ສານປະຊາຊົນ ແຂວງອຸດົມໄຊ ຕັດສິນຈຳຄຸກຜູ້ຜະລິດ-ຄ້າຂາຍຢາເສບຕິດ 13 ປີ ພ້ອມທັງປັບໃໝ 105 ລ້ານກີບ
ວັນທີ 7 ກໍລະກົດ 2023, ສານປະຊາຊົນ ແຂວງອຸດົມໄຊ ໄດ້ຕັດສິນລົງໂທດຕັດສິນຕັດອິດສະລະພາບ ທ້າວ ໄຕຊິງ ຕໍ່ (ຈໍາເລີຍ) ຈໍານວນ 13 ປີ ພ້ອມທັງປັບໃໝ 105.000.000 ກີບ ໃນສະຖານຜະລິດຢາບ້າ, ຄ້າ-ຂາຍຢາບ້າແລະ ມີຢາບ້າໄວ້ໃນຄອບຄອງ, ມີຝິ່ນ ແລະ ແກ່ນຝິ່ນໄວ້ໃນຄອບຄອງ, ມີ ເຄື່ອງຈັກໄວ້ຄອບຄອງ, ເຄື່ອງມື, ອຸປະກອບທີ່ຜະລິດຢາເສບຕິດ ແລະ ໄດ້ຮີບຢາບ້າ-ເຄື່ອງມືການຜະລິດ ເພື່ອໄປທໍາລາຍຖິ້ມ.
ອົງການໄອຍການຖະແຫລງວ່າ: ວັນທີ 16 ມິຖຸນາ 2022 ເຈົ້າໜ້າທີ່ ປກສ ແຂວງ ອຸດົມໄຊ ໄດ້ສືບຄົ້ນຫາເປົ້າໝາຍຜະລິດ, ຄ້າຂາຍຢາເສບຕິດສາມາດຮູ້ໄດ້ວ່າ ຢູ່ເຮືອນ ທ້າວ ໄຕຊິງ ຕໍ່ ບ້ານໂຮມສຸກ ເມືອງໄຊ, ແຂວງອຸດົມໄຊ, ໄດ້ຜະລິດ, ຄ້າ-ຂາຍຢາເສບຕິດ ຮອດເວລາ 9:00 ໂມງ ວັນດຽວກັນ ຈຶ່ງໄດ້ເຂົ້າມ້າງຈຸດດັ່ງກ່າວດ້ວຍຮູບການເຂົ້າຈັບກຸມ ພ້ອມທັງກວດຄົ້ນເຄຫະສະຖານ (ເຮືອນ) ໂດຍຊ່ອງໜ້າກັບພະນັກງານອົງການໄອຍະການແຂວງ ແລະ ອົງການປົກຄອງ ບ້ານໂຮມສຸກ.
ຜ່ານການກວດຄົ້ນພົບເຫັນຢາບ້າ 2 ຖົງ ມີ 455 ເມັດ, ນ້ຳໜັກ 45,1 ກຣາມ, ແປ້ງຝຸ່ນສີແດງ 1 ຖົງ, ນ້ຳ ໜັກ 197 ກຣາມ, ແປ້ງຝຸ່ນສີຂາວ 2 ຖົງ, ນໍ້າໜັກ 1,4 ກິໂລກຣາມ, ແປ້ງຝຸ່ນສີຂາວ 1 ປ່ອງ, ນ້ຳໜັກ 500 ກຣາມ, ຖົງຢາງສີຟ້າ ເພື່ອບັນຈຸຢາບ້າ (ຖົງເປົ່າ) 237 ຖົງ, ເຄື່ອງອັດຢາບ້າ 1 ເຄື່ອງ (ອັດດ້ວຍມື). ຝິ່ນ 1 ກ້ອນ, ນໍ້າໜັກ 10,7 ກຣາມ, ແກ່ນຝິ່ນ 1 ເປົ່າ, ນໍ້າໜັກ 11 ກິໂລກຣາມ, ເປືອກໝາກຝິ່ນແຫ້ງ 5 ເປົ່າ, ນໍ້າໜັກ 17 ກິໂລກຣາມ ຢູ່ໃນເຮືອນ (ຫ້ອງຊັ້ນລຸ່ມ), ເຄື່ອງຈັກ ອັດຢາບ້າ 1 ເຄື່ອງ ແລະ ຢູ່ໃນລົດກະບະ ມີປືນແບ່ງ 1 ກະບອກ, ລູກປືນເບີ 28 ລູກ ຢູ່ໃນເຮືອນ, ເງິນກີບ 61 ລ້ານກວ່າກີບ, ເງິນຢວນ 9.800 ຢວນ, ເງິນບາດ 5.000 ບາດ, ເງິນໂດລາ 1.505 ໂດລາ, ສາຍຄໍຄຳ ລາຍດູກໆ 1 ເສັ້ນໜັກ 30 ກຣາມ ແລະ ໃບຕາດິນ 1 ໃບ ຢູ່ໃນຕູ້ເຊັບ.
