ສຸຂະພາບຈິດດີ ສຸຂະພາບກາຍກໍດີໄປນຳ

ຄົນທີ່ມີສຸຂະພາບຈິດທີ່ດີນັ້ນແມ່ນຄົນທີ່ມີຄວາມສຸກໄດ້ໃນທຸກສະຖານະການ ສາມາດປັບໂຕຮັບມືກັບເຫດການ ຫລື ສິ່ງແວດລ້ອມຕ່າງໆໄດ້ ບໍ່ວ່າຈະເປັນເຫດການດີ ຫລື ຮ້າຍ ເຊິ່ງການມີສຸຂະພາບຈິດທີ່ດີໄດ້ນັ້ນກໍມີແນວທາງດັ່ງຕໍ່ໄປນີ້:

1. ສ້າງຄອບຄົວໃຫ້ເປັນປຶກແຜ່ນຮົ່ມເຢັນ ການຊ່ວຍກັນເຮັດຄອບຄົວໃຫ້ເປັນສຸກ ມີຄວາມຮັກຕໍ່ກັນໃນຄອບຄົວ ເປັນດັ່ງຢາສະໝານຊີວິດທີ່ບໍ່ວ່າເຮົາຈະມີປະສົບການດີຮ້າຍໃດໆມາ ເມື່ອກັບໄປຫາຄອບຄົວກໍຮູ້ສຶກອົບອຸ່ນສະເໝີ. ຫາກເປັນຜູ້ເຖົ້າກໍຍິ່ງຄວນເຮັດໃຫ້ເປັນທີ່ເພິ່ງທາງໃຈຂອງສະມາຊິກໃນຄອບຄົວ, ຊ່ວຍແນະນຳລູກຫລານ, ເປັນຜູ້ນຳກິດຈະກຳໃນທາງປະເພນີວັດທະນະທຳຂອງຄອບຄົວ ແລະ ຊຸມຊົນ ຈະຊ່ວຍໃຫ້ຄອບຄົວທຸກຄົນມີສຸຂະພາບຈິດທີ່ດີ. ຜູ້ເຖົ້າເອງກໍຈຳເປັນຕ້ອງຮູ້ທັນການປ່ຽນແປງຂອງລູກເພື່ອທີ່ຈະສາມາດລົມກັບຜູ້ອື່ນ ຫລື ຄົນໃນຄອບຄົວໄດ້. ດຽວນີ້ການໃຊ້ສື່ສັງຄົມອອນລາຍ ກໍເຮັດໃຫ້ບໍ່ຮູ້ສຶກເຫງົາໄດ້ຄືກັນ ອາດມີໝູ່ກຸ່ມໃໝ່ໆຂຶ້ນມາທີ່ມີອາຍຸໃກ້ຄຽງກັນ ກໍຈະຊ່ວຍໃຫ້ມີຄວາມສຸກ ສຸຂະພາບຈິດດີຂຶ້ນ.
2. ມີໝູ່ໄວ້ປຶກສາ ແລະ ໃຫ້ກຳລັງໃຈຮ່ວມກັນ ທຸກຄົນທຸກໄວຂອງຊີວິດຕ່າງກໍຜ່ານການມີໝູ່ໃນໄວຕ່າງໆມາແລ້ວທັງໝົດ ການມີໝູ່ກໍຄືການທີ່ມີຄົນຊ່ວຍແບ່ງປັນຄວາມສຸກຄວາມທຸກລະຫ່ວາງກັນ ບາງເທື່ອເລື່ອງລາວທີ່ເປັນຄວາມທຸກໃນຈິດໃຈເຮົາ ເມື່ອໄດ້ແບ່ງປັນກັບຜູ້ອື່ນກໍທຸກໜ້ອຍລົງ, ບາງເທື່ອກໍຈະໄດ້ແນວຄິດໃໝ່ໃນການແກ້ໄຂບັນຫານຳອີກ. ນອກຈາກນີ້ແລ້ວ ໝູ່ຍັງມີໄວ້ເພື່ອເອື້ອເຟື້ອເຜື່ອແຜ່ຝຶກການໃຫ້ທານນຳອີກ.
3. ເມື່ອມີບັນຫາຕ້ອງແກ້ໄຂບັນຫາ ຢ່າແລ່ນໜີ ເພາະຍິ່ງແລ່ນໜີກໍຍິ່ງບໍ່ພົ້ນຢູ່ດີ ທັງຍັງອາດມີບັນຫາສະສົມເພີ່ມຂຶ້ນໄປອີກ ແລະ ຄວນໃຊ້ສະຕິໃນການແກ້ໄຂ ຫາກບັນຫາແກ້ໄຂບໍ່ໄດ້ກໍຂໍໃຫ້ປັບໂຕໃຫ້ຢູ່ໃຫ້ໄດ້ຢ່າງດີທີ່ສຸດ.
4. ຮູ້ຈັກຄຳວ່າພໍ ຄົນທີ່ມີບັນຫາສຸຂະພາບຈິດສ່ວນຫລາຍເກີດຈາກຄວາມເຄັ່ງຄຽດ, ຄວາມບໍ່ຮູ້ຈັກພໍ, ເສຍສຸຂະພາບຈິດ ລວມໄປເຖິງສຸຂະພາບກາຍນຳ.

5.​ ເຮັດວຽກຕະຫລອດ ບໍ່ວ່າຈະເປັນວຽກທີ່ເຮັດແລ້ວມີລາຍໄດ້ ຫລື ບໍ່ມີກໍຕາມ ຂໍໃຫ້ເປັນວຽກທີ່ບໍ່ບຽດບຽນຜູ້ອື່ນ ຫລື ສິ່ງແວດລ້ອມ ເພາະການມີວຽກເຮັດຈະເຮັດໃຫ້ບໍ່ເຫງົາ ແລະ ບໍ່ຄິດຫລາຍຈົນເສຍສຸຂະພາບຈິດ ທັງຍັງເຮັດໃຫ້ຜູ້ເຖົ້າຮູ້ສຶກວ່າໂຕເອງຍັງມີຄ່ານຳອີກ.

6. ເຂົ້າຫາສາສະໜາ ເພາະວ່າສາສະໜາຈະສອນໃຫ້ເຮົາຮູ້ຈັກຄວາມດີງາມຂອງຊີວິດ, ສອນເລື່ອງຂອງການມີສະຕິພິຈາລະ ນາບັນຫາ ແລະ ຍອມຮັບການເກີດຂຶ້ນ, ຕັ້ງຢູ່ ແລະ ດັບໄປຂອງທຸກສິ່ງ.