ກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານພັກ ຫສນຍ ສະໄໝທີ V
July 13, 2023 - 2:25 PM
ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ຫ້ອງວ່າການສຳນັກງານນາຍົກລັດຖະມົນຕີ ສະ ໄໝທີ V ໄດ້ໄຂຂຶ້ນຢ່າງເປັນທາງການ ໃນຕອນເຊົ້າ ວັນທີ 12 ກໍລະກົດ 2023 ທີ່ຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ໂດຍການໃຫ້ກຽດເຂົ້າຮ່ວມເປັນປະທານ ແລະ ຊີ້ນຳກອງປະຊຸມຂອງສະຫາຍ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ມີສະຫາຍ ອາລຸນໄຊ ສູນນະລາດ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ, ຫົວໜ້າ ຫສນຍ, ມີບັນດາສະຫາຍກຳມະການສູນກາງພັກ, ລັດຖະມົນ ຕີປະຈຳ ສນຍ, ສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ຜູ້ຕາງໜ້າຈາກ ຫ້ອງວ່າການສູນກາງພັກ, ບັນດາສະຫາຍ ຄະນະບໍລິຫານງານພັກ ຫສນຍ, ຄະນະພັກຮາກຖານ, ຄະນະໜ່ວຍພັກຮາກຖານ, ສະມາຊິກພັກສົມບູນ ທີ່ມີຕຳແໜ່ງຮອງຫົວໜ້າກົມຂຶ້ນໄປ ພາຍໃນອົງຄະນະພັກ ຫສນຍ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້ ຈະດໍາເນີນໃນລະຫວ່າງວັນທີ 12-14 ກໍລະກົດ 2023 ເຊິ່ງມີ 3 ວາລະໃຫຍ່ ຄື: ວາລະທີ 1: ປະຊຸມທາບທາມຄວາມໄວ້ວາງໃຈ ຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກ ຫສນຍ ສະໄໝທີ V; ວາລະທີ 2: ປະຊຸມເປີດກວ້າງຄົບຄະນະກາງສະໄໝ ແລະ ວາລະທີ 3: ກອງປະຊຸມດໍາເນີນຊີວິດການເມືອງ ພາຍໃນຄະນະບໍລິຫານງານພັກ ຫສນຍ.
ໂອກາດນີ້, ສະຫາຍ ເລຂາຄະນະບໍລິຫານງານພັກ ຫສນຍ ໄດ້ມີຄຳເຫັນກ່າວເປີດກອງປະຊຸມ ຢ່າງເປັນທາງການ ໂດຍໄດ້ຍົກໃຫ້ຄວາມເອົາໃຈໃສ່ໃນການນຳພາ-ຊີ້ນຳຂອງ ອົງຄະນະພັກ ຫສນຍ ໃນການນຳເອົາທຸກມະຕິ, ຄຳສັ່ງຂອງພັກ ໂດຍສະເພາະ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຫສນຍ ມາເຜີຍແຜ່ດ້ວຍຫລາຍຮູບການ, ວິທີການ ແລະ ຜັນຂະຫຍາຍ ອອກເປັນຫລາຍນິຕິກຳ.
