ຜູ້ປະກອບການທຸລະກິດຈຳນວນຫລາຍ ຍັງບໍ່ໃຫ້ຄວາມຮ່ວມມື ແຈ້ງດຳເນີນການຂໍຂຶ້ນປ້າຍໂຄສະນາ

ໃນວັນທີ 13 ກໍລະກົດ 2023 ນີ້, ທ່ານ ຄູນມີ ລາດຊະພົນ ຫົວໜ້າຫ້ອງການຖະແຫລງຂ່າວ ວັດທະນະທຳ ແລະ ທ່ອງທ່ຽວ ເມືອງໄຊທານີ ນະຄອນຫລວງວຽງຈັນ ໃຫ້ສຳພາດຕໍ່ສຳນັກຂ່າວສານປະເທດລາວ ກ່ຽວກັບການຄວບຄຸມປ້າຍ ແລະ ອານຸຍາດການອອກປ້າຍໂຄສະນາ ພາຍໃນເມືອງໄຊທານີ ວ່າ: ການຄວບຄຸມ ແລະ ອານຸຍາດອອກປ້າຍໂຄສະນາ ຢູ່ພາຍໃນເມືອງຍັງພົບຫລາຍບັນຫາ ເນື່ອງຈາກມີຜູ້ປະກອບການທຸລະກິດຈຳນວນຫລາຍຂາດຄວາມເອົາໃຈໃສ່ ແລະ ບໍ່ໃຫ້ຄວາມຮ່ວມມືນຳພາກສ່ວນກ່ຽວຂ້ອງທີ່ຮັບຜິດຊອບວຽກງານດ້ານປ້າຍຂອງເມືອງ ໃນການແຈ້ງດຳເນີນການຂໍຂຶ້ນປ້າຍໂຄສະນາ ເຮັດໃຫ້ມີປ້າຍໂຄສະນາຕິດຕັ້ງຊະຊາຍບໍ່ເປັນລະບຽບ, ປ້າຍບໍ່ມີເຈົ້າຂອງ, ລັກຕິດຕັ້ງປ້າຍໂຄສະນາ, ປ້າຍບໍ່ໄດ້ມາດຕະຖານຕາມກຳນົດ ແລະ ການໃຊ້ພາສາລາວບໍ່ຖືກຕ້ອງຕາມຫຼັກການ ເຊິ່ງຈະພົບເຫັນຫຼາຍຕາມເສັ້ນທາງ ຖະໜົນໄກສອນ ພົມວິຫານ, ເສັ້ນທາງເລກ 10 ແລະ ເສັ້ນທາງເລກ 13 ໃຕ້, ເຊິ່ງຕາມການເກັບກຳຂໍ້ມູນຂອງຫ້ອງການ ຖວທ ເມືອງ ໄຊທານີ ຢັ້ງຢືນວ່າທົ່ວເມືອງ ມີພຽງ 58 ປ້າຍໂຄສະນາ ທີ່ໄດ້ດຳເນີນການແຈ້ງຂຶ້ນທະບຽນປ້າຍຖືກຕ້ອງຕາມລະບຽບ.

ຕໍ່ບັນຫານີ້, ຜ່ານມາເຈົ້າເມືອງໆໄຊທານີ ໄດ້ອອກຂໍ້ຕົກລົງ ເລກທີ 454/ຈມ,ຊທນ ລົງວັນທີ 27 ມິຖຸນາ 2023 ວ່າດ້ວຍການແຕ່ງຕັ້ງຄະນະກໍາມະການຈັດສັນຄວາມບໍ່ເປັນລະບຽບຮຽບຮ້ອຍ, ຢູ່ເຂດສະຫງວນທາງ, ການແກ້ໄຂປ້າຍ ແລະ ການຂາຍເຄື່ອງຊະຊາຍຕາມເສັ້ນທາງພາຍໃນ ເມືອງໄຊທານີ, ໂດຍປະຕິບັດຕາມກົດໝາຍທີ່ກ່ຽວຂ້ອງເຊັ່ນ: ກົດໝາຍວ່າດ້ວຍທາງຫລວງ ແລະ ກົດໝາຍວ່າດ້ວຍຜັງເມືອງ, ກົດໝາຍວ່າດ້ວຍປ້າຍ, ຄຳສັ່ງເຈົ້າຄອງນະຄອນຫລວງວຽງຈັນ, ວ່າດ້ວຍການຄຸ້ມຄອງຄວາມເປັນລະບຽບຮຽບ ຮ້ອຍໃນການຈາລະຈອນຕາມເສັ້ນທາງ, ການຄຸ້ມຄອງການປຸກສ້າງສ້ອມແປງ ແລະ ການຕິດຕັ້ງປ້າຍໂຄສະນາຕ່າງໆ ໃນນະຄອນຫລວງວຽງຈັນ ແລະ ນິຕິກຳອື່ນໆທີ່ກ່ຽວຂ້ອງ. ເພື່ອເຄື່ອນໄຫວຕິດຕາມ ກວດກາ ແລະ ແກ້ໄຂ.

ສ່ວນບັນຫາຫາງສຽງທາງສື່ສັງຄົມອອນລາຍ ທີ່ຄະນະກໍາມະການຈັດສັນຄວາມບໍ່ເປັນລະບຽບຮຽບຮ້ອຍລົງແກ້ໄຂ ຢູ່ເຂດສະຫງວນທາງ, ການແກ້ໄຂປ້າຍ ແລະ ການຂາຍເຄື່ອງຊະຊາຍ ຕາມຖະໜົນໄກສອນ ພົມວິຫານ, ເສັ້ນທາງເລກ 10 ແລະ ເສັ້ນທາງເລກ 13 ໃຕ້ ເຫັນວ່າມີການໃຊ້ຫລັກພາສາລາວບໍ່ຖືກຕ້ອງຕາມທີ່ກຳນົດ ແລະ ຕິດຕັ້ງປ້າຍຊະຊາຍຢູ່ໃນເຂດສະຫງວນທາງນັ້ນ, ທາງໜ່ວຍງານທີ່ກ່ຽວຂ້ອງໄດ້ແກ້ໄຂເປັນທີ່ຮຽບຮ້ອຍແລ້ວ ພ້ອມແນະນຳໃຫ້ຊາວຄ້າຂາຍ ເຂົ້າໄປຂາຍຢູ່ສະຖານທີ່ ທີ່ມີການຈັດສັນໄວ້ ເພື່ອຄວາມເປັນລະບຽບ ຮຽບຮ້ອຍ, ມີຄວາມສະອາດຈົບງາມ, ຮັບປະກັນຄວາມປອດໄພໃນການສັນຈອນ, ບໍ່ມີສິ່ງກີດຂວາງ, ບໍ່ຂາຍຊະຊາຍຕາມແຄມທາງ ຫລື ນຳໃຊ້ເຂດສະຫງວນຂອງທາງ ເປັນບ່ອນຄ້າຂາຍ.