ສສ ຫວຽດນາມ ໃຫ້ການຊ່ວຍເຫຼືອອັນລ້ຳຄ່າແກ່ການ ພັດທະນາແຂວງສະຫວັນນະເຂດເຕີບໃຫຍ່ຂະຫຍາຍຕົວ
ມູນເຊື້ອອັນດີງາມແຫ່ງການພົວພັນສາມັກຄີພິເສດ ແລະ ການຮ່ວມມືຮອບດ້ານດ້ວຍໄມຕີຈິດອັນບໍລິສຸດຜຸດຜ່ອງທີ່ພັກ ແລະ ລັດທັງສອງປະເທດ ອັນໄດ້ເຮັດໃຫ້ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະປະຊາຊົນບັນດາເຜົ່າຊາວແຂວງສະຫວັນນະເຂດ ແລະ ປະຊາຊົນບັນດາແຂວງແຮກສ່ຽວຂອງ ສສ ຫວຽດນາມ ມີຄວາມເຊື່ອໝັ້ນຢ່າງໜັກແໜ້ນຕໍ່ບາດກ້າວຂະຫຍາຍຕົວ ກໍຄືອະນາຄົດອັນສະຫວ່າງສະໄຫວໃນການນຳພາສອງປະເທດກ້າວຂຶ້ນບົນເສັ້ນທາງກ້າວເຂົ້າສູ່ຄວາມວັດທະນາຖາວອນຕາມຈຸດໝາຍສັງຄົມນິຍົມ. ນີ້ແມ່ນການເປີດເຜີຍຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ຕໍ່ງານໂຮມຊຸມນຸມສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ.
ຄະນະພັກ-ຄະນະປົກຄອງ ແລະ ປະຊາຊົນຊາວແຂວງສະຫວັນນະເຂດມີຄວາມຊື່ນຊົມຕໍ່ຜົນສຳເລັດໃນຫຼາຍດ້ານທີ່ພັກ-ລັດ ແລະ ປະຊາຊົນຫວຽດນາມອ້າຍນ້ອງບັນລຸໄດ້ໃນຊຸມປີຜ່ານມາ, ພິເສດໃນໄລຍະ 30 ປີແຫ່ງການປ່ຽນແປງໃໝ່ ເຊິ່ງໄດ້ສ້າງພື້ນຖານ ແລະ ທ່ວງທ່າໃໝ່ໃຫ້ແກ່ການພັດທະນາປະເທດຊາດໄປຕາມທິດຫັນເປັນອຸດສາຫະກຳ-ທັນສະໄໝສູ່ຈຸດໝາຍສັງຄົມນິຍົມຢ່າງໜັກແໜ້ນ ໂດຍໄດ້ພ້ອມກັນຍຶດໝັ້ນອຸດົມການ ແລະ ມູນເຊື້ອອັນຍາວນານ, ບັນດານະຄອນ ແລະ ແຂວງຕ່າງໆຂອງ ສສ ຫວຽດນາມ ຍາມໃດກໍໃຫ້ການສະໜັບສະໜູນຊ່ວຍເຫຼືອປະຊາຊົນແຂວງສະຫວັນນະເຂດຕະຫຼອດມາ. ອັນທີ່ພົ້ນເດັ່ນກໍແມ່ນການຊ່ວຍເຫລືອກໍ່ສ້າງຫໍວັດທະນະທຳໄກສອນ ພົມວິຫານ ໃນປີ 2012 ມີມູນຄ່າ 8,5 ລ້ານໂດລາສະຫະລັດ ທີ່ເປັນຂອງຂວັນຈາກສະຫາຍ ເລຂາທິການໃຫຍ່ພັກກອມມູນິດຫວຽດນາມ ຫງວຽນຟູຈອງ, ສ່ວນນະຄອນໂຮ່ຈີມິງກໍໃຫ້ການຊ່ວຍເຫຼືອຕິດຕັ້ງລະບົບໄຟຟ້າເຍືອງທາງ ແລະ ໄຟປະດັບປະດາອານຸສອນສະຖານປະທານໄກສອນ ພົມວິຫານ ຈຳນວນ 357 ຊຸດ, ຄະນະໂຄສະນາ-ສຶກສາຫວຽດນາມຊ່ວຍເຫຼືອກໍ່ສ້າງໂຮງຮຽນຢູ່ບ້ານດົງສະຫວັນ ເມືອງເຊໂປນ ມີມູນຄ່າ 1,1 