ພ້ອມກັນນີ້, ອົງຄະນະພັກ ຫສນຍ ໄດ້ຜັນຂະຫຍາຍ ເນື້ອໃນການສ້າງການຫັນປ່ຽນ, ແຂງແຮງ, ເລິກເຊິ່ງ ແລະ ຮອບດ້ານ ຕາມມະຕິ XI ຂອງພັກ ມາເປັນ 3 ຫັນ ຂອງ ຫສນຍ ຄື: ຫັນປ່ຽນຈາກແນວຄິດ ລໍຖ້າຄຳສັ່ງ ໃຫ້ເປັນເຈົ້າຕົນເອງ; ຫັນປ່ຽນຈາກການເຮັດວຽກບໍ່ມີຈຸດສຸມ ບໍ່ມີແບບແຜນ ບໍ່ມີຄາດໝາຍ ໄປສູ່ວິທະຍາສາດ ທີ່ມີຈຸດສຸມ ມີແບບແຜນ ມີຄາດໝາຍ ແລະ ຫັນປ່ຽນຈາກລະບົບເຮັດວຽກມີຫລາຍຂອດຂັ້ນ ໄປສູ່ລະບົບການເຮັດວຽກທີ່ສະດວກ, ວ່ອງໄວ, ຖືກຕ້ອງ ແລະ ທັນສະໄໝກວ່າເກົ່າ ເພື່ອສືບຕໍ່ກໍ່ສ້າງພັກ ແລະ ຍົກສູງຄວາມສາມາດ, ຄວາມເປັນແບບຢ່າງ ແລະ ລັກສະນະນຳໜ້າຂອງພັກ, ທັງ ຍົກສູງຄຸນນະພາບການປະຕິບັດພາລະບົດບາດ 3 ດີ ຂອງ ຫສນຍ ຢ່າງຕັ້ງໜ້າ ຄື: ເປັນເສນາທິການທີ່ດີ, ປະສານງານທີ່ດີ ແລະ ບໍລິການຮັບໃຊ້ທີ່ດີ ເຮັດໃຫ້ມີບັນຍາກາດໃໝ່ ມີການຫັນປ່ຽນທີ່ຕັ້ງໜ້າ, ກົນໄກຄ່ອງຕົວ, ວ່ອງໄວ ແລະ ຮັດກຸມຂຶ້ນ. ສະນັ້ນ ກອງປະຊຸມຄັ້ງນີ້ ຈະໄດ້ທົບທວນ ແລະ ຕີລາຄາຄືນໝາກຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ຂອງຕົນ ໃນໄລຍະຜ່ານມາ, ທັງສືບຕໍ່ປະຕິບັດ ທິດທາງ, ໜ້າທີ່ໃນທ້າຍສະໄໝ. ສຳລັບການກະກຽມດຳເນີນກອງປະຊຸມກາງສະໄໝນີ້ ອົງຄະນະພັກ ຫສນຍ ໄດ້ເອົາໃຈໃສ່ນຳພາຈັດຕັ້ງເຊື່ອມຊຶມເອກະສານຕ່າງໆ ທີ່ຕິດພັນກັບການ ດຳເນີນກອງປະຊຸມກາງສະໄໝຂອງບັນດາກະຊວງ-ອົງການ ແລະ ອົງການປົກຄອງທ້ອງຖິ່ນ ໃຫ້ບັນດາສະຫາຍສະມາຊິກພັກ ພາຍໃນ ຫສນຍ ທັງໝົດ ໄດ້ຮັບຮູ້ ແລະ ເຂົ້າໃຈເປັນເອກະພາບກັນ, ມີການແບ່ງຄວາມຮັບຜິດຊອບໃຫ້ ບັນດາສະຫາຍໃນຄະນະບໍລິຫານງານພັກ ແຕ່ຫົວທີ ແລ້ວດຳເນີນການຕາມຂັ້ນຕອນ ແລະ ລະບຽບການ ທີ່ກຳນົດໄວ້. ພິເສດ ບັນດາຮາກຖານພັກ ແລະ 3 ອົງການຈັດຕັ້ງມະຫາຊົນ ຂອງທົ່ວອົງຄະນະພັກ ຫສນຍ ລວມທັງອົງການກາແດງລາວ ໄດ້ສໍາເລັດບັ້ນດໍາເນີນກອງປະຊຸມ ກາງສະໄໝຂອງຕົນ ແລະ ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.
ໃນກອງປະຊຸມ, ສະຫາຍ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ, ຜ່ານມາດຕະຖານລວມ ຂອງພະນັກງານນຳພາ-ຄຸ້ມຄອງ, ມາດຕະຖານສະເພາະ, ສິດ ແລະ ໜ້າທີ່ຂອງຄະນະບໍລິຫານງານພັກ, ຂໍ້ຫ້າມສຳລັບສະມາຊິກພັກ.
