ປະທານສະພາແຫ່ງຊາດ ເນັ້ນໃຫ້ກະຊວງເຕັກໂນໂລຊີ ແລະ ການສື່ສານ ຖືເອົາແຜນພັດທະນາເສດຖະກິດດີຈີຕອນ ເພື່ອພັດທະນາເສດຖະກິດ-ສັງຄົມ

ໃນໂອກາດເຂົ້າຮ່ວມກອງປະຊຸມຄົບຄະນະກາງສະໄໝ ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ (ກຕສ) ສະໄໝທີ II ວັນທີ 13 ກໍລະກົດ 2023, ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ໄດ້ໂອ້ລົມຊີ້ນຳວ່າກະຊວງເຕັກໂນໂລຊີ ແລະ ການສື່ສານຕ້ອງຫັນວຽກງານໃຫ້ເປັນແຜນງານໂຄງການ, ມະຕິ, ຄໍາສັ່ງ, ກົນໄກ, ລະບອບລະບຽບການ ໃຫ້ເປັນອັນລະອຽດ ໃນຂະນະດຽວກັນຕ້ອງຖືວິໃສທັດ, ຍຸດທະສາດ ແລະ ແຜນພັດທະນາເສດຖະກິດດີຈີຕອນ ເປັນປາຍແຫລມ ແລະ ເປັນວຽກບຸລະມະສິດໃນການພັດທະນາເສດຖະກິດ-ສັງຄົມ.

ພ້ອມທັງເນັ້ນໃຫ້ສຸມໃສ່ວຽກງານປັບປຸງ ແລະ ກໍ່ສ້າງພັກໃຫ້ຖືກຕ້ອງຕາມ 5 ຫລັກການ ແລະ 3 ທິດນໍາໃນການກໍ່ສ້າງພັກໃຫ້ມີຄວາມໜັກແໜ້ນ ແລະ ເຂັ້ມແຂງ ທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນນໍາພາ, ສ້າງມະຫາຊົນກ້າວໜ້າທີ່ຈະຂະຫຍາຍເຂົ້າເປັນສະມາຊິກພັກໃໝ່ ໃຫ້ຮັບປະກັນໄດ້ທາງດ້ານຄຸນນະພາບ, ສູ້ຊົນສ້າງ ໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃຫ້ໄດ້ຕາມທິດທາງແຜນການທີ່ກໍານົດໄວ້ ໂດຍຖືເອົາຄຸນນະພາບເປັນກົກ, ເອົາໃຈໃສ່ຊີ້ນໍາ-ນໍາພາ ວຽກງານບໍາລຸງ-ກໍ່ສ້າງພະນັກງານ ໃຫ້ມີລະດັບຄວາມຮູ້ທາງດ້ານທິດສະດີການເມືອງ-ການປົກຄອງ, ມີຄຸນສົມບັດສິນທໍາປະຕິວັດ ແລະ ຄວາມຮູ້ທາງດ້ານວິຊາສະເພາະຢ່າງໜັກແໜ້ນ, ສາມາດຮອງຮັບໜ້າທີ່ວຽກງານໃນໄລຍະໃໝ່; ສຸມໃສ່ນໍາພາ-ຊີ້ນໍາ ການຄົ້ນຄວ້າປັບປຸງນິຕິກໍາເກົ່າທີ່ບໍ່ສອດຄ່ອງ ແລະ ສ້າງນິຕິກໍາໃໝ່ໃຫ້ພຽງພໍ, ສາມາດຮັບຮອງວຽກງານເຕັກໂນໂລຊີ ແລະ ການສື່ສານ ທີ່ນັບມື້ນັບເຕີບໃຫຍ່ຂະຫຍາຍຕົວຢ່າງວ່ອງໄວ ໃນຍຸກອຸດສາຫະກຳ 4.0, ກິດຈະກໍາໃດທີ່ມີຄວາມສ່ຽງ ຈະຕ້ອງໄດ້ສ້າງນິຕິກໍາຄຸ້ມຄອງ ລວມທັງກໍານົດມາດຕະການ ຢ່າງລະອຽດ, ຮັດກຸມ, ເອົາໃຈໃສ່ໂຄສະນາເຜີຍແຜ່ ກ່ຽວກັບການປະຕິວັດອຸດສາຫະກໍາຄັ້ງທີ 4, ກາລະໂອກາດ ແລະ ສິ່ງທ້າທາຍ ສຳລັບ ສປປ ລາວ ແລະ ການຫັນເປັນດີຈີຕອນຂອງປະເທດເຮົາ ໃຫ້ສັງຄົມຮັບຮູ້ ແລະ ເຂົ້າໃຈຢ່າງກວ້າງຂວາງ, ທົ່ວເຖິງ ແລະ ເລິກເຊິ່ງ, ຕ້ອງພັດທະນາພື້ນຖານໂຄງລ່າງເຕັກໂນໂລຊີ ແລະ ການສື່ສານ, ສືບຕໍ່ຊຸກຍູ້ບັນດາບໍລິສັດລັດວິສະຫະກິດດ້ານໄປສະນີ ແລະ ໂທລະຄົມມະນາຄົມ ຂະຫຍາຍເຄືອຂ່າຍການບໍລິການໄດ້ຢ່າງທົ່ວເຖິງ, ແຂ່ງຂັນດໍາເນີນທຸລະກິດຢ່າງຖືກຕ້ອງຕາມລະບຽບກົດໝາຍ, ເສຍພາສີ, ອາກອນ ແລະ ປະກອບສ່ວນມອບພັນທະໃຫ້ລັດ ໃຫ້ໄດ້ຕາມແຜນການ ຫລື ລື່ນຄາດ ໝາຍທີ່ກໍານົດໄວ້.