ລ້ານໂດລາສະຫະລັດ, ແຂວງກວາງບິງຊ່ວຍເຫຼືອສ້າງໂຮງຮຽນອະນຸບານມິດຕະພາບສະຫວັນ-ກວາງບິງ ຢູ່ເມືອງໄກສອນ ພົມວິຫານ ມີມູນຄ່າ 10 ຕື້ດົງ ແລະ ຕຶກອາຄານຫ້ອງຮຽນຂອງໂຮງຮຽນການເມືອງ-ການປົກຄອງແຂວງ ມູນຄ່າ 10 ຕື້ດົງ, ປະກອບທຶນເຂົ້າໃນການກໍ່ສ້າງໂຮງຮຽນປະຖົມບ້ານຫິນສະໂງມ ເມືອງພີນ 4 ຕື້ດົງ, ໂຮງຮຽນອະນຸບານບ້ານແດນສະຫວັນ ເມືອງເຊໂປນ 2 ຕື້ດົງ, ນະຄອນດານັງຊ່ວຍເຫຼືອສ້າງສູນພາສາຫວຽດນາມ 2 ແຫ່ງ ມູນຄ່າ 5,2 ຕື້ດົງ ແລະ ສ້າງຫໍພັກນັກສຶກສາໂຮງຮຽນການເມືອງ-ການປົກຄອງແຂວງ ມູນຄ່າ 7,5 ຕື້ດົງ. ພ້ອມນີ້ນະຄອນດານັງ ແລະ ແຂວງກວາງຈິຍັງໄດ້ປະກອບທຶນເຂົ້າໃນການກໍ່ສ້າງຫໍວາງສະແດງມູນເຊື້ອຮ່ວມສຳພັນສູ້ຮົບ ລາວ-ຫວຽດນາມ ຕາມສາຍທາງເລກ 9 (ບັ້ນຮົບລາມເຊິນ 719) ຢູ່ບ້ານດົງສະຫວັນ ເມືອງເຊໂປນ ມູນຄ່າ 150.000 ໂດລາສະຫະລັດ ແລະ 7,5 ຕື້ດົງ ແລະ ທະຫານເຂດ 4 ໄດ້ປະກອບສ່ວນຊ່ວຍເຫຼືອດ້ານອຸປະກອນ ແລະ ຍຸດທະພັນເພື່ອມາວາງສະແດງໃນຫໍພິພິທະພັນດັ່ງກ່າວຈຳນວນຫຼາຍລາຍການ.
ທາງດ້ານການພັດທະນາຊັບພະຍາກອນມະນຸດ ແລະ ການຍົກລະດັບທາງດ້ານເຕັກນິກວິຊາການໃຫ້ແກ່ຂະແໜງສຶກສາ, ສາທາລະນະສຸກ ແລະ ກະສິກຳ ແລະ ປ່າໄມ້ ໃນແຕ່ລະປີເປັນຈຳນວນຫຼາຍ ເຊິ່ງສັງລວມແລ້ວມາເຖິງປັດຈຸບັນມີນັກສຶກສາຈາກແຂວງສະຫວັນນະເຂດໄປສຶກສາຮໍ່າຮຽນໃນລະດັບຕ່າງໆຢູ່ ສສ ຫວຽດນາມ ທັງໝົດ 488 ຄົນ ຍິງ 222 ຄົນ ໃນນີ້ລະດັບປະລິນຍາເອກ 1 ຄົນ, ປະລິນຍາໂທ 41 ຄົນ ແລະ ປະລິນຍາຕີ 446 ຄົນ. ນອກຈາກນັ້ນຍັງໄດ້ສົ່ງຊ່ຽວຊານມາຊ່ວຍ ແລະ ໃຫ້ຄວາມຮູ້ໃນການລ້ຽງສັດ ແລະ ປູກພືດຊະນິດຕ່າງໆອີກດ້ວຍ.
ຜົນສຳເລັດໃນການສະໜັບສະໜູນຊ່ວຍເຫຼືອກໍ່ສ້າງພື້ນຖານໂຄງລ່າງເຂົ້າໃນແຂວງສະຫວັນນະເຂດມັນເປັນການປະກອບສ່ວນຊຸກຍູ້-ປຸກລະດົມຈິດໃຈອັນແຮງກ້າໃຫ້ແກ່ຊາວແຂວງສະຫວັນນະເຂດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ ແລະ ເຊື່ອໝັ້ນວ່າ: ພາຍໃຕ້ການນຳພາອັນປີຊາສາມາດ ແລະ ສະຫຼາດສ່ອງໃສຂອງພັກກອມມູນິດຫວຽດນາມຈະເຮັດໃຫ້ຈຸດໝາຍສັງຄົມນິຍົມຂອງຫວຽດນາມປາກົດຜົນເປັນຈິງຢ່າງແນ່ນອນ.