ກ່ອນດຳເນີນການທາບທາມຄວາມໄວ້ວາງໃຈ ຕໍ່ການນໍາພາລວມ ແລະ ບຸກຄົນ ໃນຄະນະບໍລິຫານງານພັກ ຫສນຍ ສະໄໝທີ V ຢ່າງເປັນທາງການ, ສະຫາຍ ກິແກ້ວ ໄຂຄຳພິທູນ ໄດ້ມີຄໍາເຫັນໂອ້ລົມ ແລະ ຊີ້ນໍາຕໍ່ການດໍາເນີນກອງປະຊຸມ ໂດຍໄດ້ຍົກໃຫ້ເຫັນ ຄວາມໝາຍຄວາມສຳຄັນ, ລວມທັງ ຈຸດປະສົງ ແລະ ເປົ້າໝາຍໃນການດຳເນີນກອງປະຊຸມຄັ້ງນີ້. ອັນສຳຄັນ, ສະຫາຍ ໄດ້ຮຽກຮ້ອງຜູ້ເຂົ້າຮ່ວມ ໂດຍສະເພາະ ຜູ້ແທນແຕ່ລະສະຫາຍ ຕ້ອງມີສະຕິໃນການໃຊ້ສິດຂອງຕົນຢ່າງເປັນເຈົ້າການ, ບໍ່ໃຫ້ຫລົງເຊື່ອການໂຄສະນາຊັກຊວນຂອງຜູ້ອື່ນ ກໍຄື ກຸ່ມຄົນບໍ່ຫວັງດີ ດ້ວຍຮູບການຕ່າງໆ ຕໍ່ການນຳພາລວມ ກໍຄື ຕໍ່ບຸກຄົນໃນຄະນະບໍລິຫານງານພັກ ຫສນຍ; ຕ້ອງຍົກສູງຄວາມເປັນເຈົ້າຕົນເອງ, ເຊື່ອໝັ້ນຕົນເອງ, ມີຄວາມເປັນເອກະລາດທາງດ້ານແນວຄິດ, ຈິດຕະນາການ ເພື່ອກັ່ນຕອງ, ສ່ອງແສງ-ສົ່ງຂ່າວ; ຕຳນິຕິຊົມເພື່ອນສະຫາຍ ໃນຄະນະບໍລິຫານງານພັກ ໃຫ້ມີລັກສະນະສ້າງສັນ, ຖືກກັບຄວາມຈິງ; ທຸກບັນຫາທີ່ຜູ້ແທນສ່ອງແສງ ຫລື ສົ່ງຂ່າວ ຕ້ອງມີຄວາມເປັນຈິງ ແລະ ກວດສອບໄດ້; ຄະນະຮັບຜິດຊອບການທາບທາມ ຕ້ອງໄດ້ເອົາໃຈໃສ່ສັງລວມຄຳຄິດເຫັນ ໃຫ້ໄປຕາມຄວາມຈິງ, ບໍ່ຕື່ມບໍ່ແຖມ, ດຳເນີນຖືກຕ້ອງຕາມລະບຽບຫລັກການ ກໍ່ຄື ຄໍາສັ່ງຂອງພັກ ທີ່ກຳນົດໄວ້ ຢ່າງເຂັ້ມງວດ. ນອກຈາກນັ້ນ, ສະຫາຍ ຍັງໄດ້ຮຽກຮ້ອງບັນດາສະຫາຍຜູ້ແທນກອງປະຊຸມ ຕ້ອງໄດ້ເອົາໃຈໃສ່ຄົ້ນຄິດຢ່າງຖີ່ຖ້ວນ, ຮອບຄອບ, ບໍ່ຟ້າວຟັ່ງ, ບໍ່ມະລຸມມະລ້ວຍ, ຕ້ອງພິຈາລະນາບັນຫາຕ່າງໆ ດ້ວຍຄວາມຮັບຜິດຊອບດ້ານການເມືອງສູງ, ພ້ອມກັນປະກອບສ່ວນ ເຮັດໃຫ້ກອງປະຊຸມຄັ້ງນີ້ ດຳເນີນໄປຕາມວາລະ, ມີຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ວາງໄວ້. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍ່ໄດ້ດຳເນີນການປ່ອນບັດທາບທາມ ລົງຄະແນນສຽງຄວາມໄວ້ວາງໃຈ ການນຳພາລວມ ແລະ ບຸກຄົນ ໃນຄະນະບໍລິຫານງານພັກ ຫສນຍ.
ຂ່າວ-ພາບ: ກົມປະຊາສຳພັນ ຫສນຍ
