6 ເດືອນຕົ້ນປີ 2023 ດ່ານພາສີສາກົນນາເພົ້າ ຈັດເກັບລາຍຮັບໄດ້ 68,38 ຕື້ກີບ ບໍ່ບັນລຸ 50% ຂອງແຜນການປີ
ທ່ານ ວັດຖາວົງ ຈະເລີນສັກ ຮອງຫົວໜ້າດ່ານພາສີສາກົນນາເພົ້າ ແຂວງຄຳມ່ວນ ລາຍງານວັນທີ 13 ກໍລະກົດ 2023 ວ່າ: ການຈັດເກັບລາຍຮັບ 6 ເດືອນຕົ້ນປີ 2023 ດ່ານພາສີສາກົນນາເພົ້າ ຈັດເກັບລາຍຮັບໄດ້ 68,38 ຕື້ກີບ ຂອງຕົວເລກມອບໝາຍທັງໝົດ 162,40 ຕື້ກີບ ຫລື ປະຕິບັດໄດ້ພຽງແຕ່ 42,11% ຂອງແຜນການປີ, ສິນຄ້າສ່ວນຫລາຍແມ່ນໄດ້ມາຈາກ ການນໍາເຂົ້ານໍ້າມັນເຊື້ອໄຟ, ເຄື່ອງອຸປະໂພກ-ບໍລິໂພກ ແລະ ຄ່າທຳນຽມຕ່າງໆ.
ສາເຫດທີ່ເຮັດໃຫ້ການຈັດເກັບລາຍຮັບ 6 ເດືອນຕົ້ນປີ ບໍ່ສາມາດບັນລຸໄດ້ເຖິງ 50% ຂອງແຜນການປີ ຍ້ອນພື້ນຖານໂຄງລ່າງຂອງດ່ານຍັງບໍ່ທັນສະດວກ ໂດຍສະເພາະສາງສິນຄ້າຍັງເປັນສາງກາງແຈ້ງ (ຍັງບໍ່ມີສາງໃນຮົ່ມ), ເຮັດໃຫ້ມີຄວາມຫຍຸ້ງຍາກໃນການກວດກາ ແລະ ເກັບມ້ຽນສິນຄ້າ, ລະບົບໄຟຟ້າຢູ່ດ່ານຍັງບໍ່ທັນສົມບູນເຮັດໃຫ້ລະບົບສັນ ຍານຕິດຄັດ, ໃຫ້ການບໍລິການມີຄວາມຊັກຊ້າ ແລະ ລະບົບເສັ້ນທາງຄົມມະນາຄົມຍັງບໍ່ທັນສະດວກ, ເປ່ເພ ໂດຍສະເພາະໄລຍະທາງຈາກດ່ານ ລົງມາ ຫາ ສາງສິນຄ້າ.
ໃນຕໍ່ໜ້າ ດ່ານພາສີສາກົນນາເພົ້າ ຈະເລັ່ງໃສ່ສຶກສາອົບຮົມການເມືອງ-ແນວຄິດໃຫ້ສະ ມາຊິກພັກ-ພະນັກງານ,ເພີ່ມທະວີຄວາມສາມັກຄີພາຍໃນໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ກວດກາເອກະສານ ເປັນຕົ້ນ: ຫົວໜ່ວຍ, ຈຳນວນ, ນໍ້າໜັກ, ລາຄາ, ລະຫັດ,ແຫລ່ງກຳເນີດສິນຄ້າ ແລະ ສິນຄ້ານຳເຂົ້າຕາມນະໂຍບາຍສົ່ງເສີມການລົງທຶນໃຫ້ມີຄວາມຮັດກຸມ, ຖືກຕ້ອງຕາມລະບຽບກົດໝາຍ, ຄຸ້ມຄອງສິນຄ້າຜ່ານແດນສາກົນໃຫ້ໄປຕາມລະ ບົບ ແລະ ມາດຕະຖານການຂົນສົ່ງສາກົນ ເພື່ອຫລີກລ້ຽງຊ່ອງຫວ່າງສວຍໂອກາດ ແລະ ບໍ່ໃຫ້ມາຈຳໜ່າຍຢູ່ພາຍໃນປະເທດ, ປັບປຸງຂອດບໍລິການໃຫ້ສະດວກ, ວ່ອງໄວ, ຕັດຮອນຂັ້ນຕອນທີ່ບໍ່ຈຳເປັນ, ພ້ອມທັງປະສານສົມທົບຢ່າງກົມກຽວກັບອຳນາດການປົກຄອງຂັ້ນທ້ອງຖິ່ນ ແລະ ບັນດາຂະແໜງການພາຍໃນດ່ານ, ສ້າງຄວາມເຊື່ອໝັ້ນໃຫ້ຜູ້ປະກອບການ ແລະ ບັນດາບໍລິສັດໃຫ້ມາເຄື່ອນໄຫວຜ່ານດ່ານນາເພົ້າຫຼາຍຂຶ້ນ ແລະ ເພີ່ມທະວີວຽກງານກວດກາສິນຄ້າໃຫ້ມີຄວາມເຂັ້ມແຂງຂຶ້ນ ເພື່ອຕ້ານການຮົ່ວໄຫລລາຍຮັບທາງດ້ານງົບປະມານ.
