ຄົບຮອບ 61 ປີ ແລະ ຄວາມເປັນມາຂອງແຂວງອຸດົມໄຊ (15 ກໍລະກົດ 1962-15 ກໍລະກົດ 2023)
ວັນທີ 14 ກໍລະກົດ 2023 ຜ່ານມາ, ທີ່ສະໂມສອນແຂວງອຸດົມໄຊ ໄດ້ຈັດພິທີປາຖະກະຖາ ວັນສ້າງຕັ້ງແຂວງອຸດົມໄຊ ຄົບຮອບ 61 ປີ (15/7/1962-15/7/2023) ທ່ານ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ເປັນປະທານ ແລະ ມີພາກສ່ວນຕ່າງໆພາຍໃນແຂວງເຂົ້າຮ່ວມ.
ທ່ານ ບຸນຄົງ ຫຼ້າຈຽມພອນ ໄດ້ເລົ່າມູນເຊື້ອການເຕີບໃຫຍ່ຂະຫຍາຍຕົວຂອງແຂວງອຸດົມໄຊ ແຕ່ຊຸມປີ 1962 ມາເຖິງປັດຈຸບັນ, ເພື່ອເປັນການຈົດຈຳລຳລຶກ ແລະ ຫວນຄືນປະຫວັດສາດ, ມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ ຂອງແຂວງອຸດົມໄຊ ເພື່ອເຮັດໃຫ້ພະນັກງານ, ທະຫານ-ຕໍາຫລວດ ແລະ ປະຊາຊົນບັນດາເຜົ່າທົ່ວແຂວງອຸດົມໄຊມີຄວາມຮັບຮູ້, ເອກອ້າງທະນົງໃຈຕໍ່ຜົນງານ ໄຊຊະນະ ທີ່ໄດ້ຕໍ່ສູ້ກັບສັດຕູພາຍນອກ ແລະ ການປົກປັກຮັກສາສ້າງສາພັດທະນາແຂວງອຸດົມໄຊຕະຫຼອດໄລຍະທີ່ຜ່ານມາ, ຊຶ່ງບາງຕອນທ່ານໄດ້ໃຫ້ຮູ້ວ່າ: ແຂວງອຸດົມໄຊ ເປັນແຂວງໜຶ່ງທີ່ເກີດຂຶ້ນ ໃນສະໄໝຕໍ່ສູ້ປົດປ່ອຍຊາດ ຕ້ານຈັກກະພັດລ່າເມືອງຂຶ້ນແບບເກົ່າ ໃນເມື່ອກ່ອນເມືອງໄຊ ເປັນພຽງເມືອງສ່ວຍ (ເມືອງອາລັກຂາທີ່ຂຶ້ນກັບເຈົ້າຊີວິດຫລວງພະບາງ).
ພໍມາຮອດປີ 1956 ເຈົ້າຊີວິດໄດ້ໂຮມເອົາ 3 ເມືອງ ຄື: ເມືອງໄຊ, ເມືອງຮຸນ, ເມືອງປາກທາ ມາສ້າງຕັ້ງເປັນ ກິ່ງແຂວງໄຊຍະພູມ ຊຶ່ງມີສຳນັກງານກິ່ງແຂວງຕັ້ງຢູ່ ເມືອງໄຊ ແລະ ໃຫ້ຂຶ້ນກັບແຂວງຫຼວງພະບາງ. ພາຍຫຼັງ ເມືອງໄຊ ໄດ້ຮັບ ການປົດປ່ອຍ ສູນກາງພັກຕົກລົງເອົາ ກິ່ງແຂວງໄຊຍະພູມ ສ້າງຕັ້ງເປັນແຂວງລ້ານຊ້າງ ໃນວັນທີ 15 ກໍລະກົດ 1962 ມາຮອດປີ 1965 ແຂວງລ້ານຊ້າງ ໄດ້ປ່ຽນຊື່ມາເປັນ ແຂວງເມືອງໄຊ ແລະ ມາເຖິງ ປີ 1967 ແຂວງເມືອງໄຊ ໄດ້ປ່ຽນຊື່ມາເປັນ ແຂວງອຸດົມໄຊ ຈົນເຖິງປັດຈຸບັນ.
