ລັດຖະມົນຕີກະຊວງສາທາລະນະສຸກ ສະເໜີຮ່າງກົດໝາຍວ່າດ້ວຍສາທາລະນະສຸກ

ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ຂຶ້ນສະເໜີຮ່າງກົດໝາຍວ່າດ້ວຍສາທາລະນະສຸກ ສະບັບສ້າງໃໝ່ ຕໍ່ກອງປະຊຸມສະໄໝສະມັນເທື່ອທີ 5 ຂອງສະພາແຫ່ງຊາດ ຊຸດທີ IX, ໃນວັນທີ 11 ກໍລະກົດ ນີ້ ທີ່ສະພາແຫ່ງຊາດ, ພາຍໃຕ້ການເປັນປະທານຂອງ ທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ເພື່ອໃຫ້ບັນດາທ່ານ ສສຊ ຈາກເຂດເລືອກຕັ້ງຕ່າງໆໄດ້ພ້ອມກັນປະກອບຄຳຄິດເຫັນ ໃສ່ຮ່າງກົດໝາຍວ່າດ້ວຍສາທາລະນະສຸກ ເພື່ອໃຫ້ກົດໝາຍດັ່ງກ່າວ ຄົບຖ້ວນ ສົມບູນ ແທດເໝາະ ສາມາດນຳໄປຈັດຕັ້ງປະຕິບັດໄດ້ໃຫ້ເປັນຮູບປະທຳ.

ທ່ານ ບຸນແຝງ ພູມມະໄລສິດ ໄດ້ລາຍງານວ່າ: ຮ່າງກົດໝາຍ ສາທາລະນະສຸກສະບັບສ້າງໃໝ່ໄດ້ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ ແລະ ຕິດຕາມກວດກາວຽກງານສາທາລະນະສຸກ ເພື່ອເຮັດໃຫ້ວຽກງານດັ່ງກ່າວ, ໄດ້ຮັບການຈັດ ຕັ້ງປະຕິບັດຢ່າງເປັນລະບົບ, ມີປະສິດທິພາບ, ປະສິດທິຜົນ, ຕໍ່ເນື່ອງ ແລະ ຍືນຍົງ ແນໃສ່ຮັບປະກັນໃຫ້ພົນລະເມືອງ ມີສຸຂະພາບດີ ແລະ ອາຍຸຍືນຍາວ, ສາມາດເຊື່ອມໂຍງກັບພາກພື້ນ ແລະ ສາກົນ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ປັດຈຸບັນກະຊວງສາທາລະນະສຸກ ໄດ້ມີກົດໝາຍ ຈຳນວນ 10 ສະບັບ ທີ່ເປັນກົດໝາຍສະເພາະໃນການຄຸ້ມຄອງດ້ານວິຊາການ ແລະ 3 ກົດໝາຍ ກໍາລັງສ້າງໃໝ່ ແຕ່ຍັງບໍ່ທັນໄດ້ມີກົດໝາຍລວມຂອງວຽກງານສາທາລະນະສຸກໂດຍກົງ ໃນການຄຸ້ມຄອງການຈັດຕັ້ງ, ການກໍານົດໜ້າວຽກ, ການແບ່ງຂັ້ນຄຸ້ມຄອງ, ການປົກປ້ອງສິດ, ຜົນປະໂຫຍດຂອງພະນັກ ງານແພດໝໍ ແລະ ປະຊາຊົນ.

