໍາ ຍັງບໍ່ທັນຈະແຈ້ງ ແລະ ເປັນລະບົບຄົບຊຸດ, ການປະຕິບັດຫຼັກການ ແລະ ກົນໄກດໍາເນີນຄະດີຈໍານວນໜຶ່ງ ຍັງບໍ່ທັນຄົບຖ້ວນ, ຮອບດ້ານ, ຖືກຕ້ອງ ແລະ ເຂັ້ມງວດ ຕາມທີ່ໄດ້ກໍານົດໄວ້ໃນກົດໝາຍ; ການຕິດຕາມກວດກາ ແລະ ການປະສານສົມທົບກັນ ໃນການແກ້ໄຂຄະດີ ຂອງບັນດາອົງການໃນລະບົບການດຳເນີນຄະດີ ຕາມຂະບວນຍຸຕິທຳ ຍັງບໍ່ທັນແຂງແຮງ. ສານປະຊາຊົນ, ສານທະຫານແຕ່ລະຂັ້ນ ຕັດສິນ ແລະ ພິພາກສາຄະດີໄປແລ້ວ ແຕ່ຄູ່ຄວາມຍັງຂໍອຸທອນ ແລະ ຂໍລົບລ້າງຈຳນວນບໍ່ໜ້ອຍ, ຄຳຕັດສິນຂອງສານທີ່ໃຊ້ໄດ້ຢ່າງເດັດຂາດ ມີຈໍານວນຫຼາຍ ແຕ່ການຈັດຕັ້ງປະຕິບັດຍັງຊັກຊ້າ, ບາງກໍລະນີບໍ່ສາມາດຈັດຕັ້ງປະຕິບັດໄດ້ ຕາມກົດໝາຍ ແລະ ຄໍາຕົກລົງຂອງສານ.

ກອງປະຊຸມ ຍັງໄດ້ຮັບຟັງການຊີ້ແຈງຂອງ ທ່ານປະທານສານປະຊາຊົນສູງສຸດ ກ່ຽວກັບການດຳເນີນຄະດີຂອງສານສາມຂັ້ນ ຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ ແລະ ທ່ານຫົວໜ້າອົງການໄອຍະການປະຊາຊົນສຸງສຸດ ໄດ້ຊີ້ແຈງກ່ຽວກັບການນຳໃຊ້ 7 ມາດຕະການສະກັດກັ້ນຂອງອົງການສືບສວນ-ສອບສວນ ຊຶ່ງຜ່ານການພິຈາລະນາ ປະກອບຄຳເຫັນ ກອງປະຊຸມໄດ້ເຫັນດີເປັນເອກະພາບຕໍ່ ບົດລາຍງານ ແລະ ການຊີ້ແຈງຂອງ ສອງອົງການ; ພ້ອມກັນນັ້ນ, ກອງປະຊຸມຍັງໄດ້ສະເໜີໃຫ້ ສອງອົງການ ນໍາໄປປັບປຸງ ແລະ ແກ້ໄຂໃຫ້ເປັນຮູບປະທໍາຫຼາຍຂຶ້ນ ເຊັ່ນ: ເພີ່ມທະວີການໂຄສະນາເຜີຍແຜ່ກົດໝາຍທັງ 4 ສະບັບດັ່ງກ່າວ ໂດຍເນັ້ນໃສ່ກົດໝາຍວ່າດ້ວຍ ການດຳເນີນຄະດີແພ່ງ ແລະ ກົດໝາຍວ່າດ້ວຍ ການດຳເນີນຄະດີອາຍາ ໃຫ້ກວ້າງຂວາງ, ເລິກເຊິ່ງ, ທົ່ວເຖິງ ແລະ ແທດເໝາະກັບ ແຕ່ລະປະເພດເປົ້າໝາຍໃນສັງຄົມ; ຮີບຮ້ອນປະສານສົມທົບກັບພາກສ່ວນທີ່ກ່ຽວຂ້ອງ ຄົ້ນຄວ້າຜັນຂະຫຍາຍບັນດາມາດຕາ ຂອງກົດໝາຍ ທີ່ກຳນົດໃຫ້ອອກເປັນນິຕິກຳໃຕ້ກົດໝາຍ ລວມທັງບັນດາມາດຕາ ຂອງກົດໝາຍທີ່ເຫັນວ່າ ມີຄວາມຈໍາເປັນຕ້ອງໄດ້ຜັນຂະຫຍາຍອອກເປັນ ຄໍາສັ່ງ ແລະ ຄໍາແນະນໍາ ເພື່ອຮັບປະກັນໃຫ້ແກ່ການຈັດຕັ້ງປະຕິບັດຕົວຈິງ ໃຫ້ມີຄວາມເປັນເອກະພາບ. ສ່ວນມາດຕາຂອງແຕ່ລະກົດໝາຍ ທີ່ເຫັນວ່າບໍ່ສອດຄ່ອງ ຫຼື ຊໍ້າຊ້ອນກັນ ເພື່ອເຮັດໃຫ້ບັນດາກົດໝາຍດັ່ງກ່າວມີເນື້ອໃນຄົບຖ້ວນ, ຮັດກຸມ, ຈະແຈ້ງ, ສອດຄ່ອງ, ກົມກຽວ ແລະ ສາມາດນໍາໄປຈັດຕັ້ງປະຕິບັດໄດ້. ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ຕ້ອງເອົາໃຈໃສ່ປັບປຸງກົງຈັກການຈັດຕັ້ງແຕ່ລະຂັ້ນ, ບໍາລຸງສ້າງພະນັກງານໃຫ້ມີຄຸນທາດການເມືອງ, ຄຸນສົມບັດສິນທໍາປະຕິວັດ, ຈັນຍາບັນ, ຈັນຍາທໍາ ໜັກແໜ້ນ ແລະ ສືບຕໍ່ປັບປຸງກົນໄກການດໍາເນີນຄະດີໃຫ້ຮັບປະກັນ ຄວາມຖືກຕ້ອງ, ຮອບດ້ານ, ຄົບຖ້ວນ, ພາວະວິໄສ, ມີຄວາມໂປ່ງໄສ ແລະ ເປັນທໍາ. ພ້ອມທັງຍົກສູງຄວາມຮັບຜິດຊອບໃນການ ປະຕິບັດໜ້າທີ່ວຽກງານ, ສະກັດກັ້ນພະຍາດອາດຍາສິດ, ການສວຍໃຊ້ໜ້າທີ່ຕໍາແໜ່ງໃນການດໍາເນີນຄະດີ ເພື່ອຫາຜົນປະໂຫຍດສ່ວນຕົວ, ແກ້ໄຂຫາງສຽງ ແລະ ປະກົດການຫຍໍ້ທໍ້ ທີ່ເກີດຂຶ້ນພາຍໃນໃຫ້ ເຂັ້ມງວດ ແລະ ເດັດຂາດ ແລະ ບັນ​ຫາ​ອື່ນໆ​ອີກ.