ຄະນະຜູ້ແທນພັກເສລີປະຊາທິປະໄຕຍີ່ປຸ່ນ ຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອຫາລືການພົວພັນຮ່ວມມືສອງຝ່າຍ

ໃນວັນທີ 12 ກໍລະກົດ 2023 ຄະນະຜູ້ແທນ ພັກເສລີປະຊາທິປະໄຕຍີ່ປຸ່ນ ນຳໂດຍທ່ານ ຮາງິອຸດະ ໂຄອິຈິ (Mr. HAGIUDA Koichi) ປະທານກຳມາທິການຄົ້ນຄວ້ານະໂຍບາຍຂອງ ພັກເສລີປະຊາທິປະໄຕ ຍີ່ປຸ່ນ ພ້ອມຄະນະ ໄດ້ເຂົ້າຢ້ຽມຂ່ຳນັບ, ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ເພື່ອປຶກສາຫາລື ແລະ ແລກປ່ຽນຄຳຄິດເຫັນກ່ຽວກັບ ການພົວພັນຮ່ວມມືສອງຝ່າຍ ແລະ ເປັນເອກະພາບກັນ ກ່ຽວກັບ ທິດທາງການຮ່ວມມືໃນຕໍ່ໜ້າ ໂດຍສະເພາະການເພີ່ມທະວີການຮ່ວມມື ແລະ ແລກປ່ຽນການຢ້ຽມຢາມເຊິ່ງກັນ ແລະ ກັນ ລະ ຫວ່າງສອງພັກ, ສອງລັດ ກໍຄື ສະມາຄົມມິດຕະພາບ ລະຫວ່າງ ສອງປະເທດ. ໃນໂອກາດທີ່ທາງຄະນະໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 11-12 ກໍລະກົດ 2023.

ໂອກາດນີ້, ທ່ານ ບຸນທອງ ຈິດມະນີ ໄດ້ສະແດງຄວາມຍິນດີຕ້ອນຮັບ ຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນ ພັກເສລີປະຊາທິປະໄຕ ໃນຄັ້ງນີ້, ເຊິ່ງມີຄວາມໝາຍຄວາມສຳຄັນ ແລະ ເປັນໂອກາດອັນດີໃຫ້ແກ່ສອງຝ່າຍ ໄດ້ປຶກສາຫາລື ແລະ ແລກປ່ຽນ ຄໍາຄິດເຫັນ ກ່ຽວກັບການເສີມຂະຫຍາຍສາຍພົວພັນມິດຕະພາບ ລະຫວ່າງ 2 ພັກ ແລະ ສາຍພົວພັນຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຍີ່ປຸ່ນ ໃນຕໍ່ໜ້າ. ພ້ອມນີ້, ຍັງໄດ້ແຈ້ງສະພາບການພົ້ນເດັ່ນພາຍໃນພັກ, ພາຍໃນປະເທດ ກໍຄື ຜົນສຳເລັດໃນການສ້າງສາພັດທະນາເສດຖະກິດ-ສັງຄົມ, ການສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ຜົນສຳເລັດໃນດ້ານຕ່າງໆທີ່ຍາດມາໄດ້ພາຍໃຕ້ການນຳພາຂອງພັກ-ລັດຖະບານລາວໃຫ້ຝ່າຍຍີ່ປຸ່ນຊາບ, ພ້ອມທັງຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ, ສອງລັດ ລາວ-ຍີ່ປຸ່ນ ໃນໄລຍະຜ່ານມາ ກໍຄື ປັດຈຸບັນ; ສະແດງຄວາມຂອບໃຈຕໍ່ພັກ ແລະ ລັດຖະບານຍີ່ປຸ່ນ ທີ່ໃຫ້ການຊ່ວຍເຫລືອໃນການຈັດຕັ້ງປະຕິບັດ ບັນດາໂຄງການຮ່ວມມືສອງຝ່າຍໃນການພັດທະນາພື້ນຖານໂຄງລ່າງ, ສາທາລະນະສຸກ, ສຶກສາ, ການຄ້າ-ການລົງທຶນ, ວັດທະນະທໍາ ແລະ ອື່ນໆ, ລວມທັງການຊ່ວຍເຫລືອວັກຊີນ ແລະ ອຸປະກອນການແພດໃນການສະກັດກັ້ນ ແລະ ປ້ອງກັນພະຍາດໂຄວິດ-19 ໃຫ້ແກ່ ສປປ ລາວ; ຍິນດີຮ່ວມກັບຝ່າຍຍີ່ປຸ່ນໃນການຊຸກຍູ້ ແລະ ເສີມຂະ ຫຍາຍສາຍພົວພັນມິດຕະພາບ ລະຫວ່າງ ພັກ ປປ ລາວ ແລະ ພັກເສລີປະຊາທິປະໄຕ ເພື່ອປະກອບສ່ວນເຂົ້າໃນການຊຸກຍູ້ ແລະ ເສີມຂະຫຍາຍສາຍພົວພັນຄູ່ຮ່ວມຍຸດທະສາດ ລະຫວ່າງສອງປະເທດ ລາວ-ຍີ່ປຸ່ນ ໃຫ້ແຕກດອກອອກຜົນ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດໃຫ້ນັບມື້ນັບຫລາຍຂຶ້ນ.

ທ່ານ ຮາງິອຸດະ ໂຄອິຈິ ໄດ້ແຈ້ງໃຫ້ຊາບກ່ຽວກັບສະພາບພົ້ນເດັ່ນພາຍໃນພັກ, ພາຍໃນປະເທດຍີ່ປຸ່ນ ໂດຍສະເພາະຜົນສຳລັດໃນການຈັດຕັ້ງປະຕິບັດ ແຜນການພັດທະນາເສດຖະກິດ-ສັງຄົມ, ການເຄື່ອນໄຫວວຽກງານການຕ່າງປະເທດ, ການປ້ອງກັນ ແລະ ສະກັດກັ້ນການແພ່ລະບາດຂອງພະຍາດໂຄວິດ-19 ຢູ່ຍີ່ປຸ່ນ ໃນຜ່ານມາ; ພ້ອມທັງຕີລາຄາສູງສາຍພົວພັນມິດຕະພາບ ລະຫວ່າງສອງພັກ ແລະ ການພົວພັນຄູ່ຮ່ວມຍຸດທະສາດ ລະຫວ່າງສອງປະເທດ ຍີ່ປຸ່ນ-ລາວ ໃນໄລຍະຜ່ານມາ ກໍຄື ປັດຈຸບັນ, ຍິນດີຮ່ວມກັບຝ່າຍລາວ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດ ຍີ່ປຸ່ນ-ລາວ ໃຫ້ໄດ້ຮັບການເສີມຂະຫຍາຍຍິ່ງໆຂຶ້ນ.