ກະຊວງສາທາລະນະສຸກ ແມ່ນກົງຈັກການຈັດຕັ້ງໜຶ່ງຂອງລັດຖະບານ ມີພາລະບົດບາດເປັນເສນາທິການໃຫ້ແກ່ລັດຖະບານ ໃນການຄຸ້ມຄອງມະຫາພາກ ດຳເນີນວຽກງານສາທາ ລະນະສຸກ ໃນການຈັດຕັ້ງປະຕິບັດວຽກງານ ໂດຍການປະຕິບັດລັດຖະທຳມະນູນ, ກົດໝາຍ ແລະ ນິຕິກໍາໃຕ້ກົດໝາຍ, ຫັນເອົາແນວທາງນະໂຍບາຍຂອງພັກ-ລັດ, ມາເປັນ ແຜນການ, ແຜນງານລະອຽດຂອງຕົນ ໂດຍປະຕິບັດນະໂຍບາຍສາທາລະນະສຸກ ທົ່ວປວງຊົນ ຖືເອົາການອະນະໄມ, ກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ເອົາການປິ່ນ ປົວ, ຢາ, ອຸປະກອນການແພດ ແລະ ສະໜອງການບໍລິການສຸຂະພາບຢ່າງທົ່ວເຖິງ, ມີຄຸນນະພາບ, ຍຸຕິທຳ, ສະເໝີພາບ, ການນໍາໃຊ້ການແພດພື້ນເມືອງສົມທົບກັບການແພດສະໄໝໃໝ່ ແລະ ອື່ນໆ.

ປັດຈຸບັນ ກະຊວງສາທາລະນະສຸກ ໄດ້ສ້າງ ແລະ ປັບປຸງ ກົດໝາຍທັງໝົດ ຈຳນວນ 10 ສະບັບ ແລະ ນິຕິກຳໃຕ້ກົດໝາຍຫຼາຍສະບັບ ໃນການຄຸ້ມຄອງ, ບໍລິຫານວຽກງານທາງດ້ານການແພດ ແລະ ວຽກງານສະໜັບສະໜູນ ໃນການຄຸ້ມຄອງ ບັນດາກົມ, ໂຮງໝໍ, ສະຖາບັນ, ສູນ, ສະຖາບັນການສຶກສາ ສາທາລະນະສຸກ ແລະ ຫົວໜ່ວຍວິສາຫະກິດຈຳນວນໜຶ່ງຂຶ້ນກັບ ແລະ ຍັງມີກົງຈັກການຈັດຕັ້ງ ວິຊາການ ຂອງຕົນຢູ່ຂັ້ນທ້ອງຖິ່ນ ຕາມແຕ່ລະຂັ້ນ ແລະ ຄຸ້ມຄອງ ບຸກຄົນ, ນິຕິບຸກຄົນທາງພາກລັດ ແລະ ພາກເອກະຊົນ ທີ່ດຳເນີນທຸລະກິດ ກ່ຽວກັບວຽກງານສາທາລະນະສຸກ ໃນ ສປປ ລາວ. ຄຽງຄູ່ກັນນັ້ນກໍຍັງມີບັນຫາ, ຂໍ້ຄົງຄ້າງ ແລະ ສິ່ງທ້າທາຍ ໃນການປະຕິບັດວຽກງານສາທາລະນະສຸກ ໃຫ້ເປັນການຄຸ້ມຄອງແບບລວມສູນ ເປັນຕົ້ນທາງດ້ານວິຊາການໃນການບໍລິການສາທາລະນະສຸກ, ບຸກຄະລາກອນ, ການເງິນ, ການຄຸ້ມຄອງ, ການຈັດການ, ການປະສານງານ, ການຕິດຕາມ ແລະ ປະເມີນຜົນ ຊຶ່ງກໍມີຍຸດທະສາດໃນການປະຕິຮູບຂະ ແໜງສາທາລະນະສຸກ ຮອດປີ 2030 ຈັດຕັ້ງປະຕິບັດຢູ່ໃນໄລຍະສາມ ເພື່ອຮອງຮັບໃນການປະຕິຮູບ ວຽກງານດັ່ງກ່າວ ຂະແໜງການສາທາລະນະສຸກຕ້ອງໄດ້ມີກົດໝາຍລວມ ຊຶ່ງເປັນບ່ອນອີງພື້ນຖານໃຫ້ການເຄື່ອນໄຫວວຽກງານ ຢ່າງມີປະສິດທິພາບ ແລະ ປະສິດທິຜົນ.